ШИФОКОРЛИК – ФИДОЙИЛИК

Ҳар бир инсон ўз орзу-умидларига кўра интилишдан тўхтамаса, дуч келган қийинчиликлар, ҳаёт зарбаларидан чекинмаса, касб-кор, мутахассислик  эгаллаб, эзгу ниятлар билан элига хизмат қилса, мавқеи юксалиб, ҳурмат-эҳтиромга бурканади.

Туман Тиббиёт бирлашмаси кўптармоқли марказий поликлиникаси пульмонолог шифокори Феруза Жумамуродова ўз хизматлари  билан элда эъзоз топганларнинг бири.

У қурувчи-муҳандис  Болтабой Жумамуродов ва умр бўйи муаллимлик қилган Клара Ҳамроевалар хонадонида вояга етган етти нафар фарзанднинг бири. Унинг туғишганларидан фарқли шифокорлик касбини танлашига онасининг онаси – момоси Пошша Самандарова сабабчи бўлган. Феруза мактабнинг юқори синфларида ўқиб юрган кезларида момоси астма касаллигидан кўп азият чеккан, кунда-кунора бориб, ғамхўрлик қиладиган қиз момосининг дард билан олишиб ётган вақтларида “ўзим дўхтир бўлиб сизни даволайман, кўрмагандай бўлиб кетасиз”, дея тасалли берарди. Бироқ бундай бахт унга насиб этмади...

Шу-шу унинг кўнглида беморларга малҳам бўлишдек ният ўрнашиб қолди. 1996 йил Тошкент Тиббиёт олийгоҳини битириб келиб, Нукусда Республика касалхонасида интернатура ўтади. 1997 йилнинг июлидан бери туман Тиббиёт бирлашмасининг кўп тармоқли марказий поликлиникасида ишламоқда.

Феруза Жумамуродованинг қабулига келган беморларда аввало унинг илиқ муносабатидан, масъулият билан текширувларидан кўнглида шифокор ўзини даволай олишига ишонч уйғонади.

– Шифокор бемордан касаллиги келиб чиқишини эринмай сўраб-суриштириб, асл сабабларини аниқлаб, текширувлари давомида ишонч ҳосил қилиб, кейин даво муолажалари буюради. Кейин буюрилган дори-дармон ҳақида ҳам маълумот бериб, уларни қабул қилса, тузалиб кетишига ишонтира олиши муҳим, – дейди у ўз фаолияти ҳақида.

Тажрибали шифокор қабулига ҳар куни 30-40 нафар беморлар ташриф буюришади. Уларнинг айримлари ҳолатига кўра, стационар даволанишга йўналтирилса, айримлари амбулатор шароитда, шифокор назорати остида муолажалар олади.

Шифокорлик – фидойилик дейишади. Аслида ҳам шундай эканлигини халқимиз ўтган йили, коронавирус пандемияси даврида жуда яққол ҳис қилишди.

Феруза Жумамуродова ҳам касбдошлари қатори беморлар билан илк мулоқот қилиб, соғайишлари йўлида вақт билан ҳисоблашмай меҳнат қилганларнинг бири.

– Раҳбариятимиз бунинг учун барча шароитларни яратиб қўйди. Неча ой касаллик билан курашиб, бугунгидай тинч кунларга эришдик, – дейди у шукроналик билан.

Коронавирус пандемияси ҳали кўплаб мамлакатларни жиддий қийинчиликларга солаётган бир даврда юртимизда ушбу касалликка қарши оқилона кураш олиб борилганлиги ва шифокорларимизнинг фидойи меҳнатлари туфайли касаллик барвақт жиловланганлигини халқимиз асло унутмайди.

Бу йўлда эркаклар билан баравар меҳнат қилган Феруза сингари тиббиёт соҳасида ишлаётган аёл-қизларга қанчалар миннатдорчилик билдирсак ҳам кам. Илоҳим, қўлларингиз дард кўрмагай, деб қоламиз.

Ойгул РАЖАБОВА.