IShONCh - MASʼULIYaT DEMAKDIR

Bugungi kunda ilgʻor, ijodkor, isteʼdodli, taʼlim berish jarayonida zamonaviy axborot-kommunikatsiya va pedagogik texnologiyalardan samarali foydalanuvchi, yuksak kasb mahoratiga ega pedagoglar tajribasini ommalashtirish xalq taʼlimi tizimining asosiy vazifalaridandir.

Amalga oshirilayotgan "Dars muqaddas”, "Oʻrgan, oʻrgat”, "Ustoz va shogird maktabi”, "Murakkab fan oʻrganaman”, "Sogʻlom muhit – sogʻlom jamoa”, "Bilimlar bellashuvi”, "Puxta ishlangan reja - samarali natija”, "Mahorat maktabi” kabi tadbirlar ayniqsa oʻqituvchilarning malakasi va kasbiy mahoratini oshirishga yoʻnaltirilgan.

Ushbu innovatsiyalarni maktabda amaliyotga tadbiq etish jarayonida biz taʼlim sifatini oshirishga oid takliflarni jamlash, oʻqituvchilarning ehtiyojlarini oʻrganish va taʼlim mazmunidagi yangiliklar hamda dars berish metodikasiga doir soʻnggi yutuqlarni oʻzlashtirish imkoniyatiga ega boʻlmoqdamiz. Chunki dars jarayonida eskicha usullardan voz kechib, zamonaviy uslub va vositalarni qoʻllay biladigan, salohiyatli, oʻz fanini puxta biladigan mahoratli oʻqituvchilargina shogirdlarini hozirgi tezkor va shiddat bilan rivojlanayotgan davrda oʻz oʻrnini topa oladigan, mustaqil fikrga ega, intellektual salohiyatli qilib tarbiyalay oladi.

Mamlakatimizda bolalarga taʼlim-tarbiya berish davr talablaridan kelib chiqqan holda tashkil etilgani bois, oʻquvchilarimiz turli koʻrik-tanlovlarda, bilimlar bellashuvi va fanlar olimpiadalarida yuqori oʻrinlarni egallab kelishmoqda.

Oʻquvchilar qalbida oʻz tugʻilgan makoniga, Vataniga, yaqinlariga muhabbat hissini tarbiyalash – taʼlim-tarbiya jarayonining eng muhim yoʻnalishlaridandir. Bunga erishish uchun nazariy bilim berish kifoya qilmaydi. Jamoa boʻlib oʻzgalar koʻmagiga muhtoj kishilarga yordam berib, yolgʻiz keksa, nogiron kishilar holidan xabar olib, yo oilasida biror muammo tugʻilgan sinfdoshining muammosi hal boʻlishiga koʻmaklashib, maktabimiz atrofini koʻkalamzorlashtirish va obodonlashtirishda birgalikda mehnat qilib va shu jarayonning oʻzida buning ahamiyatini tushuntirish orqali bunga erishishga intilayapmiz.

Oʻqituvchilarimiz, oʻquvchilarimiz saʼy-harakatlari natijasida maktabimiz atrofi yam-yashil daraxtlarga burkangan. Yoz boʻyi qulf urib ochilib turadigan anvoyi gullar barchaga zavq bagʻishlaydi.

Menga 2014-yil 21-dekabrda boʻlib oʻtgan saylovda Boyovul saylov okrugi saylovchilari ishonch bildirishib, xalq deputatlari tuman Kengashiga deputat qilib saylashdi. Kengashning Mahalliy byudjetni shakllantirish, uni ijro etish, iqtisodiy islohotlarni amalga oshirish hamda tadbirkorlikni rivojlantirish boʻyicha doimiy komissiyasi kotibi boʻldim.

Saylovchilar ishonchini oqlashga, oʻzimga topshirilgan vazifani sidqidildan bajarishga intilayapman. Chunki ishonch - masʼuliyat demakdir.

Nilufar DAVLETOVA, 31-sonli maktab direktori, xalq deputatlari tuman Kengashi deputati.

(Foto - http://img.uz)