TOʻLQIN OVULIDA TOʻQSONBOSTI EKINLARI VA KOʻChAT EKISh IShLARI UYuShQOQLIK BILAN AMALGA OShIRILMOQDA

Shu kunlarda mamlakatimiz boʻylab “Yashil makon” umummilliy loyihasi doirasida koʻchat ekish ishlari jadal surʼatlarda olib borilmoqda. Amudaryo tumanida ham loyiha doirasida daraxt va buta koʻchatlarini ekish ishlari uyushqoqlik bilan amalga oshirilmoqda.

23-oktyabr kuni Toʻlqin ovulida ham loyiha doirasidagi turli manzarali va mevali daraxtlar koʻchatlarini ekish ishlari boshlab yuborildi. Shu munosabat bilan boʻlib oʻtgan tadbirda Amudaryo tumani hokimi Sobir Xoʻjametov, Toʻlqin ovul fuqarolar yigʻini raisi Rashid Abdugʻaliyev hamda boshqa masʼullar, “Nuroniylar” jamoatchilik Kengashi raisi Bekman Allaberganov, ovul nuroniylari, koʻchaboshchilari, faollari ishtirok etishdi.

Tadbirda dastlab fuqarolar yigʻini binosi oldidan ajratilgan 5 sotixga yaqin yer maydoniga piyoz urugʻlari toʻqsonbosti usulida ekildi. Shundan soʻng, 200 tupdan ortiq mevali va manzarali daraxtlar koʻchatlari oʻtqazildi.

Tadbir davomida 2023-yil kuzida va 2024-yil “Yashil makon” umummilliy loyihasi doirasida Oʻzbekistonda 200 million tup, tumanimizda esa kuz mavsumi davomida 488 ming tup koʻchat ekish rejalashtirilgani taʼkidlab oʻtildi. Shuningdek, hudud iqlimi nihoyatda issiq va qurgʻoq boʻlgani sababli daraxtlar va yashil maydonlar barpo etilishi kerakligi, daraxtzorlar koʻpaytirilishi natijasida atrof salqinlik va kislorod bilan taʼminlanishi va ekologiyani yaxshilashi xususida fikr yuritildi.

Taʼkidlanganidek, tumanimiz iqlim sharoitida shumtol, oddiy qayragʻoch, katalpa, oq akatsiya, dala zarangi, gledichiya, yapon saforasi kabi manzarali daraxtlar, behi, oʻrik, olma, nok, uzum, olcha, gilos kabi mevali daraxtlar yaxshi rivojlanadi. Shuningdek, oq va koʻk terak, jiyda, tol, tut daraxtlari, amorfa, biryuchina, suriya atirguli kabi butasimonlar, sharq biotasi, virgin archalari, qrim qaragʻayi va chinorlar ham hudud iqlimiga tezda moslashadi.

Tadbirda qishloq xoʻjaligi sohasi mutaxassislari shu kabi maʼlumotlar bilan birga koʻchatlarni parvarishlash boʻyicha ham tavsiyalar berib oʻtdilar. Tajribali bogʻbonlar koʻchatlarni oziqlantirib turish muhim ahamiyatga egaligini, oʻgʻitlar bahorda ildizlarning intensiv oʻsishidan oldin yoki kuzda yerning muzlamaydigan qatlamiga berilishi kerakligini, azotli oʻgʻitlarning oʻz vaqtida berilishi daraxtlarning iyun-iyul oylarida ham oʻsishini taʼminlashini, oʻsimliklarning jadal oʻsishi paytida fosforli va kaliyli oʻgʻitlar toʻyintirilishi kerakligi, bu daraxtlarning sovuqqa chidamliligini oshirishini tushuntirib, kerakli maslahatlarni berdilar.

Tadbir hududdagi 31-sonli Maktabgacha taʼlim tashkilotida davom ettirildi va maxsus ajratilgan hududga 100 tupga yaqin koʻchat ekildi. Tashrif buyurgan masʼullar tashkilot binosida kichkintoylar uchun yaratilgan shart-sharoitlar bilan ham tanishib chiqdi.

Shundan soʻng, tadbir ishtirokchilari ovuldagi Oʻrozimbat Kamolov, Gulmirza Rajabov, Ozod Bovubekovlar xonadonlariga tashrif buyurishdi. Ushbu xonadonlarning tomorqa yerlaridan ajratilgan 2-3 sotix yerda tadbir ishtirokchilari bilan birgalikda toʻqsonbosti ekinlaridan piyoz ekildi, yozgi ekinlardan boʻshagan yerlarga ekilgan sarimsoqpiyozning parvarishi bilan qiziqishdi. Bu boʻyicha ham tajriba almashilib, fikr-mulohazalar bildirildi, kerakli tavsiyalar berildi.

“Yashil makon” umummilliy loyihasi doirasidagi koʻchat ekish ishlari 33-sonli maktabda davom ettirilib, mevali va manzarali daraxtlar koʻchatlari ekildi. Tadbir ishtirokchilari taʼlim maskanidagi kuz-qish mavsumiga tayyorgarlik ishlari, boshlangʻich sinf oʻquvchilariga tarqatilayotgan bepul nonushtalarni berish tartibi va sinflardagi davomat bilan ham tanishdilar.

 Shu kuni ovuldagi “Jumabekov Joʻllibay” fermer xoʻjaligida ham “Yashil makon” umummilliy loyihasi doirasida koʻchat ekish ishlarini amalga oshirishga doir seminar oʻtkazildi. Ushbu seminarda tuman hokimi Sobir Xoʻjametov hamda sektorlar rahbarlari, hokim oʻrinbosarlari, mutasaddi idora-tashkilotlar rahbarlari, fuqarolar yigʻini masʼullari qatnashishdi. Tadbirda fermer xoʻjalik hududidagi dalalar chetlariga mevali va manzarali daraxtlar koʻchatlarini ekish bilan birga qishloq xoʻjaligi mutaxassislari tomonidan ularni parvarishlash boʻyicha tegishli tavsiyalar berildi.

Shundan soʻng, fuqarolar yigʻini maʼmuriy binosida umumiy hisobot yigʻilishi oʻtkazildi. Yigʻilishda 1-sektor hududidagi ovul va mahalla fuqarolar yigʻinlari masʼullari qatnashishdi. Tuman hokimi Sobir Xoʻjametov olib borgan ushbu yigʻilishda fuqarolar yigʻinlari masʼullarining oʻtgan davr mobaynidagi amalga oshirilgan ishlar yuzasidan hisobotlari tinglandi. Shuningdek, mahalla yettiligi tomonidan bajarilishi lozim boʻlgan ishlar, belgilangan vazifalar xususida soʻz yuritilib, kelgusidagi rejalar belgilab olindi.

Toʻlqin ovulida boʻlib oʻtgan ushbu tadbirlarda tumanning barcha hududlarida toʻqsonbosti ekinlarini yetishtirish koʻlamini kengaytirish, “Yashil makon” umummilliy loyihasi doirasida koʻchat ekish ishlarini jadallik bilan amalga oshirish kabilarga chora-tadbirlar belgilash yuzasidan tegishli topshiriq va vazifalar berildi.

O.Xudoyberganova.