TOShYoP OVULIDA SEKTOR RAHBARINING SAYYoR QABULI OʻTKAZILDI

Aholi murojaatlari bilan ishlash, fuqarolarni tashvishlantirayotgan muammoli masalalarga yechim topish maqsadida Amudaryo tumanining 4-sektori hududidagi Toshyop ovulida sektor rahbarlarining sayyor qabuli oʻtkazildi.

21-dekabr kuni boʻlib oʻtgan ushbu sayyor qabulda Qoraqalpogʻiston Respublikasi Davlat Soliq boshqarmasi boshligʻi oʻrinbosari Umirbek Aliyev, 4-sektor rahbari, tuman Davlat Soliq inspektsiyasi boshligʻi Jahongir Rahimov hamda mutasaddi tashkilotlar va muassasalar masʼullari qatnashishdi. Shuningdek, fuqarolar yigʻini masʼullari, koʻchaboshchilar va ovul faollari ham ishtirok etishdi.

Taʼkidlash lozimki, 4-sektor masʼullari tomonidan sayyor uchrashuvlarda fuqarolarning har bir murojaatiga individual yondashuv yoʻlga qoʻyilgan boʻlib, ularni tezkorlik bilan, sifatli hal etilishiga alohida eʼtibor qaratilmoqda. Shuningdek, hududda yashovchi fuqarolar taqdiriga befarq qaramasdan, ularning yashash sharoitlarini yaxshilash, joylarda aholi bandligini taʼminlash maqsadida tadbirkorlikni rivojlantirish dolzarb vazifalardan sanalmoqda.

Qabulda dastlab sektor hududida birinchi navbatda mahallalarda yashovchi kam taʼminlangan, himoyaga muhtoj, yakka-yolgʻiz, notinch, ichki ishlar idoralarida profilaktik hisobda turgan voyaga yetmaganlar, aʼzolari ishsiz, uyushmagan yoshlar mavjud boʻlgan, shuningdek, chin yetimlarga, uy-joy bilan taʼminlashga muhtoj boʻlgan oilalarning turmush sharoitlarini keng va atroflicha oʻrganishga astoydil harakat qilinayotgani taʼkidlab oʻtildi. Ushbu oilalarning roʻyxatlari sektor hududidagi har bir mahalla fuqarolar yigʻinlari kengashlari tomonidan shakllantirilib va muntazam ravishda yangilanib borilayotgani eʼtirof etildi. Shuningdek, huquqni muhofaza qilish, mahalla fuqarolar yigʻinlarining Yarashtirish komissiyalariga ajralish masalasini koʻrib chiqish uchun ariza bergan oilalardagi muhit, shart-sharoitlar, sabablar alohida, keng va atroflicha oʻrganilayotgani hamda ularning ajralib ketmasliklari uchun amaldagi qonunlar doirasida zarur yoʻl-yoʻriqlar koʻrsatilayotgani toʻgʻrisida batafsil maʼlumotlar berildi.

Shundan soʻng, qabulga kelgan fuqarolarning murojaatlari tinglandi. Qabul davomida hudud fuqarolaridan 14 ta murojaatlar kelib tushdi. Ushbu murojaatlarning 3 tasi oliy oʻquv yurtlarida tahsil olayotgan farzandlarining kontrakt pullarini toʻlab berish masalasida, 1 tasi elektr tarmogʻiga uyini ulab berish masalasida, 1 tasi esa tibbiy yordam koʻrsatish masalasida boʻldi.

Undan tashqari, Toshyop ovuli hududidagi “Billur” koʻchasini kengaytirish, koʻmir bilan taʼminlash, ovuldagi qabristonni obodonlashtirish, “Yetti avlon” koʻchasiga tosh-shagʻal toʻshash, ushbu koʻchadagi osilib yotgan elektr simlarini tortish, aholiga tozalangan ichimlik suvini yetkazib berish kabi masalalar yuzaidan ham murojaatlar qabul qilindi. Ushbu murojaatlarning 3 tasi joyida qanoatlantirildi, 1 tasiga asosli tushunchalar berildi. Qolgan 10 ta murojaatlar tegishliligi boʻyicha idora va tashkilotlarga yuborilib, ijrosi nazoratga olindi.

Qabulda ishtirok etgan Qoraqalpogʻiston Respublikasi Davlat Soliq boshqarmasi boshligʻi oʻrinbosari Umirbek Aliyev aholining turmush tarzini yaxshilash borasida fuqarolarni tadbirkorlikka keng jalb qilish, buning uchun kreditlar olishlariga koʻmaklashish boʻyicha kerakli tavsiyalar berib oʻtdi. Shuningdek, 4-sektor rahbari tuman Davlat Soliq inspektsiyasi boshligʻi Jahongir Rahimov soʻzga chiqib, bugungi kunda tadbirkorlik uchun yaratilgan imkoniyatlar toʻgʻrisida soʻz yuritdi.

Ovul fuqarolari ham masʼul rahbarlarga oʻzlarini qiziqtirgan savollarini berib, yetarlicha maʼlumotlarga ega boʻlishdi.

O.Xudoyberganova.