“Kundaligim – yorugʻ yuzim” nomli tanlov gʻoliblari aniqlandi

Kundalik daftari oʻquvchining yangi bilimlarini qay darajada oʻzlashtirishi, tartibi, xulq-atvori, saranjom-sarishtaligini koʻrsatib turadigan daftardir. U-misoli oyna. Kundalik daftariga qarab uning egasi qanday oʻquvchi ekanini bilsa boʻladi.

Men oʻquv yili boshida oʻzim rahbarlik qiladigan 4-sinf oʻquvchilariga “Kundaligim – yorugʻ yuzim” nomli tanlov eʼlon qilgandim. Tanlov shartlariga koʻra, oʻquvchilar har haftada “aʼlo” baho olishi, kundalik daftarini chiroyli husnihat bilan toʻldirishi hamda namunali xulqqa ega boʻlishlari talab etiladi.

Tanlov eʼlon qilingan kundan boshlab har bir oʻquvchim hafta davomida koʻproq baho olishga “Balli!”, “Barakalla!”, “Ofarin!”, “Ota-onangga rahmat!” kabi ragʻbatlarni yigʻishga va hafta soʻngida gʻoliblikni qoʻlga kiritishga harakat qildi.

Oʻquv yili davomida har haftada eng yaxshi yuritilgan kundaliklarni saralab, gʻoliblarni aniqlab bordik. Oʻquv yili yakunida esa tanlov nihoyasiga yetdi.

Maktab direktorining maʼnaviy-maʼrifiy ishlar boʻyicha oʻrinbosari Asqarboy Matmuratov, boshlangʻich sinflar metodbirlashmasi aʼzosi Dilbar Oʻrazaqova hamda psixolog Zohid Erimbetovlar yordamida har bir oʻquvchining kundaligi koʻrib chiqildi va yakuniy xulosaga kelindi.

Tanlovda eng koʻp baho toʻplagan iqtidorli va namunali oʻquvchi Adolat Toʻraboyeva 1-oʻringa loyiq deb topilgan boʻlsa, chiroyli husnixat va tartib bilan toʻldirilgan kundalik egasi Mahliyo Baxtiyorova 2-oʻrin sohibasi boʻldi. Barchinoy Baxtiyorova esa namunali xulqi va toʻplagan turli ragʻbatlari bilan 3-oʻringa loyiq deb topildi.

Gʻoliblar “Faxriy yorliq”lar bilan taqdirlandi, ularning ota-onalariga esa tashakkurnomalar berildi.

Bu kabi ragʻbat va eʼtibor oʻquvchilarning taʼlim olishga, namunali xulq va chiroyli husnixat sohib va sohibalari boʻlishga intilishlarini yanada oshiradi.

Shahlo Aytboyeva, 75-sonli maktabning boshlangʻich sinf oʻqituvchisi.