Tuman hokimining aholi bilan uchrashuvi oʻtkazildi

Mamlakatimizda Prezident tashabbusi bilan hududlarda mutasaddi rahbarlarning aholini qiynab kelayotgan muammolarni joylarga chiqib oʻrganishi hamda ularni ijobiy hal etishi borasida tizimli ishlar yoʻlga qoʻyildi.

Butun mamalakatimiz boʻylab joylarda turli darajadagi rahbarlarning aholi bilan ochiq muloqotlari, sayyor qabullari tashkil etilib, insonlarning muammolari oʻrganilmoqda hamda ularni bartaraf qilish choralari koʻrilmoqda.

Amudaryo tumani hokimi Sobir Xoʻjametov, tuman Xalq qabulxonasi mudiri Erkin Rajabov, tuman Mudofaa ishlari boʻyicha boʻlimi boshligʻi Sherzod Murodovlarning tuman Maktabgacha va maktab taʼlimi boʻlimiga qarashli 55-sonli maktabda Mangʻit shahrining Oybek, Gulzor, Olmazor mahallalari aholisi bilan uchrashdi.

Uchrashuvda mahalla fuqarolar yigʻinlari raislari, xotin-qizlar faollari, hokim yordamchilari, yoshlar yetakchilari, mutasaddi tashkilotlar vakillari ishtirok etdilar.

Uchrashuvda 20 nafardan ziyod fuqarolar ishtirok etib, ular tomonidan 10dan ziyod murojaat va takliflar bildirildi. Bildirilgan muammo va takliflarning koʻpchiligini ish bilan taʼminlash masalasida yordam soʻrash boʻlsa, qolganlari tadbirkorlik, elektr energiyasi, tabbiy gaz, suv taʼminoti va boshqa masalalarni oʻzida qamrab oldi.

Sayyor qabulda tuman hokimi Sobir Xoʻjametov soʻzga chiqib, bugungi kunda mamalakatimizda barcha sohalarda amalga oshirilayotgan islohotlar tub negizida inson manfaatlari yotgani, aholini uzoq yillar mobaynida qiynab kelayotgan muammolarni joylarga chiqib oʻrganish hamda ularga barham berish borasida davlatimiz rahbari tomonidan yangi ustuvor vazifalar belgilab berilgani hamda ularning ijrosini taʼminlashga tumanimizda ham alohida eʼtibor qaratilayotgani xususida batafsil gapirdi.

Uchrashuvda fuqarolarning ayrim murojaatlari shu yerning oʻzida hal etildi. Xususan, bandlik masalasida murojaat qilgan yoshlarga ishga joylashtirish boʻyicha uchrashuvning oʻzidayoq yoʻllanmalar berildi.

Tuman Xalq qabulxonasi boʻlimi boshligʻi Erkin Rajabov bugungi kunda aholi turmush farovonligini yaxshilash yoʻlida qabul qilinayotgan qaror va farmonlarning mazmum-mohiyati haqida toʻxtalib oʻtdi.

Shuningdek, yoshlarga oʻz yoʻllarini topishlari uchun barcha sharoitlar yaratib berish eng asosiy vazifa ekanligini taʼkidlab, bu borada amalga oshirilayotgan ishlarga keng toʻxtaldi.

Uchrashuvda mutasaddi tashkilotlar xodimlari tomonidan ayrim fuqarolarning murojaati boʻyicha tushuntirish berilgan boʻlsa, qolgan masalalarni hal qilish boʻyicha chora-tadbirlar belgilab olindi. Ijrosi maʼlum muddat talab etadigan murojaatlarni imkon qadar ijobiy hal etish yuzasidan tegishli masʼullarga topshiriqlar berilib, aholi muammolari bilan ishlashda samarali tizim hisoblangan “Temir daftar”, “Ayollar daftari” va “Yoshlar daftari”ga kiritilgan oilalar, fuqarolar bilan manzilli va natijali ishlash boʻyicha masʼullarga tegishli topshiriqlar hamda tavsiyalar berildi.

Tuman boʻylab oʻtkazilayotgan bu kabi sayyor qabullar davlat organlari va fuqarolar oʻrtasida mustahkam koʻprik boʻlibgina qolmasdan, aholining hukumat rahbarlariga va davlat idoralariga boʻlgan ishochining yanada mustahkamlanishiga sabab boʻlmoqda.

Tuman hokimligi Axborot xizmati