ШОИРЛАРНИНГ СУЛТОНИ – НАВОИЙ
Алишер Навоий халқимизнинг онги ва тафаккури, бадиий маданияти тарихида бутун бир даврни ташкил этадиган буюк шахс, миллий адабиётимизнинг тенгсиз намояндаси, миллатимизнинг ғурури, шаъни-шарафини дунёга тараннум қилган сўз санъаткоридир.
Таъбир жоиз бўлса, оламда туркий ва форсий тилда сўзловчи бирон-бир инсон йўқки, у Навоийни билмаса, Навоийни севмаса, Навоийга садоқат ва эътиқод билан қарамаса. Инсон қалбининг қувонч-у қайғусини, эзгулик ва ҳаёт мазмунини Навоийдек теран ифода этган шоир жаҳон адабиёти тарихида камдан-кам топилади. Она тилига муҳаббат, унинг беқиёс бойлиги ва буюклигини англаш туйғуси ҳам бизнинг онг-у шууримиз, юрагимизга энг аввало Навоий асарлари билан кириб келади. Биз бу бебаҳо меросдан халқимизни қанчалик баҳраманд этсак, миллий маънавиятимизни юксалтиришда, жамиятимизда эзгу, инсоний фазилатларни камол топтиришда шунчалик қудратли маърифий қуролга эга бўламиз.
Алишер Навоий таваллудининг 579 йиллиги муносабати билан 38-сонли умумий ўрта таълим мактабнинг 5”Б”-синф ўқувчилари томонидан адабий кеча ўтказилди. Мактаб саҳнаси кечага мос равишда гуллар, буклетлар, бобокалонимизнинг сурати билан безатилди, деворий газеталар, фотоальбом, Навоий асарлари кўргазмаси ташкил этилди.
Адабий кечани мактабимизнинг маънавий-маърифий ишлар бўйича директор ўринбосари Нилуфар Тожимуродова очиб берди. У ўз сўзида Навоийнинг ўзбек адабий тилининг, мумтоз адабиётининг асосчиси, шарқ бадиий ва фалсафий тафаккурини жамлаб, янги поғонага кўтара олган мутафаккир эканлигини фахр билан тилга олди. Шунингдек, бобокалонимиз Темурийлар давлатининг йирик арбоби, адолат ҳимоячиси, илм-у ирфон, маданият ва шеърият ҳомийси, устоз-мураббий сифатида тарихда ном қолдирганини ҳам айтиб ўтди.
Кечада ўқувчилар томонидан Алишер Навоий ҳаёти ва ижоди ҳақида маълумотлар, унинг шеърлари, ғазаллари, ҳикматли сўзлари айтилди. Ундан ташқари, “Алишер ва гадо” номли саҳна кўриниши ҳам намойиш этилди. Кеча давомида куй, қўшиқ ва рақслар ижро қилиниб, ҳаммага хуш кайфият бағишлади.
Бўлиб ўтган тадбир ўқувчилар қалбида Навоий адабий меросига чексиз ҳурмат ва эътибор туйғуларини янада мустаҳкамлади.
Нодира ҚУРБОНБОЕВА, 38-сонли мактаб ўқитувчиси.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
