Afgʻon urushi faxriylari uchun bayram tadbiri tashkil etildi

15-fevral – Sovet qoʻshinlari Afgʻonistondan olib chiqilganiga 35-yil toʻldi. Har yili ushbu sana arafasida butun mamlakatimiz boʻylab joylarda uchrashuvlar, davra suhbatlari, xotira tadbirlari, bayram tantanalari muntazam ravishda tashkil etilib, keng miqyosda nishonlanadi.

 Ushbu sana munosabati bilan tumanimizda amudaryolik baynalmilal afgʻonchi-jangchilarning uchrashuvlari, bayram tadbirlari tashkil etildi. Tumanimizdagi afgʻon urushi qatnashuvchilari Xotira maydonida “Motamsaro ona” haykali poyiga gulchambarlar qoʻydilar. Muzey faoliyati bilan tanishish mobaynida afgʻonchi jangchilar bugungi dorilomon kunlarga shukronalik keltirdilar.

Shundan soʻng tuman hokimligi tashabbusi bilan urush faxriylari uchun “Sher” toʻyxonasida ajoyib bayram tadbiri tashkil etildi. Bayram tadbirida tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodir Kamolov, tuman “Inson” ijtimoiy xizmatlar markazi boshligʻi Gʻulomjon Duysenboyev, tuman Mudofaa ishlari boʻyicha boʻlim boshligʻi Sherzod Murodov hamda Qoraqalpogʻiston Respublikasi faxriy baynalmilal jangchilar uyushmasining tuman boʻlimi ruhbari Bahodir Jumaniyozov boshchiligidagi bir guruh faxriy jangchilar ishtirok etdilar.

Bayram tadbirini tuman hokimi oʻrinbosari Nodir Kamolov ochib berdi. Nodir Kamolov oʻz soʻzida Afgʻonistonda chorak asrcha davom etgan oʻzaro urushlarga barham berish uchun sobiq ittifoq armiyasi safida safarbar qilingan, murakkab sharoitlarda jang-u jadallarda qatnashib, omon qaytgan faxriylar uchun 15-fevral – sobiq ittifoq qoʻshinlari olib chiqib ketilgan sana chinakkam bayram ekanligini taʼkidladi hamda ularni bayram bilan tabrikladi. Sana munosabati bilan har yili mamlakatimizda turli tadbirlar oʻtkazilib, sobiq afgʻonchilarga alohida hurmat-eʼtibor koʻrsatilayotganini qayd etib oʻtdi.

Tadbirda soʻzga chiqqanlar, mamlakatimizda yoshlarni vatanparvarlik ruhida tarbiyalash, yurtimizdagi tinchlik-osoyishtalikni qadrlash, jangchi-fahriylarni qoʻllab-quvvatlash va halok boʻlgan vatandoshlarimizning xotirasini abadiylashtirishga katta eʼtibor qaratilayotganini, Afgʻon urushida halok boʻlgan faxriylarni xotirlash har birimizning insoniy burchimiz ekanligini alohida taʼkidladilar.

Maʼlumotlarga koʻra, Afgʻon urushida 65 ming nafar Oʻzbekiston fuqarolari qatnashib, 1500 nafardan koʻprogʻi halok boʻlgan. Amudaryo tumanidan harbiy harakatlarda ishtirok qilgan fuqarolarning 13 nafari janglarda halok boʻlgan, 278 nafari esa bugungi kunda tinch va osoyishta yurtimizda umrguzaronlik qilmoqda.

Bayram tadbirida Afgʻon urushi faxriylariga tashakkurnomalar hamda esdalik sovgʻalari topshirildi. Shuningdek, tuman Madaniyat boʻlimi tomonidan kontsert dasturi namoyish etildi. Bir-biridan ajoyib Vatan, ona, tinchlik, shukronalik haqidagi shoʻx-shodon kuy-qoʻshiqlar faxriylarimizga koʻtarinki bayramona kayfiyat begʻishladi.

Tadbir soʻngida Afgʻon urushi faxriylari barcha tadbir tashkilotchilarga, “Sher” toʻyxonasi rahbariyatiga oʻz minnatdorchiliklarini bildirdilar.

Charos Arslonova, tuman hokimligining Axborot xizmati rahbari.