«AVTOMOBILSIZ KUN» AKTsIYaSI DOIRASIDA “SALOMATLIK UChUN 5000 QADAM” PIYoDA YuRISh MARAFONI OʻTKAZILDI

Nafaqat mamlakatimizda, balki butun dunyo miqyosida tobora global tus olib borayotgan ekologik boʻhronlar insoniyatni oʻylab ish qilishga, atrof-muhit muhofazasiga jiddiy eʼtibor qaratishga undamoqda. Sababi, bilib-bilmay tabiatga qilingan tajovuzkorona harakatlar tufayli yashil qalqonimiz boʻlgan dov-daraxtlarni, tabiiy butazorlarni ayovsiz kesib, ularning oʻrnida har xil toifadagi qurilishlarni amalga oshirish oqibatida koʻchalar, butun-butun mahallalar hududlarida jazirama issiqdan himoyalovchi soya-salqin joylar keskin kamayib ketdi. Salgina shamol tursa, chang-toʻzon koʻtarilib, havo sifatining buzilishiga sabab boʻlayotgan bu kabi holatlarga barham berish uchun mutaxassislar jiddiy bosh qotirayotgani hech kimga sir emas. Albatta, bu muammoni birdaniga bartaraf etish, musaffo havo muhitini yaratish oson emas. Chunki bir tup nihol oʻsib, Prezidentimiz aytganlariday, “sogʻlom havo – kislorod ishlab chiqarish darajasiga yetgunicha kamida 10-15-yil vaqt kerak boʻladi”.

Xoʻsh, ungacha nima qilish, qanday chora-tadbirlarni amalga oshirish kerak? Buning uchun mamlakatimizda tizimli ravishda amalga oshirilayotgan “Yashil makon” umummilliy harakati doirasidagi koʻchat ekish va ularni sifatli parvarish qilish, yoʻqotilgan yashil qalqon – tabiiy muvozanatni tiklash, atrof-muhitga oqilona munosabatda boʻlish talab etiladi. Bundan tashqari, aholi zich yashaydigan shaharlarda avtomobillarning tigʻiz vaqtlarda harakatlanishini tartibga solish, rivojlangan davlatlar, ayniqsa, Xitoydagi kabi muntazam ravishda avtomobilsiz kun aktsiyalarini tashkil etish orqali atrof-muhitga tarqalayotgan zaharli tutun va gazlarni kamaytirish, havoda chang zarralarining koʻtarilishiga barham berish eng oqilona tadbirlardan biri sanaladi.

Bu borada “Prezidentimizning “Oʻzbekiston – 2030 strategiyasini Yoshlar va biznesni qoʻllab-quvvatlash yilida amalga oshirishga oid davlat dasturi toʻgʻrisida”gi Farmoni barchamiz uchun muhim dasturilamal boʻlib xizmat qiladi. Unga koʻra, 2024-yil 1-martdan boshlab hududlarda chang boʻroni sodir boʻlayotganda va atmosfera havosida mayda dispers zarrachalari belgilangan meʼyordan yuqori boʻlgani aniqlanganda aholini ogohlantirish yoʻlga qoʻyiladi. Shu bilan birga yurak-qon tomir va nafas yoʻllari kasalliklariga chalingan hamda sogʻligi havoning ifloslanishiga taʼsirchanligi yuqori boʻlgan fuqarolarni zarur profilaktik choralar toʻgʻrisida doimiy xabardor qilish amaliyoti joriy etiladi.

Shuningdek, oʻlchami 500 metr kvadrat va undan ortiq boʻlgan qurilish maydonlarida, unga kirib-chiqish yoʻllarida chang va qum zarrachalarining havoga koʻtarilishini bartaraf etish boʻyicha majburiy talablar joriy etiladi. “Avtomobilsiz kun” aktsiyasi, “Salomatlik uchun 5 000 qadam” piyoda yurish marafonlari oʻtkaziladi.

Joriy yilning 24-fevral sanasida Amudaryo tumani sport maktabi, tuman Tibbiyot birlashmasi xodimlari, mahallalarda istiqomat qiluvchi yoshlar, koʻcha boshchi ayol-qizlar ishtirokidagi “Avtomobilsiz kun” aktsiyasi doirasida oʻtkazilgan “Salomatlik uchun 5 000 qadam” piyoda yurish marafoni ham ekologik musaffo havo muhitini yaratish, Mangʻit shahri va mahallalar hududida chang zarralarining atmosfera havosiga koʻtarilishining oldini olish, qolaversa, salomatligida muammolari boʻlgan aholini sogʻlom hayotga qaytarishga qaratilgani bilan muhim ahamiyatga ega boʻldi.

Aktsiya ishtirokchilari hamjihatlikda va yuqori kayfiyatda 5000 qadamdan ziyod masofani piyoda yurib oʻtdilar. Marafon ishtirokchilarining hatti-harakatlarini Qoraqalpogʻiston Respublikasi Ichki ishlar vazirligi Yoʻl harakati xavfsizligi boshqarmasi boshligʻi Salavat Kazbekov, Qoraqalpogʻiston Respublikasi Yoʻl harakati xavfsizligi boshqarmasi katta inspektori Qalbay Muratov va Amudaryo tuman IIB yoʻl harakati xavfsizligi boʻlimi masʼullari kuzatib bordilar.

Piyoda yurish marafoni yakunida marafon ishtirokchilaridan bir guruhi masʼullar tomonidan maʼnaviy ragʻbatlantirildilar.

Robiya Yoʻldosheva.