36-SONLI MAKTABNING BOShLANGʻICh SINF OʻQUVChILARI IShTIROKIDA “MEHRIBONIM ONAM” NOMLI TADBIR OʻTKAZILDI

Bahorning ilk kunlarida boʻlib oʻtadigan Xalqaro xotin-qizlar kuni – goʻzallik va nafislik, onajonlar bayrami sifatida yurtimizda keng nishonlanadi. Ushbu bayramda onalarga, ayollarga va qizlarga samimiy tilaklar aytilib, gullar, sovgʻalar beriladi, bayram xursandchilikda oʻtkaziladi.

Bayram munosabati bilan 36-sonli maktabda ham 1-“A” sinf oʻquvchilari ishtirokida “Mehribonim onam” deb nomlangan tadbir oʻtkazildi. Maktab oʻqituvchi va oʻquvchilari, ota-onalar tashrif buyurgan ushbu tadbirni maʼnaviyat-maʼrifat masalalari boʻyicha direktor oʻrinbosari Vahobjon Davletov ochib berdi va barcha ayol-qizlarni yoshlik va yasharish, goʻzallik timsoli boʻlgan bahorning birinchi kunlarida nishonlanayotgan qutlugʻ bayram bilan tabrikladi. Ushbu goʻzal ayyom butun dunyoda keng nishonlanishini aytib, Sharqning bebaho anʼanalariga mos ravishda yurtimizda mehri daryo onalarimiz, sevimli ahli ayollarimiz, aziz opa-singillarimizning bu bayrami qadimiy urf-odatlarimiz, bahor bayramlari bilan uygʻunlashib, oʻzgacha tarovat kasb etishini taʼkidlab oʻtdi.

Shundan soʻng, bayram tadbirining musiqiy qismini 1-“A” sinf oʻquvchisi Islomjon Abduvosiyev “Qirolicham onam” qoʻshigʻi bilan boshlab berdi. Mohinur Baxtiyorova ijrosidagi “Onajonim” qoʻshigʻi, Marhabo Haytboyevaning lazgi raqsi ham kayfiyatlarni yanada koʻtardi. Shoira Shavkatovaning “Gullola” qoʻshigʻiga, Mohira Azimjonova, Iroda Nurjonova, Oltinoy Charshamboyeva, Diyora Saʼdullayeva, Madina Oʻrinboyeva, Sevinch Bahodirovalar chiroyli raqs tushib, barchaga xushnudlik ulashishdi.

Undan tashqari, Ulugʻbek Abdukarimov va Behruz Yangiboyevlar “Andijon polkasi”ga raqs tushib, tomoshabinlarni juda xursand qilishdi. Nigina Jabborberganova, Behruz Gʻayratovlar ijrosidagi “Aka-singil” qoʻshigʻi ham barchaga nihoyatda manzur boʻldi.

Tadbir davomida sinfdagi barcha oʻquvchilar qatnashib, ona, oʻzbek ayoli, farishta buvijonlar haqida sheʼrlar aytib, fayz kiritishdi.

Maktabning boshlangʻich sinf oʻquvchilari ishtirokida tashkil etilgan “Mehribonim onam” tadbiri juda qiziqarli oʻtdi.

Barno Matsapayeva, 36-sonli maktabning boshlangʻich sinf oʻqituvchisi.