“KITOBLAR KARVONI” TADBIRI OʻTKAZILDI

Prezidentimiz Shavkat Mirziyoyev: “Dunyodagi har qaysi davlat, har qaysi xalq birinchi navbatda oʻzining intellektual salohiyati, yuksak maʼnaviyati bilan qudratlidir. Bunday yengilmas kuch manbai esa avvalo insoniyat tafakkurining buyuk kashfiyoti – kitob va kutubxonalarda”, deya taʼkidlagan edi. Haqiqatan ham, qaysi davlatning maʼnaviy salohiyati kuchli boʻlsa, maʼnan yengilmas kuchga ega boʻladi. Shu boisdan ham bugungi kunda yurtimizda yoshlarni maʼnaviyat va bilim sarchashmasi boʻlgan kitob oʻqishga jalb qilishga eʼtibor kuchaymoqda.

Shuni alohida taʼkidlash joizki, maʼlumot olish mumkin boʻlgan hech qanday zamonaviy vosita kitobning oʻrnini bosa olmaydi.

Yoshlar kitobdan koʻra telefon, internet, ijtimoiy tarmoqlarga koʻproq vaqt ajratayotgan bugungidek tezkor davrda ularga kitob mutolaasining afzalligini tushuntirish, kitob oʻqishga ragʻbatlantirish juda muhim vazifa.

Shu maqsadda 20-yanvar kuni Amudaryo tumanining 4-sektori hududidagi 5-sonli maktabda “Taraqqiyot koʻzgusi” gazetasi tahririyati tomonidan “Kitoblar karvoni” tadbiri oʻtkazildi. Tadbirda mazkur maktabning yuqori sinflari oʻquvchilari ishtirok etdilar.

“Taraqqiyot koʻzgusi” gazetasi tahririyati amalga oshirayotgan “Bilimli va maʼnaviyatli yoshlar bilan – Uchinchi Renessans sari” nomli grant loyihasi ish rejasiga muvofiq maktab kompyuter sinfxonasida maʼnaviy-maʼrifiy ishlar boʻyicha direktor oʻrinbosari Oʻmirboy Bobotoyev bilan hamkorlikda oʻtkazilgan “Kitoblar karvoni” tadbirida oʻquvchilar hozirgi davr shoir, yozuvchilari asarlari, chet el adabiyoti va mumtoz adabiyotimiz namunalari bilan batafsil tanishtirildi.

Hozirgi zamon ruhshunoslari aniqlashicha, oʻquvchi-yoshlar aholining boʻsh vaqti eng koʻp qatlami hisoblanar ekan. Bunday davrda ularning boʻsh vaqtlarining behuda oʻtishiga yoʻl qoʻymay, oilada, maktabda kitob mutolaasining ahamiyati keng tushuntirilsa, yoshi, didiga mos kitoblar bilan taʼminlansa, nur ustiga aʼlo nur boʻladi. Chunki kitobxonlik oiladagi, taʼlim muassasasidagi, yon-atrofdagi muhitga ham bogʻliq. Aytish mumkinki, yoshlarni kitob mutolaasiga qiziqtirish – keng miqyosli vazifa.

Kitobga eʼtibor – farzand tarbiyasida muhim rol oʻynaydi. Kitobni inson tafakkurining qanotlariga oʻxshatishgani bejiz emas. Zero tafakkuri, fikr doirasi keng, maʼrifatli kishilar jamiyatning chinakam boyligidir.

Bu haqda “Kitoblar karvoni” tadbirida loyiha koordinatori Oygul Rajabova oʻquvchilarga batafsil tushunchalar berdi, oʻquvchilarning qanday badiiy asarlar oʻqiyotgani, oʻqigan kitoblaridan olgan taassurotlari bilan qiziqdi. Mavzu doirasida oʻquvchilarni qiziqtirgan savollarga atroflicha javoblar berildi.

Tadbir oʻquvchilarning kitob oʻqishga qiziqishlari oshishiga xizmat qilgani bilan ahamiyatli boʻldi.

Sevara ISMOILOVA.