ShIFOKORLIK – FIDOYILIK

Har bir inson oʻz orzu-umidlariga koʻra intilishdan toʻxtamasa, duch kelgan qiyinchiliklar, hayot zarbalaridan chekinmasa, kasb-kor, mutaxassislik  egallab, ezgu niyatlar bilan eliga xizmat qilsa, mavqei yuksalib, hurmat-ehtiromga burkanadi.

Tuman Tibbiyot birlashmasi koʻptarmoqli markaziy poliklinikasi pulmonolog shifokori Feruza Jumamurodova oʻz xizmatlari  bilan elda eʼzoz topganlarning biri.

U quruvchi-muhandis  Boltaboy Jumamurodov va umr boʻyi muallimlik qilgan Klara Hamroyevalar xonadonida voyaga yetgan yetti nafar farzandning biri. Uning tugʻishganlaridan farqli shifokorlik kasbini tanlashiga onasining onasi – momosi Poshsha Samandarova sababchi boʻlgan. Feruza maktabning yuqori sinflarida oʻqib yurgan kezlarida momosi astma kasalligidan koʻp aziyat chekkan, kunda-kunora borib, gʻamxoʻrlik qiladigan qiz momosining dard bilan olishib yotgan vaqtlarida “oʻzim doʻxtir boʻlib sizni davolayman, koʻrmaganday boʻlib ketasiz”, deya tasalli berardi. Biroq bunday baxt unga nasib etmadi...

Shu-shu uning koʻnglida bemorlarga malham boʻlishdek niyat oʻrnashib qoldi. 1996-yil Toshkent Tibbiyot oliygohini bitirib kelib, Nukusda Respublika kasalxonasida internatura oʻtadi. 1997-yilning iyulidan beri tuman Tibbiyot birlashmasining koʻp tarmoqli markaziy poliklinikasida ishlamoqda.

Feruza Jumamurodovaning qabuliga kelgan bemorlarda avvalo uning iliq munosabatidan, masʼuliyat bilan tekshiruvlaridan koʻnglida shifokor oʻzini davolay olishiga ishonch uygʻonadi.

– Shifokor bemordan kasalligi kelib chiqishini erinmay soʻrab-surishtirib, asl sabablarini aniqlab, tekshiruvlari davomida ishonch hosil qilib, keyin davo muolajalari buyuradi. Keyin buyurilgan dori-darmon haqida ham maʼlumot berib, ularni qabul qilsa, tuzalib ketishiga ishontira olishi muhim, – deydi u oʻz faoliyati haqida.

Tajribali shifokor qabuliga har kuni 30-40 nafar bemorlar tashrif buyurishadi. Ularning ayrimlari holatiga koʻra, statsionar davolanishga yoʻnaltirilsa, ayrimlari ambulator sharoitda, shifokor nazorati ostida muolajalar oladi.

Shifokorlik – fidoyilik deyishadi. Aslida ham shunday ekanligini xalqimiz oʻtgan yili, koronavirus pandemiyasi davrida juda yaqqol his qilishdi.

Feruza Jumamurodova ham kasbdoshlari qatori bemorlar bilan ilk muloqot qilib, sogʻayishlari yoʻlida vaqt bilan hisoblashmay mehnat qilganlarning biri.

– Rahbariyatimiz buning uchun barcha sharoitlarni yaratib qoʻydi. Necha oy kasallik bilan kurashib, bugungiday tinch kunlarga erishdik, – deydi u shukronalik bilan.

Koronavirus pandemiyasi hali koʻplab mamlakatlarni jiddiy qiyinchiliklarga solayotgan bir davrda yurtimizda ushbu kasallikka qarshi oqilona kurash olib borilganligi va shifokorlarimizning fidoyi mehnatlari tufayli kasallik barvaqt jilovlanganligini xalqimiz aslo unutmaydi.

Bu yoʻlda erkaklar bilan baravar mehnat qilgan Feruza singari tibbiyot sohasida ishlayotgan ayol-qizlarga qanchalar minnatdorchilik bildirsak ham kam. Ilohim, qoʻllaringiz dard koʻrmagay, deb qolamiz.

Oygul RAJABOVA.