Xalq deputatlari Amudaryo tuman Kengashining 68-sessiyasi toʻgʻrisida axborot

2023-yil 27-dekabr kuni Amudaryo tumani hokimligining majlislar zalida Xalq deputatlari tuman Kengashining navbatdagi – 68-sessiyasi boʻlib oʻtdi.

Sessiyani Xalq deputatlari tuman Kengashi raisining oʻrinbosari Gʻulomjon Yeshniyozov ochdi va olib bordi.

Sessiya kotibligiga 5-Beruniy saylov okrugidan deputat Nilufar Davletova saylandi.

Sessiyada tuman hokimi, sektorlar rahbarlari, deputatlar, hokim oʻrinbosarlari, hokimlik masʼul xodimlari, boʻlimlar, tashkilotlar rahbarlari, ovul va mahalla fuqarolar yigʻinlari masʼullari hamda ommaviy axborot vositalari vakillari ishtirok etdi.

Sessiyada dastlab Amudaryo tumanini ishsizlikdan holi xududga aylantirish hamda tumanni ijtimoiy-iqtisodiy rivojlantirish boʻyicha tuman hokimi birinchi oʻrinbosari Kamiljon Aytbayevning hisoboti tinglandi.

Hisobotda bugungi kunda tumanda 49ta ovul va mahallalarda yashovchi aholi soni 211,1 ming nafarni, xonadonlar soni 38 ming, undagi oilalar soni esa 56,3 mingtani tashkil qilishini, iqtisodiy faol aholi esa 82 ming 626 nafar boʻlib, rasmiy va norasmiy sektorda bandlar 75 ming 694 nafarni, ishsizlar soni 6 ming 932 nafarni, bitiruvchilar esa 14 ming 509 nafarni tashkil qilishini aytib oʻtildi.

Shuningdek, hokim oʻrinbosari tumanni ishsizlikdan holi xududga aylantirish boʻyicha amalga oshirilgan ishlar va kelgusidagi rejalarga ham toʻxtaldi. Xususan, tumandagi ishsizlikdan kelib chiqib, mavjud imkoniyat va rezervlarni safarbar qilgan holda kelgusi yilda 8 ming 140ta doimiy, 8 ming 646ta mavsumiy hamda 4 ming 397ta vaqtinchalik, jami 21 ming 683ta ish oʻrinlarini yaratish belgilangan.

Sessiyada tuman hokimi oʻrinbosari, Oila va xotin-qizlar boʻlimi boshligʻi Goʻzal Soburova 4-bosqich “Ayollar daftari”ga kiritilgan xotin-qizlarga koʻrsatilgan yordamlar hamda amalga oshirilgan ishlar toʻgʻrisida hisobot berdi.

Hisobotda taʼkidlanganidek, tumanda 4-bosqich “Ayollar daftari”ga jami 5 ming 398 nafar xotin-qizlar kiritilgan. Shundan, ijtimoiy himoyaga muhtoj ishsiz xotin-qizlar 1 ming 943 nafarni, tadbirkorlik qilish istagini bildirgan ehtiyojmand xotin-qizlar 685 nafarni, boquvchisini yoʻqotgan ehtiyojmand xotin-qizlar 1 ming 183 nafarni, ijtimoiy yordamga muhtoj, I va II guruh nogironligi boʻlgan va tibbiy muolajaga muhtoj ehtiyojmand xotin-qizlar 911nafarni tashkil qiladi. Uy-joyga muhtoj xotin-qizlar 30 nafar, qaramogʻida nogironligi boʻlgan farzandlari mavjud ehtiyojmand xotin-qizlar soni esa 646 nafarni tashkil qiladi.

Shu kungacha 4-bosqich “Ayollar daftari”ga kiritilgan 5 ming 398 nafar xotin-qizlarning 5 ming 330 nafariga yordamlar koʻrsatilgan.

Sessiya ishida tuman Mahalliy byudjetning 2024-yilgi asosiy koʻrsatgichlari toʻgʻrisida tuman Moliya boʻlimi boshligʻi Javlonbek Jumamuratov hisobot berdi. Hisobotda 2024-yil uchun tuman Mahalliy byudjetning daromadlari 73,3 mlrd. soʻm, yuqori byudjetdan ajratiladigan transfert miqdori 151,6 mlrd. soʻm, jami xarajatlari 224,9 mlrd. soʻm miqdorida prognoz qilinayotgani qayd etilib, kelgusi yilda koʻzda tutilgan daromadlar va xarajatlar haqida batafsil maʼlumotlar berildi.

Sessiyada Amudaryo tumani Soliq inspektsiyasi boshligʻi Jahongir Rahimov Amudaryo tumanida 2023-yil davomida byudjetga tushumlarni taʼminlash boʻyicha amalga oshirilgan ishlar va 2024-yil byudjeti rejasi tugʻrisida hisobot berdi. Hisobotda byudjet daromadlariga 2023-yil uchun belgilangan 91,1 mlrd. soʻm prognoz koʻrsatkichi yil yakuni bilan 100,2 mlrd. soʻmga, yaʼni (110 foizga) bajarilib, byudjetga anqlangan qoʻshimcha manbalar hisobodan 9,1 mlrd. soʻm undirilgani, byudjetga tushumlar 2022-yilga taqqoslaganda 118,8 foizga, yaʼni 15,9 mlrd. soʻmga oʻsishi taʼminlangani qayd etildi.

Shundan soʻng sessiyada tuman Xalq qabulxonasi mudiri Erkin Rajabov aholidan kelib tushayotgan murojaatlarni tahlil qilgan holda, hokim yordamchilari faoliyatining natijadorligini oʻrganish yakunlari toʻgʻrisidagi masala yuzasidan axborot berdi.

Axborotda taʼkidlanganidek, Oʻzbekiston Respublikasi Prezidentining Virtual qabulxonasiga joriy yil boshidan 1-dekabr sanasiga qadar tuman aholisi tomonidan jami 4 ming 253ta masalalar boʻyicha murojaatlar kelib tushgan. Shundan 3 ming 230tasi qanoatlantirilgan, 1 ming 705tasi ijobiy hal qilingan. Axborotda hokim yordamchilari faoliyatining natijadorligini oʻrganish yakunlari boʻyicha ham batafsil maʼlumot berildi.

Sessiya soʻngida tuman hokimi Sobir Xoʻjametov soʻzga chiqib, deputatlar va barcha tuman faollarini Yangi yil bayrami bilan tabrikladi hamda tumanni ijtimoiy-iqtisodiy rivojlantirishga qoʻshayotgan hissalari uchun minnatdorchilik bildirib, barchani xalq farovonligi, davlat rivoji hamda jamiyat taraqqiyoti yoʻlida hamjihatlik bilan fidokorona mehnat qilishga chorladi.

Sessiyada Kengash vakolatiga kiruvchi boshqa masalalar ham muhokama qilindi.

Kun tartibidagi barcha masalalar atroflicha koʻrib chiqilib, tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.

Tuman hokimligi Axborot xizmati