ARNABOʻYI MAHALLASIDA HUDUD OSOYIShTALIGINI ASRAShDA HAMKORLIKDA ISh OLIB BORILMOQDA

Mahallada tinch-osoyishta muhit yaratish, aholi turmush darajasini yanada yuksaltirish, yoshlarning oʻqishga, sportga boʻlgan qiziqishlarini oshirish, ularni Vatanga sadoqat, millatga muhabbat ruhida tarbiyalash, shuningdek, barcha jabhalarda yetuk kadrlar boʻlib yetishishga daʼvat etish bugungi kundagi dolzarb vazifalardan biri hisoblanadi. Shunga koʻra yurtimizda bu boradagi islohotlar va belgilab berilgan vazifalar izchillik bilan amalga oshirilmoqda.

Tumandagi www.amunews.uz veb saytining “Sogʻlom muhit – sogʻlom hayot” grant loyihasi doirasida Arnaboʻyi mahallasida aholi, ayniqsa, yoshlar oʻrtasida jinoyatchilikning oldini olish, jinoyat sodir etishga moyil, muqaddam sudlangan va jinoyat sodir qilgan shaxslar bilan ishlashish borasida yoʻlga qoʻyilgan ishlar oʻrganildi. Oʻrganishlar davomida mahallada barcha ishlar fuqarolar yigʻini raisi Shuhrat Sultonov, hokim yordamchisi Siroj Oʻrozmatov, xotin-qizlar faoli Shahrizoda Ozodova, yoshlar yetakchisi Shahzod Nuraddinov hamda profilaktika inspektori Davron Karimovlar tomonidan hamkorlikda olib borilayotgani, hududda tinchlik-osoyishtalik hukmronligi, hudud aholisi bexavotir hayot kechirayotgani maʼlum boʻldi.

Arnaboʻyi mahallasida 4350 nafar aholi yashaydi. Mahalla hududidagi Oʻrtaqalʼa, Qarshilixoʻja, Polvonqul aholi punktlarida 803 ta xonadonda yashaydigan oʻzbek, qozoq, qoraqalpoq, rus, tatar millatlariga mansub aholi tinch-totuv hayot kechirmoqda. Aholining aksariyati dehqonchilik bilan shugʻullansa, koʻpchiligi davlat tashkilotlarida, ayrimlari tadbirkorlik bilan shugʻullanadi. Hududdagi 27-, 57-, 33-sonli maktablarda taʼlim-tarbiya ishlari yaxshi yoʻlga qoʻyilgan boʻlib, oʻquvchi-yoshlarning boʻsh vaqtlari mazmunli oʻtishini taʼminlash maqsadida turli toʻgaraklar faoliyati yoʻlga qoʻyilgan.

Mahalladagi ishsiz fuqarolarning kredit va subsidiyalar olishiga, tadbirkorlikni yoʻlga qoʻyib, oʻzini oʻzi band qilishiga koʻmaklashilayotgani, yoshlar taʼlim-tarbiyasi, ularning boʻsh paytlari mazmunli oʻtishi doim eʼtiborda boʻlayotgani, toʻy-marosimlarni tartibli oʻtkazishda mahalla yoshi ulugʻlari bilan bamaslahat holda ish olib borilayotgani ijobiy samara koʻrsatmoqda. Hududdagi yosh yigit-qizlarga oʻz hayotlarida toʻgʻri yoʻlni topishlarida, kasb-hunar egallashlarida, kelin-kuyovlarga mustahkam oila qoʻrgʻonini yaratishda nuroniy otaxon va onaxonlarning pand-nasihatlari, oʻgit va maslahatlari muhim ahamiyat kasb etmoqda.

Undan tashqari, profilaktika inspektori Davron Karimovning mahallada huquqbuzarlik va jinoyatchilikning oldini olishda koʻrsatayotgan jonbozligi, samarali chora-tadbirlarni amalga oshirayotgani natijasida mahalla “Yashil” toifadagi hududlar qatoriga kiritildi.

Oʻtgan davr mobaynida mahalla hududida bezorilik, bosqinchilik, firibgarlik, oʻgʻirlik, talonchilik kabi jinoyatlar sodir etilishining oldi olindi. Tan jarohatini yetkazish va avtoavariya holatlari esa kamaytirishga erishildi. Joriy yilning 9 oyi davomidagi ishlar “Obod va xavfsiz mahalla” tamoyili asosida “mahallabay, xonadonbay” tarzda tashkil etilib, oilalar oʻrganildi. Oʻrganishlar davomida huquqbuzarlik va jinoyat sodir etish mumkin boʻlgan hamda jabrlanuvchiga aylanib qolish ehtimoli yuqori boʻlgan fuqarolar aniqlandi va mahalla beshligi tomonidan ular bilan ishlashish boʻyicha tegishli chora-tadbirlar koʻrildi.

Undan tashqari, fuqarolardan kelib tushayotgan ogʻzaki, yozma va elektron shakldagi 80 dan ziyod murojaatlar oʻrganilib, barchasi ijobiy hal qilindi. Aholi muammolarini uyma-uy yurib oʻrganish davomida aniqlangan muammolarni hal qilish maqsadida tegishli idora-tashkilotlarga 25 ta taqdimnomalar kiritilgan boʻlsa, ushbu muammolarning 85 foizdan ortigʻiga ijobiy yechim topishga erishildi. Shuningdek, muqaddam jinoyat sodir qilib, hozirda sud qarori bilan probatsiya hisobida turgan holda “ozodlikdan cheklash” jazosini oʻtayotgan hamda maʼmuriy huquqbuzarlik sodir qilib, profilaktik hisobda turgan shaxslarning ham yashash sharoiti va oilaviy ahvoli yaqindan oʻrganilib, doimiy nazoratga olindi.

Shu qatorda doimiy ravishda mahalla hududida joylashgan 27-, 33- hamda 57-sonli maktablarda haftaning har payshanba kuni “profilaktika kuni” tadbirlari oʻtkazilib kelinmoqda. Shuningdek, aholining huquqiy ongi va madaniyatini yuksaltirish maqsadida targʻibot-tashviqot ishlari ham amalga oshirilmoqda. Mahalla hududida joylashgan savdo obʼektlari, koʻngilochar maskanlar, oshxona, kafelarda jamoat tartibi, fuqarolar xavfsizligi, mol-mulki daxlsizligini taʼminlash, jinoyat va huquqbuzarlikning oldini olish maqsadida har kuni tungi patrullik tashkil etilib, xizmat olib borilmoqda.

Tumandagi www.amunews.uz veb saytining “Sogʻlom muhit – sogʻlom hayot” grant loyihasi ish rejasiga muvofiq oʻtkazilgan oʻrganishlar davomida Arna boʻyi mahallasi masʼullari oʻzaro mehr-oqibat, ahillik va totuvlikda hamkorlikda faoliyat olib borishayotgani, samarali natijalarga erishilayotgani maʼlum boʻldi. Loyiha ijrochilari boshqa ovul va mahallalardagi ibratli ishlarni namuna qilib koʻrsatish, ommalashtirish maqsadida hamkor tashkilotlar ishtirokida boshqa hududlarda ham shu kabi tadbirlarni tashkil etishga kelishib olishdi.

O.Xudoyberganova.