БАРЧАГА ЎРНАК ПИЛЛАКОР ОПА
Туманимизда ипак қурти боқиш ҳадисини олган оилалар, моҳир пиллакорлар кўп. Улар уй шароитида бир қути ипак қуртидан 70 кг.дан ошириб, сифатли ҳосил етиштиришмоқда. Ана шундай касаначи пиллакорларимиздан бир бўлган Боғ маҳалласида яшовчи Ўрингул опа Бегимованинг меҳнаткашлигини алоҳида тилга олиш жоиз. Опа асли Хўжайли туманида туғилиб-ўсиб, 1985 йилда туманимизга келин бўлиб келган. Ўрингул опанинг қайнонаси Турсуной момо Қуданова хонадонда 1950 йиллардан буён мавсумий ипак қурти боқиб, парвариш қиларди.
Ҳар ишга чаққон Ўрингул опа ҳам дарҳол ишга киришиб, ипак қурти парваришлашни Турсуной момодан ўрганди ва ҳар йили биргаликда меҳнат қилиб, мўл ҳосил етиштиришди. Мустақил пиллакор сифатида эса 1990 йилдан ипак қурти парвариши билан шуғулланди ва доим илғорлар сафида келди.
Ўрингул опа бу йилги мавсумда бир қути ипак қурти парваришлаб, шартномада белгиланган 55 кг. режани ортиғи билан бажариб, 76 кг. маҳсулот топширди.
- Ипак қурти боқиш оиламиз учун жуда мароқли, - дейди илғор пиллакор. - Ҳар йили бу мавсумни орзиқиб кутамиз. Aлбатта, иш бор жойда қийинчиликлар бўлади. Aммо ипак қуртини парваришлаш кишига ўзгача ҳузур бағишлайди. Айниқса, ҳосил етилганидан кейин пилла теришни ҳаммамиз биргаликда бажарамиз ва бу биз учун жуда завқли.
Ўрингул опа ипак қурти 4 ёшга тўлгунига қадар уйида, катта хонасида парваришлайди. Бу давр анча машаққатли ҳисобланади. Чунки ипак қурти улғайганидан сўнг, егулик етказиб бериш кўпроқ меҳнат талаб қилади. Шундан кейин меҳнатнинг маҳсули кўриниб, ҳосил етилади. Бу пайтда оиланинг барча аъзолари бел боғлаб, ишга тушади ва йиғим-терим бошланади.
Пилладан бу йил ҳам мўл ҳосил тўплашга эришган Ўрингул опани барчага ўрнак қилиб кўрсатса арзийди.
Шоҳзод Қурбонбоев.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
