ФИДОЙИ ШИФОКОР

«Набий соллаллоҳу алайҳи васаллам инсониятга иймондан кейин саломатликдан кўра яхширок неъмат берилмаган» деган эканлар. Ана шундай бебаҳо бойлик эл – соғлиғини сақлаш йўлида курашувчи касб эгалари, шубҳасиз тиббиёт ходимларидир.
Тўлқинлик, эл орасида Ўринбой дўхтир номи билан танилган, бир умр фельдишер бўлиб ишлаган Ўринбой Хидирбоевнинг 6 нафар фарзанднинг 4 нафари шифокор бўлиб етишиб, ана шундай машаққатли касбда меҳнат қилишаяпти.
Қипчоқ овулидаги 1-сонли қишлоқ оилавий поликлиникаси мудири Рустам Хидирбоев  унинг шифокор ўғилларидан бири. Бу касбга меҳр унга отамерос. Болалигидан у бемор одамларнинг дардига малҳам бўлиб, соғайиб оёққа туриб кетишига ёрдам беришни истарди.
Асли мутахассислиги болалар шифокори бўлган бу йигит ўз касбий фаолиятини 1988 йилда бошлади. Манғитдаги фтизиатрия лабораториясида, Болалар поликлиникасида ишлади, участка педиатри бўлди. 1991 йилдан 2017 йилгача Қипчоқ қишлоқ врачлик амбулаториясида, 2017 йилдан бери эса 1-сонли қишлоқ оилавий поликлиникасида мудир вазифасини масъулият билан адо этиб келмоқда.
Ушбу тиббиёт муассасаси бугунги кунда Қипчоқ шаҳарча, Қипчоқ, Тўлқин, Чойкўл, Бештом, Уйшин, Дарё бўйи каби овул ва маҳаллаларда истиқомат қилувчи 30 мингдан зиёд аҳолига хизмат кўрсатади. Шунинг ўзиёқ муассаса раҳбари зиммасидаги вазифа нечоғлик залворли эканлигини англатади.
Қишлоқ оилавий поликлиникасининг 18 нафар шифокорлари ва ўрта тиббиёт ходимлари талабчан ва касбига фидойи Рустам Хидирбоев бошчилигида бутун дунё халқлари бошига оғир синовларни солган коронавирус пандемияси даврида ҳам  аҳоли соғлиғини мунтазам назорат қилиб, уларга касалликка қарши кураш, санитария-гигиена қоидаларига амал қилиш, тиббий маданиятни юксалтириш борасида тарғибот олиб бориш билан бирга, касалликка чалинганларни самарали даволаш йўлида вақт билан ҳисоблашмай меҳнат қилдилар. Шу боисдан айни кунда ҳудудда аҳвол барқарорлашмоқда.
Қайсики жамоада ходимларга муносиб меҳнат шароитлари яратилса, меҳнатлари баҳоланса, ижтимоий адолат тамойилларига риоя этилса, албатта, шу ерда ютуқлар кўп бўлади. Тиббиёт масканида ҳудуд аҳолисига болалар шифокори, жарроҳ, аёллар шифокори, стоматолог, терапевт ва ультратовуш текшируви мутахассислари хизмат кўрсатади. Йилига бир марта чуқурлаштирилган тиббий кўрик ҳам ташкиллаштирилиб, аниқланган беморларнинг саломатлиги тикланишида ёрдам кўрсатилади. Ушбу муассасада йўлга қўйилган тиббий хизматлардан аҳоли жуда мамнун.
Қипчоқ овулидаги 1-сонли Қишлоқ оилавий поликлиникасига соғлиғида муаммолар билан мурожаат қилувчи аҳолига касбига фидойи шифокор Рустам Хидирбоев бошчилигидаги тиббиёт ходимлари томонидан намунали тиббий хизмат кўрсатилаяпти. Касаллиги станционар шароитда даволанувчи беморлар учун 8 ўринли кундузги даволаш бўлими ҳам ташкил этилган. Дардларига шифо топиб, миннатдор бўлиб келаётганлар эса кўпчиликни ташкил этади.
Рустам Хидирбоев аҳил ва бахтли оила соҳиби ҳам. Унинг аёли Эркиной Муродбоева овулдаги мактабда ўқувчи-ёшларга таълим-тарбия бериб, пенсияга чиқди. Ўғли Исломбек Ўринбоев бўлғуси шифокор, тиббиёт олийгоҳи 2-босқич талабаси.
Ҳар йили ноябрь ойининг иккинчи якшанбаси тиббиёт ходимларининг байрами сифатида нишонланади. Эл соғлиғини сақлашдек шарафли касбда сидқидилдан меҳнат қилиб келаётган Рустам Хидирбоев каби фидойи шифокорларга касб байрамлари қутлуғ бўлсин.

Ойгул РАЖАБОВА.