ТАКPОPИЙ ЭКИНЛАP – ХАЛҚИМИЗ ДАСТУPХОНИ ТЎКИН БЎЛИШИГА ХИЗМАТ ҚИЛАДИ

 Деҳқончиликда тупроқ унумдорлигини сақлаш ва ошириш учун кенг қўлланилиб келинаётган ғўза-ғалла қисқа навбатли алмашлаб экиш тизимидан ташқари, тупроқда кўпроқ миқдорда органик қолдиқ қолдирадиган ҳамда унумдорлигини яхши тиклайдиган экин турларини ҳам экиш, қишлоқ хўжалик маҳсулотлари етиштириш миқдорини ошириш лозимлигини давр тақозо этмоқда.

Табиийки, ҳар бир фермер хўжалиги, томорқа ер эгаси экинининг ҳосили сифатли ва салмоқли бўлишини хоҳлайди, экин майдонларидан самарали фойдаланишга, кўп даромад олишга интилади. Шу мақсадда кейинги йилларда ғўза майдонлари фақат ғалла билангина эмас кузги картошка, сабзи, карам, мош, шоли, пиёз дуккакли дон ва бошқада сабзавотлар билан алмашлаб экилмоқда. Бу усул тупроқ унумдорлигига сезиларли таъсир  кўрсатишига кўпчилик ўз фаолиятларида ишонч  ҳосил қилмоқда. Қолаверса, ғалладан бўшаган майдонларга такрорий экинлар экиш ва кўзланганидай ҳосил олиш – юртдошларимиз дастурхони тўкин, турмуши фаровон бўлишига хизмат қилади.

Айни кунларда туманимиз фермер хўжаликларида 2020 йил ҳосили учун экилган буғдойлар донини йиғиштириб олиш, ғалладан бўшаган майдонларга такрорий экинлар экиш учун тайёргарлик бошланиб кетди.

Мамлакатимизда озиқ-овқат хавфсизлигини таъминлаш ва танқислигининг олдини олишга, халқимиз дастурхони хилма-хил қишлоқ хўжалик маҳсулотлари билан тўкин бўлишига ҳисса  қўшиш мақсадида туманимизда ҳам ғалладан бўшаган майдонларга такрорий экинларни жойлаштириш ва мўл ҳосил етиштириш бўйича режалар белгилаб олинди. Шунга кўра, ғалладан бўшаган майдонларнинг 1803 гектарига такрорий экинлар экилади. Шунинг  258 гектарига сабзавот, 35 гектарига картошка, 400 гектарига мош, 70 гектарига мойли экинлар, 140 гектарига чорва учун озуқа экинлари экилади. Такрорий экинларни  экишга 11 тонна сабзавот, 105 тонна картошка, 14 тонна мош, 180 тонна шоли, 1 тонна мойли экинлар, 4 тонна озуқа экинлари уруғлари тайёрлаб  қўйилди.

Такрорий экинлардан жами 11 983 тонна ҳосил олиш режалаштирилган.

Айни кунларда ғалладан бўшаган далаларда такроий экин экишга тайёрлаш учун суғориш, текислаш ишлари давом этаяпти.

Юртимизда қарийб уч ойдан зиёд вақтдан бери давом этаётган коронавирус пандемияси даврида эҳтиёжманд оилаларни моддий қўллаб-қувватлаш, озиқ-овқат хавфсизлигини таъминлаш, мавжуд ресурслардан аҳоли фаровонлигини оширишда оқилона фойдаланиш мақсадида қабул қилган туман ҳокимининг 2020 йил 1 июнь кунги қарорига асосан туманда ҳар бир сектор ҳудудида фермер хўжаликларининг ғалладан бўшайдиган майдонларидан кам таъминланган, ишсиз, экин экишга имконияти бор оилаларнинг ҳар бирига камида 20 сотихдан ер майдони ажратиб берилмоқда. Аниқроқ айтадиган бўлсак, 1-сектор ҳудудидан 10 та кам таъминланган оилага, 2 сектор ҳудудидан 20 та, 3 сектор ҳудудидан 9 та, 4 сектор ҳудудидан 6 та кам таъминланган, экин экишга имконияти бор оилаларга 20 сотихдан ер майдонлари ажратиб берилди.

Бундан кўзланган вазифа ушбу ажратилган майдонларда мўл ҳосил етиштирилишига эришиш ердан унумли фойдаланилиши эвазига эҳтиёжманд оилаларнинг иқтисоди юксалишини таъминлашдир.

Илҳом ПОЛВОНОВ,
туман Фермер, деҳқон хўжаликлари ва томорқа ер эгалари Кенгаши раиси.