"Kitobsevar millat" shiori ostida IV Respublika kitobxonlik haftaligi boshlandi

Shu haftada mamlakatimiz boʻylab “Kitobsevar millat” shiori ostida IV Respublika kitobxonlik haftaligi oʻtkazilmoqda. 22-aprel kuni Amudaryo tumani axborot-kutubxona markazida mazkur haftalikning ochilish marosimi boʻlib oʻtdi.

Marosimda soʻzga chiqqanlar mamlakatimizda aholi, ayniqsa yoshlarni kitobxonlikka daʼvat qilish uchun berilayotgan eʼtibor va yaratilayotgan sharoitlar haqida batafsil toʻxtalib oʻtdilar. Aytish jokizki, “Kitobsevar millat” shiori ostida oʻtkazilayotgan bu yilgi Respublika kitobxonlik haftaligi doirasida tuman axborot-kutubxona markazi tomonidan ham qiziqarli tadbirlar, uchrashuv kechalari, kitob taqdimotlari oʻtkazilishi rejalashtirilgan. Tadbir tashkilotchilari barcha yurtdoshlarimizni, har bir kitobxonni moʻʼjizalar makoni boʻlmish kutubxonaga tashrif buyurishga chaqirdi.

Chindan ham, kitob oʻqish nafaqat insonning bilim va tafakkurni boyitadi, balki uning dunyoqarashini kengaytiradi va oʻzligini anglashiga yordam beradi. Oʻzbekistonda kitobxonlik madaniyatini rivojlantirish va ommalashtirishga katta eʼtibor berilmoqda, bu esa jamiyatning maʼnaviy taraqqiyotiga ijobiy taʼsir koʻrsatmoqda.

Tadbir davomida mehmonlar – Oybek mahallasi xotin-qizlar faoli Nargiza Xolboyeva, tuman Maʼnaviyat va maʼrifat boʻlimi mutaxassisi Zarifa Soatboyeva, Axborot-kutubxona markazi mutaxassisi Gulasal Qoʻchqorova, tuman Madaniyat boʻlimi xodimi, Oʻzbekiston Milliy tiklanish demokratik partiyasi tuman kengashi raisi, xalq deputatlari tuman kengashi deputati Oybekjon Begimovlar soʻzga chiqib, “Kitobsevar millat” gʻoyasi va butun xalqimizni kitobxonlikka keng jalb qilishning ahamiyati haqida oʻz fikrlarini bildirdilar.

Aytish joizki, yoshlarni kitobxonlikka jalb qilish ularning maʼnaviy va intellektual rivojlanishida muhim rol oʻynaydi. Kitob mutolaasi kelajagimiz egalarining dunyoqarashini kengaytirish, mustaqil fikrlash qobiliyatini shakllantirish va ularni turli yot gʻoyalardan himoya qilishda asosiy omil hisoblanadi. Shu sababli ham mamlakatimizda aholi, xususan yoshlarni kitobxonlikka jalb qilish ishlari davlat siyosati darajasiga koʻtarilgan va bu borada bir qator ijtimoiy va maʼrifiy tashabbuslar amalga oshirilmoqda.

Jumladan, Prezidentimizning beshta muhim tashabbusi doirasida ham yoshlarning kitobxonlikka qiziqishini oshirish va ularning madaniyatini yuksaltirishga qaratilgan chora-tadbirlar belgilangan. Bundan tashqari, davlat organlari va jamoat tashkilotlari tomonidan ham kitobxonlikni rivojlantirishga qaratilgan turli loyihalar amalga oshirilmoqda. Mamlakatimiz boʻylab “Kitobsevar millat” shiori ostida har yili oʻtkazib kelinayotgan Respublika kitobxonlik haftaligi ham bu eʼtiborning yorqin namunasidir.

Qolaversa, Prezidentimizning kitob mahsulotlarini chop etish va tarqatish tizimini rivojlantirish, kitobxonlik madaniyatini oshirish va targʻib qilishga oid farmoyishi bu boradagi saʼy-harakatlarni yanada kuchaytirishga qaratilgani bilan ahamiyatlidir.

Tadbir soʻngida deputat Oybek Begimov tashkilotchilarga minnatdorchilik bildirib, esdalik sovgʻalarini topshirdi. Tadbirda Amudaryo muhandislik texnikumida kutubxonashunoslik mutaxassisligi boʻyicha tahsil olayotgan talabalar faol ishtirok etishdi. “Kitobsevar millat” shiori ostida IV Respublika kitobxonlik haftaligi va mazkur haftalik doirasidagi tadbirlar yurtimizning barcha axborot-kutubxona markazlari va kutubxonalarida davom etmoqda.

Rohatoy Romanova, tuman axborot-kutubxona markazi bibliografi