TAʼLIM SIFATI VA SAMARADORLIGINI OShIRIShGA QARATILGAN MASALALAR YuZASIDAN YIGʻILISh OʻTKAZILDI

Amudaryo tumani Maktabgacha va maktab taʼlimi boʻlimi tasarrufidagi umumiy oʻrta taʼlim maktablari va maktabgacha taʼlim tashkilotlari direktorlari ishtirokida umumiy yigʻilish tashkil etildi.

2024-yil 7-fevral kuni 38-sonli maktabda boʻlib oʻtgan mazkur yigʻilishda Qoraqalpogʻiston Respublikasi Maktabgacha va maktab taʼlimi vazirligidan Amudaryo tumaniga biriktirilgan masʼul xodimlardan Hamidulla Begdullayev, vazirlikning korruptsiyaga qarshi kurash boʻyicha bosh mutaxassisi Shahzoda Babanazarova, Respublika taʼlim markazi metodistlari Ajiniyaz Jolamanov va  Daut Baxiyatdinovlar hamda tuman Maktab va maktabgacha taʼlim boʻlimining masʼul xodimlari qatnashishdi. Yigʻilishni tuman Maktab va maktabgacha taʼlim boʻlimi boshligʻi Yalgʻash Shomurodov ochib berdi va ishtirokchilarni kun tartibidagi masalalar bilan tanishtirdi.

Kun tartibida Oʻzbekiston Respublikasining “Pedagogning maqomi toʻgʻrisida”gi Qonuni, taʼlim tashkilotlarida korruptsiyaning oldini olish boʻyicha targʻibot-tashviqot ishlari, 2022-2023 oʻquv yilida taʼlim sifatini oshirishga qaratilgan tahliliy yakunlari va 2024-yil oldida turgan vazifalar, yaʼni Fanlar olimpiadasi, kausera, oʻqituvchi va oʻquvchilarning xalqaro va milliy sertifikatlari ulushi, pedagog kadrlar attestatsiyasi, 3-7-yoshli bolalar qamrovi, grant, onlayn sinf kabi masalalar koʻrildi.

Ushbu masalalar yuzasidan masʼullarning maʼruzalari tinglandi. Dastlab Respublika taʼlim markazi metodisti Ajiniyaz Jolamanov Oʻzbekiston Respublikasining “Pedagogning maqomi toʻgʻrisida”gi Qonuni mazmun-mohiyati tushuntirdi va bu boʻyicha tegishli vazifalar, chora-tadbirlar belgilab olindi.

Taʼkidlanganidek, “Pedagogning maqomi toʻgʻrisida”gi Qonun shu yil 1-fevral kuni Prezident tomonidan imzolangan. Mazkur hujjatda pedagogning huquqlari, shaʼni, qadr-qimmati va ishchanlik obroʻsi davlat himoyasi ostida boʻlishi qatʼiy belgilab qoʻyilgan. Qonun bilan pedagoglarning huquq va majburiyatlari, faoliyatining asosiy kafolatlari, mehnatiga yarasha haq toʻlash, ragʻbatlantirish va ijtimoiy himoya qilish tamoyillari ham belgilangan. Shuningdek, Qonunga koʻra pedagogni kasbiy faoliyati bilan bogʻliq boʻlmagan ishlarga, hududlarni obodonlashtirishga, qishloq xoʻjaligi ishlariga jalb qilish taʼqiqlanadi. Pedagogdan uning kasbiy majburiyatlariga taalluqli boʻlmagan hisobotlarni va boshqa maʼlumotlarni, jumladan, bitiruvchilarning bandligi taʼminlangani haqidagi hisobotlarni shakllantirishini va taqdim etishini talab qilish man etiladi.

Yigʻilish davomida vazirlikning korruptsiyaga qarshi kura boʻyicha bosh mutaxassisi Shahzoda Babanazarova tuman hududidagi taʼlim tashkilotlarida korruptsiyaning oldini olish boʻyicha amalga oshirilgan targʻibot-tashviqot ishlari xususida toʻxtaldi. U oʻz soʻzida Oʻzbekiston Respublikasining 2017-yil 3-yanvardagi  “Korruptsiyaga qarshi kurash toʻgʻrisida”gi Qonuniga qatʼiy amal qilish kerakligini eʼtirof etib, korruptsiyaga oid huquqbuzarlik – korruptsiya alomatlariga ega boʻlgan, sodir etilganligi uchun qonunchilikda javobgarlik nazarda tutilgan qilmish ekanligi toʻgʻrisida yigʻilish ishtirokchilariga keng maʼlumotlar berdi.

Kun tartibidagi navbatdagi masala boʻyicha Yalgʻash Shomurodov soʻzga chiqib, 2023-2024 oʻquv yilida asosiy Fanlar olimpiadasining Qoraqalpogʻiston Respublikasi bosqichida 7 nafar oʻquvchi faxrli oʻrinni, respublikada yetakchi oʻrinni egallagani, xalq taʼlimi tizimida mehnat faoliyatini amalga oshirayotgan va oʻquvchilari yuqori natijalarga erishgan, oʻz ustida doimiy ishlaydigan, oʻqitish uslubiga ega malakali pedagog kadrlardan 7 nafariga belgilangan tartibda mehnatga haq toʻlashning eng kam miqdorining 5,5 baravari miqdorida ustama toʻlanayotgani ham tilga olib oʻtildi. Shuningdek, ayrim maktablarning oʻquvchilari fanlar olimpiadasining tuman bosqichida 4-yil davomida sovrindor boʻla olmagani, buning sabablari ham muhokama etildi.

Yigʻilish davomida tuman MMTB boshligʻi Yalgʻash Shomurodov xorijiy til fani oʻqituvchilari 2024/2025 oʻquv yiliga qadar V2 darajadagi sertifikatlarga ega boʻlish lozimligini, shunga harakat qilishi kerakligini eslatdi. Shuningdek, maktab oʻquvchilari ham ingliz tilidan kamida V2 sertifikat olishlari, bu borada 40-maktab yetakchi ekanligi alohida taʼkidladi.

Maʼlumki, Vazirlar Mahkamasining “Xorijiy tillarni oʻrganishni samarali tashkil etish chora-tadbirlari toʻgʻrisida” 2021-yil 19-maydagi 312-son qaroriga muvofiq 2024/2025 oʻquv yiliga qadar umumiy oʻrta, oʻrta maxsus va professional taʼlim muassasalarida faoliyat yuritayotgan barcha xorijiy tillar oʻqituvchilari kamida V2 darajadagi milliy yoki unga tenglashtirilgan mos darajadagi xalqaro sertifikatga ega boʻlishi lozimligi belgilangan. Shu sababli Maktabgacha va maktab taʼlimi vazirligi barcha xorijiy til oʻqituvchilariga 2024/2025 oʻquv yiliga qadar kamida V2 darajadagi milliy yoki xalqaro sertifikatlarga ega boʻlishi lozim.

Yigʻilishda taʼlimdagi samaradorlikni yanada oshirish, pedagoglarning oʻz ustida ishlashlariga eʼtibor qaratish va imkoniyat yaratish, maktablardagi shart-sharoitlarni yanada yaxshilash borasida tegishli chora-tadbirlar, vazifalar belgilab olindi.

Ozoda Xudoyberganova