AMUDARYo AXBOROT-KUTUBXONA MARKAZIDA MAKTAB KUTUBXONAChILARI UChUN AMALIY-OʻQUV SEMINARI OʻTKAZILDI

Yoshlar kitobxonligini rivojlantirish, mahallalarda va oilalarda ijtimoiy-maʼnaviy muhit barqarorligini taʼminlashda maktab kutubxonalari muhim ahamiyat kasb etadi. Chunki kitobxon yoshlarning asosiy qismi umumtaʼlim maktablarining oʻquvchi-yoshlaridir. Ularning yosh toifalariga monand ravishda adabiyotlarni tanlashlari va qaysi kitoblarni oʻqishlari uchun zarur tavsiyalar berish esa maktab kutubxonachisining bilim va salohiyatiga bogʻliq.

Bu borada Amudaryo tumani Axborot-kutubxona markazi xodimlarining umumtaʼlim maktablari kutubxonachilari bilan hamkorlikdagi saʼy-harakatlari oʻzining ijobiy samarasini bermoqda.

Xususan, Axborot-kutubxona xodimlari tomonidan tashkil etilayotgan davra suhbatlari, kutubxonachilar kasbiy mahoratini oshirishga qaratilgan ilmiy-amaliy oʻquv seminarlari, koʻchma kutubxona shaklidagi tadbirlarga umumtaʼlim maktablarining kutubxonachilari keng qamrab olinayotgani maktab kutubxonalari faoliyatini jonlantirish, kitobxon yoshlar bilan ishlashishdagi mavjud imkoniyatlardan unumli foydalanish barobarida ayrim muammolarni bartaraf etish imkonini bermoqda.

Axborot-kutubxona markazida 42-, 16-, 36-, 56-, 55-sonli umumtaʼlim maktablari kutubxonachilari bilan hamkorlikda oʻtkazilgan “Kitobxonlarga axborot-bibliografiya xizmati koʻrsatish, fondlarni toʻldirish, saqlash va kitoblarga qayta ishlov berish” mavzusidagi amaliy-oʻquv seminarida ham kutubxonachilarning kasbiy mahoratini yanada oshirish, yoshlarni kitobxonlikka jalb etish, hujjatlar bilan ishlashdagi muammolarni bartaraf etish borasida oʻzaro tajriba almashuvlar amalga oshirildi.

Amaliy-oʻquv seminarida Amudaryo Axborot-kutubxona markazining axborot-bibliografiya xizmati rahbari Rohatoy Ramanova yoshlarni kitobxonlikka keng jalb etishning yangicha usullari, sohaga oid meʼyoriy hujjatlar bilan ishlashni tashkil qilish yoʻl-yoʻriqlari xususida soʻz yuritib, yangiliklarni sohaga keng joriy etish boʻyicha batafsil maʼlumotlar berdi. Shu bilan birga, Rohatoy Ramanova bibliografiq yozuvlar hamda kartotekalar tuzish borasidagi oʻz bilim va tajribalarini maktab kutubxonachilari bilan boʻlishdi.

Shundan soʻng, Axborot-kutubxona markazining fondlarni toʻldirish, saqlash va ularga qayta ishlov berish xizmati mutaxassisi Iroda Saʼdullayeva yangi kelgan adabiyotlarni tizimga olish, ishlov berish hamda qayta ishlash, abonentlar va foydalanuvchilarga xizmat koʻrsatish xizmati mutaxassisi Munojot Safarboyeva foydalanuvchilar bilan ishlash va elektron kundalik tuzish haqida kerakli maʼlumot va tavsiyalar berdilar.

Amaliy-oʻquv seminari davomida umumtaʼlim maktablari kutubxonachilaridan Guliston Chorshamova, Muyassar Madrahimova, Mehribon Xolmurodova, Muborak Yoʻldosheva, Nazokat Saʼdullayeva, Inobat Indirovalar oʻzlari faoliyat yuritayotgan maktablar kutubxonalarida amalga oshirayotgan ishlari, yoshlar kitobxonligini rivojlantirish borasidagi tajribalari bilan oʻrtoqlashdilar.

Boʻlib oʻtgan amaliy-oʻquv seminari maktab kutubxonachilarining kitobxon yoshlar bilan ishlash borasidagi bilim va tajribalarini yanada mustahkamladi.

Robiya YOʻLDOShEVA.