Toshyop ovulida sayyor qabul oʻtkazildi

Mamlakatimizda Prezidentimiz tashabbusi bilan hududlarda mutasaddi rahbarlarning aholini qiynab kelayotgan muammolari bilan ishlash, murojaatlardagi masalalarni joylarga chiqib oʻrganish hamda ularni ijobiy hal etish tizimi yangi bosqichga koʻtarildi.

Tumanimiz boʻylab sektorlar rahbarlari tomonidan oʻtkazilib kelinayotgan sayyor qabullar ovoragarchiliklarning oldini olish, muammolarni imkon qadar tezkor hal etishda muhim ahamiyat kasb etayotir.

2023-yil 14-noyabr kuni 4-sektor hududidagi Toshyop ovulida sektor rahbari – Davlat soliq inspektsiyasi boshligʻi Jahongir Rahimov, Oʻzbekiston Respublikasi Prezidentining tuman xalq qabulxonasi mudiri Erkin Rajabov ishtirokida sayyor qabul boʻlib oʻtdi.

Unda tegishli soha vakillari hamda ovul fuqarolar yigʻini masʼullari, “Ayollar daftari”ga kiritilgan ayol-qizlar, “Yoshlar daftari”ga kiritilgan yoshlar hamda aholi vakillari ishtirok etdi.

Sayyor qabul jarayonida aholi vakillarining turli mazmundagi muammoli masalalari yuzasidan 9ta murojaatlar qabul qilindi. Murojaatlardagi masalalar asosan ijtimoiy va moddiy yordam olish, tadbirkorlik faoliyati bilan shugʻullanish uchun kredit olishda amaliy yordam soʻrash, bandligini taʼminlash, elektr taʼminotidagi muammolarni hal etish, obodonlashtirish va ichki yoʻllarni taʼmirlash masalalarida amaliy yordam soʻrash mazmunida boʻldi. Qator masalalar sayyor qabul jarayonining oʻzidayoq ijobiy yechimini topdi.

Murojaatlarning 4tasi joyida qanoatlantirildi hamda 3tasiga asosli tushunchalar berildi. Qolgan 2ta murojaat tegishliligi boʻyicha idora va tashkilotlarga yuborilib, ijrosi nazoratga olindi.

Sektor rahbari – Davlat soliq inspektsiyasi boshligʻi Jahongir Rahimov muddat talab qiladigan murojaatlardagi masalalarni ijobiy hal etish yuzasidan tegishli masʼullarga topshiriqlar berib, aholi muammolari bilan ishlashda samarali tizim hisoblangan “mahallabay” ishlash, ayniqsa, “Temir daftar”, “Ayollar daftari” va “Yoshlar daftari”ga kiritilgan oilalar, fuqarolar bilan manzilli va natijali ishlash boʻyicha masʼullarga tegishli topshiriqlar hamda tavsiyalar berdi.

Mamlakatimizda inson manfaatlarini taʼminlash, turmush sifati va farovonligini oshirish uchun avvalo, ularning dard-u tashvishlari, orzu-niyatlari, hayotiy muammo va ehtiyojlarini oʻrganishga alohida eʼtibor qaratilmoqda. Shu maqsadda xalq bilan ochiq muloqotlar olib borilib, insonlar huquq hamda manfaatlarini taʼminlash orqali xalqimizning farovon, baxtli hayot kechirishi uchun munosib sharoitlar yaratilayotir. Keyingi yillarda amalga oshirilayotgan xalq bilan ochiq muloqotlar, oʻtkazilayotgan sayyor qabullar va xalq hayotini xonadonma-xonadon yurib oʻrganishlar mamlakatimizni har tomonlama rivojlantirish yoʻlida muhim vosita boʻlmoqda.

Sayyor qabul yakunlanganidan soʻng sektor rahbari – Davlat soliq inspektsiyasi boshligʻi Jahongir Rahimov Toshyop ovulidagi aholi vakillari bilan ochiq muloqot oʻtkazdilar hamda ularning muammolarini oʻrgandilar.

Tumanimiz boʻylab oʻtkazilayotgan sayyor qabullar davlat organlari va fuqarolar oʻrtasida mustahkam koʻprik boʻlibgina qolmasdan, aholining hukumat rahbarlariga va davlat idoralariga boʻlgan ishonchining yanada mustahkamlanishiga sabab boʻlmoqda.

Tuman hokimligi Axborot xizmati