Xalq deputatlari Amudaryo tuman Kengashining 72-sessiyasi toʻgʻrisida axborot

2024-yil 25-aprel kuni Amudaryo tumani hokimligi binosida Xalq deputatlari tuman Kengashining navbatdagi – 72-sessiyasi boʻlib oʻtdi. Sessiyada tuman hokimi oʻrinbosarlari, hokimlik masʼul xodimlari, boʻlimlar, tashkilotlar rahbarlari hamda ommaviy axborot vositalari vakillari ishtirok etdi.

Sessiyani Xalq deputatlari tuman Kengashi raisining oʻrinbosari Gʻulomjon Yeshniyozov ochdi va olib bordi. Sessiya kotibligiga 2-Chordara saylov okrugidan deputat Muyassar Rahmatullayeva saylandi.

Sessiya kun tartibidagi dastlabki masala yuzasidan tuman hokimining qurilish, kommunikatsiyalar, kommunal xoʻjaligi, ekologiya va obodonlashtirish masalalari boʻyicha oʻrinbosari Bahodir Yernazarov hisobot berdi. Hisobotda “Tashabbusli byudjet”ning joriy yilgi 1-mavsumida ovoz berish yakunlariga koʻra eng koʻp ovoz toʻplagan 12 ta tashabbus gʻolib deb topilib, ushbu tashabbuslarni moliyalashtirish uchun byudjetdan jami 15 mlrd 820 mln soʻm ajratilgani qayd etildi.

Sessiya kun tartibidagi navbatdagi masala yuzasidan tuman hokimining oʻrinbosari – investitsiyalar va tashqi savdo boʻlimi boshligʻi Faxriddin Yusupov hisobot berdi. Hokim oʻrinbosari deputatlarga hududiy investitsiya dasturining bajarilishi, tadbirkorlikni yanada rivojlantirish uchun qabul qilingan Prezident farmonlarining ijrosi hamda xorijiy investitsiyalarni jalb qilish boʻyicha amalga oshirilayotgan ishlar haqida batafsil maʼlumotlar berdi.

Kun tartibidagi navbatdagi masala muhokamasida Oʻzbekiston Respublikasi Prezidentining Amudaryo tumanidagi Xalq qabulxonasi mudiri Anvar Orazbayev hisobot berdi. Hisobotda Xalq qabulxonasi tomonidan sektorlar, davlat organlari va boshqa tashkilotlarning uyma-uy yurish, murojaatlar bilan ishlash, ijtimoiy va boshqa obʼektlarda aniqlangan muammolarni hal qilish borasidagi faoliyatini tizimli oʻrganish boʻyicha 2024-yilning birinchi choragi davomida amalga oshirilgan ishlar tahlil qilindi.

Sessiyada tuman Ichki ishlar boʻlimi boshligʻi Jamaladdin Yusupov Amudaryo tumanida 2024-yilning oʻtgan 3 oyi davomida jinoyatchilik va huquqbuzarliklarning oldini olish hamda ularning profilaktikasini tashkil etish boʻyicha amalga oshirilgan ishlar yuzasidan hisobot berdi. Hisobotda hududlar kesimida jinoyatchilik darajasi tahlil qilinib, kelgusida huquqbuzarliklar va jinoyatchilikning oldini olish boʻyicha takliflar bildirildi.

Deputatlar “2024-yilda tuman aholisini, ijtimoiy soha obʼektlari va iqtisodiyot tarmoqlarini energiya resurslari bilan barqaror taʼminlash toʻgʻrisida”gi masalani ham koʻrib chiqdi. Ushbu masala yuzasidan “Amudaryotumangaz” gaz taʼminoti boʻlimi bosh muhandisi Oybek Madaminov, Amudaryo tumani elektr taʼminoti korxonasi boshligʻi Jasurbek Salayevlar hisobot berdi.

Hisobotlarda masʼullar isteʼmolchilarning tabiiy gaz va elektr energiyasiga boʻlgan talabini uzluksiz taʼminlash, texnologik yoʻqotishlar hajmini kamaytirish, tarmoqlarni taʼmirlash, tejamkor texnologiyalarni joriy qilish, yangi isteʼmolchilarni tarmoqqa ulash boʻyicha 2024-yilga rejalashtirilgan chora-tadbirlar haqida batafsil maʼlumotlar berdi.

Sessiya soʻngida Oʻzbekiston Respublikasi Prezidentining 2024-yil 5-apreldagi “Yoshlarga yer ajratish orqali ularning daromadini oshirish va bandligini taʼminlash, shuningdek, yangi yer maydonlarini oʻzlashtirish chora-tadbirlari toʻgʻrisida”gi Prezident qarori ijrosini taʼminlash maqsadida hokimlik zaxira yer fondi hisobidagi umumiy maydoni 401,6 gektar boʻlgan ekin maydonlarini “e-auksion” elektron platformasiga qoʻyish masalasi muhokama qilindi. Ushbu masala boʻyicha tuman Fermer, dehqon xoʻjaliklari va tomorqa yer egalari kengashi raisi Ilhom Polvonov axborot berdi.

Kun tartibidagi barcha masalalar deputatlar tomonidan muhokama qilinib, xalq deputatlari Amudaryo tuman Kengashining tegishli qarorlari qabul qilindi.

Shuning bilan sessiya oʻz ishini yakunladi.