Xalq deputatlari Amudaryo tuman Kengashining 66-sessiyasi toʻgʻrisida axborot

2023-yil 10-noyabr kuni Amudaryo tumani hokimligining majlislar zalida Xalq deputatlari tuman Kengashining navbatdagi – 66-sessiyasi boʻlib oʻtdi.

Sessiyani Xalq deputatlari tuman Kengashi raisining oʻrinbosari Gʻulomjon Eshniyozov ochdi va olib bordi. Sessiya kotibligiga 29-Qangli saylov okrugidan deputat Zamira Safarova saylandi.

Sessiyada deputatlar, tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyada dastlab Jinoyat ishlari boʻyicha tuman sudi tomonidan 2023-yilning 9 oyi davomida odil sudlovni amalga oshirish boʻyicha qilingan ishlar haqida sud raisi Asqar Safarov hisobot berdi.

Hisobotda taʼkidlanganidek, 2023-yilning 9 oyi davomida mazkur sudning ish yurituviga 153 nafar shaxsga nisbatan 109 ta jinoyat ishi kelib tushgan. Shundan, 142 nafar shaxsga nisbatan 107 ta jinoyat ishi koʻrib tamomlangan boʻlsa, 15 nafar shaxsga nisbatan 13 ish jinoyat ishlari tegishliligiga koʻra boshqa sudga yuborilgan.

Sessiyada tuman prokuraturasi tomonidan joriy yilning 10 oyi davomida qonuniylikni mustahkamlash, fuqarolarning huquq va erkinliklarini himoya qilish, jinoyatchilikka qarshi kurashish hamda huqubuzarliklarning oldini olish borasidagi ishlar toʻgʻrisida tuman prokurorining katta yordamchisi Shariyar Joldasbayev hisobot berdi.

Hisobotda qayt etilganidek, joriy yilning 10 oyi davomida 106ta nazorat tadbirlari oʻtkazilib, qonunchilik talablariga zid boʻlgan hujjatlarga nisbatan 176ta protestlar keltirilgan. Qonunbuzilishi holatlarini bartaraf etish haqida 49ta taqdimnomalar kiritilgan. Shuningdek 157 nafar mansabdor shaxs intizomiy va maʼmuriy javobgarlikka tortilgan hamda qoʻpol qonunbuzilishi holatlari yuzasidan 5ta jinoyat ishlari qoʻzgʻatilib, 348 nafar shaxsning buzilgan huquqlari tiklangan. Huquqbuzarliklar natijasida yetkazilgan 1 mlrd 452 mln 212 ming soʻm zarar ixtiyoriy ravishda qoplangan.

Bundan tashqari 55ta tadbirkorlik subʼektlariga amaliy yordamlar koʻrsatilib, shundan 2tasiga tabiiy gaz tarmogʻiga, 2tasiga ichimlik suv tarmogʻiga, 17tasiga elektr tarmogʻiga ulanishida, 15tasiga tumandagi tijorat banklaridan jami 10 mlrd. 634 mln. soʻm kredit mablagʻlari ajratilishida, 3ta tadbirkorga bino ajratilishida, 4 tasiga boshqa masalalarda yordam koʻrsatilgan. Natijada 12ta tadbirkorlik subʼekti yangidan tashkil qilinishiga va 76ta yangi ish oʻrinlari yaratilishiga koʻmaklashilgan.

Sessiya ishida tuman hokimining birinchi oʻrinbosari Komiljon Aytbayev “Saxovat va koʻmak” jamgʻarmasi mablagʻlari hisobidan ehtiyojmand oilalarga mablagʻ ajratib berish boʻyicha taklif berdi. Sektor aʼzolari tomonidan uyma-uy yurish natijasi va sektor rahbarlarining tavsiyasiga asosan boquvchisini yoʻqotgan, yakka-yolgʻiz, I va II guruh nogironligi bor aʼzolari boʻlgan, mehnatga layoqatli ishsiz aʼzolari boʻlgan, koʻp farzandli hamda tibbiy yordamga muhtoj ehtiyojmand oilalarga “Saxovat va koʻmak” jamgʻarmasi tomonidan mablagʻ ajratish berish taklifi deputatlar tomonidan maʼqullandi.

Shundan keyin tuman Moliya boʻlimi boshligʻi Javlon Jumamuratov mahalliy byudjet mablagʻlari hisobidan ajratiladigan mablagʻlarning sarflanishini nazorat qilish va bu borada ochiqlikni taʼminlash masalasida hisobot berdi.

Hisobotda tuman mahalliy byudjetining daromadlar qismi aniqlangan reja prognozi 57 mlrd 830 mln 871 ming soʻmga belgilangan boʻlib, amalda 66 mlrd 139 mln 136 ming soʻmga yaʼni 114,4 foizga, yoki rejaga nisbatan 8 mlrd 308 mln 265 ming soʻmga ortigʻi bilan bajarilishiga erishilgan. Ushbu koʻrsatgich birinchi chorakda jami 3 mlrd 742 mln 300 ming, ikkinchi chorakda jami 2 mlrd 47 mln 700 ming, uchinchi chorakda esa jami 2 mlrd 517 mln 600 ming soʻmni tashkil qiladi.

Sessiyada tuman Xalq qabulxonasi mudiri Erkin Rajabov aholidan kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari toʻgʻrisidagi masala yuzasidan axborot berdi.

Axborotda taʼkidlanganidek, Oʻzbekiston Respublikasi Prezidentining Virtual qabulxonasiga 2023-yil 31-oktyabr sanasiga qadar tuman aholisi tomonidan jami 3 ming 755ta masalalar boʻyicha murojaatlar kelib tushgan. Shundan 2 ming 810tasi qanoatlantirilgan, 1 ming 546tasi ijobiy hal qilingan.

Sessiyada Kengash vakolatiga kiruvchi boshqa masalalar ham muhokama qilindi. Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligi Axborot xizmati