TRANSPORT YOʻLLARIDA HARAKAT XAVFSIZLIGINI TAʼMINLASh BOʻYIChA REYD TADBIRLARI OʻTKAZILDI

Amudaryo tumani hududidagi avtotransport yoʻllarida harakat xavfsizligini taʼminlash, ogʻir oqibatli hodisalar sodir etilishining oldini olish maqsadida yoʻl-patrul xizmati xodimlari tomonidan muntazam ravishda reyd tadbirlari oʻtkazib kelinmoqda.

21-yanvar kuni boʻlib oʻtgan navbatdagi tadbirlarda tuman Ichki ishlar boʻlimi yoʻl-patrul xizmati boʻlinmasining 13 nafar xodimlari ishtirok etishdi va tadbir davomida 100dan ziyod qoidabuzarliklar aniqlandi.

Undan tashqari, reyd paytida 80 ta avtomashinalar qoʻpol qoidabuzarliklar sodir etganligi sababli Oʻzbekiston Respublikasi Maʼmuriy javobgarlik toʻgʻrisidagi Kodeksining tegishli moddasiga asosan jarima maydonlariga qoʻyildi. Shundan avtotransport vositasini mast holatda boshqarib yurganlikda gumon qilingan 3 nafar fuqaro belgilangan tartibda tibbiy tekshiruvdan oʻtkazildi va ularga nisbatan maʼmuriy bayonnomalar rasmiylashtirildi. Shuningdek, 10 nafar fuqaro muddatidan oʻtgan qarzdorliklarni toʻlamasdan yurganligi aniqlandi va jarimalar toʻligʻicha undirib olindi. Avto va mototransport vositalarini boshqarish paytida Oʻzbekiston Respublikasi Maʼmuriy javobgarlik toʻgʻrisidagi Kodeksining turli moddalarida koʻrsatilgan qoidabuzarliklarni sodir etgan 67 nafar fuqarolarga ham tegishli tartibda jazo choralari qoʻllanildi.

Taʼkidlash joizki, soʻnggi yillarda mamlakatimizda yoʻl harakati xavfsizligi sohasida mavjud muammolarni bartaraf etish, xalqaro standartlarga muvofiq yoʻl-transport infratuzilmasini yaxshilash, avtomobil yoʻllarini rekonstruktsiya qilish, yoʻl harakati qulayligi va xavfsizligini oshirishga alohida eʼtibor qaratilmoqda. Bu borada Davlatimiz rahbarining bir qator Farmon va Qarorlari bilan yoʻl infratuzilmasini kompleks takomillashtirish yoʻnalishi boʻyicha yangi vazifalar va chora-tadbirlar belgilanib, qator ishlar amalga oshirilmoqda.

Bugungi kunda tuman hududidagi yoʻllarda ham harakat xavfsizligini taʼminlash, yoʻl-transport hodisalarining oldini olish, ayniqsa, piyodalar va voyaga yetmagan shaxslar ishtirokida qoidabuzarliklar sodir qilinish ehtimoli yuqori boʻlgan joylarda haydovchilarning hushyorligini oshirish maqsadida shahar markazidagi yoʻl belgilari taʼmirlanib, yangi yoʻl belgilari oʻrnatilmoqda.

Prezidentimizning 2022-yil 12-iyuldagi 2022—2026-yillarga moʻljallangan “Xavfsiz va ravon yoʻl” umummilliy dasturini tasdiqlash toʻgʻrisida”gi Qarori ijrosini taʼminlash maqsadida oʻtgan davr mobaynida qator avtotransport yoʻllarida yangi yoʻl belgilari oʻrnatilib, yaroqsiz holga kelganlari almashtirildi. Maktablar oldiga tezlikni cheklovchi yoʻl belgilari oʻrnatildi, yoʻl yotiq chiziqlari chizildi, aholi yashash joylaridan oʻtuvchi yoʻllar chetiga tungi yoritgichlar oʻrnatilib, piyodalar uchun yoʻlaklar qurildi.

Reyd tadbirlari davomida yoʻl harakati xavfsizligini taʼminlash sohasini “Shahar avtomobillar emas, balki piyodalar uchun” gʻoyasi asosida isloh qilish maqsadida tuman markazida ham transport vositalari harakatlanishining eng yuqori tezligi soatiga 70 kilometrdan 60 kilometrgacha tushirilgani, qoidabuzarliklar turlari va ularga nisbatan qoʻllaniladigan jazo turlari, belgilangan jarimalar miqdorlari haqida ham maʼlumotlar, tushunchalar berildi. Bunday tadbirlar jamoat xavfsizligini taʼminlash bilan birga turli koʻngilsiz hodisalar sodir etilishining oldini olishda muhim ahamiyat kasb etadi.

Reyd tadbirlarida tushuntirilganidek, har bir fuqaro, haydovchi yoki piyoda boʻlishidan qatʼiy nazar, harakatlanayotgan paytida belgilangan yoʻl qoidalariga amal qilsa, qoidabuzarliklar, inson hayotini xavf ostida qoldiruvchi halokatlar sodir boʻlmaydi.

O.Xudoyberganova.