XIZR ELI MAHALLASIDA NAVBATDAGI SAYYoR QABUL OʻTKAZILDI

Aholi muammolari, ularning yechimi boʻyicha barcha hududlarda tuman hokimining sayyor qabullari oʻtkazilmoqda. Ushbu sayyor qabullarda fuqarolarning turli mazmundagi murojaatlari qabul qilinib, oʻrganib chiqilmoqda.

30-noyabr kuni navbatdagi sayyor qabul Xizr eli mahallasida fuqarolar yigʻini maʼmuriy binosida boʻlib oʻtdi. Sayyor qabulda tuman hokimining moliya-iqtisodiyot va kambagʻallikni qisqartish masalalari boʻyicha birinchi oʻrinbosari Kamiljon Aytbayev, Xalq qabulxonasi boshligʻi Erkin Rajabov, fuqarolar yigʻini raisi Otabek Toʻrayev, mutasaddi korxona-tashkilotlar rahbarlari, masʼullari ishtirok etishdi. Shuningdek, fuqarolar yigʻini masʼullari, mahalla beshligi, koʻchaboshchilari va faollar ham qatnashishdi.

Qabulda dastlab bugungi kunda aholi muammolarini oʻrganish, hal etish shu orqali aholining turmush sharoitini yanada yaxshilash borasida amalga oshirilayotgan tizimli ishlar xususida soʻz yuritildi. Shuningdek, tuman hokimining birinchi oʻrinbosari Kamiljon Aytbayev tumanda aholini kambagʻallikdan chiqarish va iqtisodiyotni barqaror rivojlantirish, yangi ish oʻrinlarini yaratish, xalqning turmush farovonligini yaxshilash, borasida amalga oshirilayotgan ishlar, yangi loyihalar haqida gapirib oʻtdi.

Prezidentning tumandagi Xalq qabulxonasi boshligʻi Erkin Rajabov ham yurtimizning barcha hududlaridagi Xalq qabulxonalari odamlar ogʻirini yengil qilish, ularning muammolarini hal etishda muhim ahamiyat kasb etayotgani, buni Oʻzbekiston Respublikasi Prezidentining Amudaryo tumanidagi Xalq qabulxonasi faoliyati misolida ham koʻrish mumkinligini taʼkidlab oʻtdi.

Undan tashqari, Prezidentning tumandagi Virtual qabulxonasiga joriy yil boshidan 1-noyabr sanasiga qadar aholidan jami 3755ta masalalar boʻyicha murojaatlar kelib tushgani, shundan 2823tasi Prezidentning ishonch telefoni orqali, 110tasi Prezident pochtasiga, 96tasi Prezident Xalq qabulxonasiga, 55tasi sayyor qabulda, 384tasi Qabulxonaning veb-sayti orqali va 287tasi tuman Xalq qabulxonasida qabul qilingani haqida maʼlumot berdi. Ushbu murojaatlarning 2810tasi, qanoatlantirilgani, shundan, 1546tasi ijobiy hal qilingani, 1240tasiga huquqiy maslahatlar berilgani, 24tasi uzoq muddatli nazoratga olingani, qolgan 516tasiga ogʻzaki tushuntirish berilgani, 28tasi rad etilgani, 125tasi tugatilgani, 6tasi koʻrmasdan qoldirilgani, 10 tasi maʼlumot uchun qabul qilingani va 260tasi koʻrib chiqish jarayonida ekanligini aytib oʻtdi.

Shundan soʻng, fuqarolar muammolarini oʻrganish, ularning turmush tarzini yaxshilash borasida tuman hokimining moliya-iqtisodiyot – va kambagʻallikni qisqartish masalalari boʻyicha birinchi oʻrinbosari Kamiljon Aytbayev mahalla fuqarolar bilan yuzma-yuz uchrashib, ularni qiynab kelayotgan muammolar bilan tanishdi. Qabulga kelgan fuqarolar asosan, sogʻliqni saqlash, ishga joylashish, uy-joy, moddiy yordam, yoʻllarni taʼmirlash, toza ichimlik suvi bilan taʼminlash, tadbirkorlikni qoʻllab-quvvatlash masalalari boʻyicha murojaat qilishdi.

Qabul jarayonida 20 nafardan ortiq fuqarolarning murojaati tinglanib, atroflicha muhokama qilindi. Murojaatlarning ayrimlari joyida hal etilib, muddat talab etiladigan murojaatlar joyiga chiqib oʻrganilishi yuzasidan koʻrsatmalar berib oʻtildi hamda aloqador tashkilotlarga murojaatlarning ijrosini tezroq va aniq muddatlarda bajarish yuzasidan koʻrsatma va topshiriqlar berildi.

O.Xudoyberganova.