Toʻqsonbosti ekinlari – moʻmay daromad manbai

Dehqonchilikning toʻqsonbosti usuli yaxshigina daromad manbai boʻlish bilan birga, aholining ertaki sabzavot mahsulotlariga boʻlgan talabini qondirish imkonini beradi. Amudaryo tumanida aholining ertaki sabzavot mahsulotlariga boʻlgan talabini toʻliq qondirish maqsadida hosildan boʻshagan maydonlarga sovuqqa chidamli piyoz va sarimsoqpiyoz kabi ekinlarni toʻqsonbosti usulida ekish ishlari uyushqoqlik bilan olib borilmoqda.

1-noyabr kuni tumanning Amir Temur nomli ovuli hududida faoliyat yurituvchi “Jurʼatbek-Sultonbek” fermer xoʻjaligida piyoz, sarimsoqpiyoz ekinlarini bogʻ ichiga – mevali daraxtlar qator oralariga toʻqsonbosti usulida ekish boʻyicha seminar boʻlib oʻtdi.

Seminarda tuman hokimi Sobir Xoʻjametov, tuman hokimining qishloq va suv xoʻjaligi masalalari boʻyicha oʻrinbosari Anvar Yuldashev, fermer xoʻjaliklari raislari, tomorqachilar va ovul hamda mahalla fuqarolar yigʻinlari raislari, masʼullar ishtirok etishdi.

Toʻqsonbosti deganda qishning toʻqson kuni nazarda tutilgan boʻlib, bu usulda kuzda ham yerga ekin ekilib, erta bahorda hosil olish imkoni paydo boʻladi. Natijada qish va bahor oylarida ham bozorlarimiz toʻkin-sochin, narx-navo barqaror boʻlishiga zamin yaratiladi. Xalqimizda “Toʻqsonda sugʻorsang, toʻqson botmon hosil olasan”, degan naql bejizga aytilmagan. Kuzda ekilib, qor ostida qoldirilgan sabzavot ekinlari urugʻlari erta koʻklamda yerdan juda barvaqt unib chiqib, tez rivojlanishi hisobiga erta hosil beradi. Erta bahorda esa mahsulotning bozori chaqqon boʻlishi sir emas.

Ushbu masalaga hukumatimiz tomonidan ham alohida eʼtibor qaratilib, aholining sogʻlom ovqatlanishi, xalqimiz dasturxoniga yil davomida har xil sabzavot mahsulotlarining yetishtirilishi uchun bir qator ishlar amalga oshirilmoqda. Bu borada Amudaryo tumanida ham ishlar uyushqoqlik bilan, qizgʻin olib borilmoqda.

Seminarda 2024-yil hosili uchun fermer va dehqon xoʻjaliklari dalalariga piyoz va sarimsoqpiyoz ekinlarini bogʻ qator orasiga toʻqsonbosti usulida ekishning ahamiyati haqida maʼlumotlar berildi.

Keyingi yillarda respublikada tumanlarning ixtisoslashuvi, mintaqalarning tuproq-iqlim sharoitlari va suv bilan taʼminlanishi hamda boshqa omillarni eʼtiborga olgan holda qishloq xoʻjaligi ekinlarini oqilona joylashtirishga alohida eʼtibor berib kelinmoqda. Shundan kelib chiqqan holda bu yil tuman boʻyicha jami 1777 gektar maydonga piyoz, sarimsoqpiyoz kabi ekinlarni toʻqsonbosti usulida ekish rejalashtirilgan.

Qayd etish kerakki, toʻqsonbosti ekinlari fermer va dehqonga daromad keltirishi bilan birga, bozorlarimizda narx-navo barqarorligini taʼminlashda ham muhim ahamiyat kasb etmoqda.

Tuman hokimligi Axborot xizmati