ЁШ КИТОБХОНЛАР ИШТИРОКИДАГИ ДАВРА СУҲБАТИ МАРОҚЛИ ВА ҚИЗИҚАРЛИ ЎТДИ

Бугун юртимизда ёшларни китобхонликка жалб этиш, мутолаа маданиятини юксалтириш, китоблар нашр қилиш давлат сиёсати даражасида эътироф этилмоқда. Яхши китобларни нашр қилдираётган ижодкорлар ҳам, кўп китоб ўқиётган китобхонлар ҳам тақдирланмоқда. Президентимизнинг бу борадаги тегишли Қарор ва Фармонлари соҳадаги амалий ишларга  муҳим асос бўлиб, китобхонлар сафи ортишига хизмат қилмоқда.

Амударё телевидениесининг Олий мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ҳам ёшлар ўртасида китобхонликни кенг тарғиб қилиш мақсадидаги тадбирлар ташкил этилиб борилмоқда.

Лойиҳа доирасида ёшлар маънавиятини юксалтириш, китобхон ёшларни тенгдошларига ўрнак қилиб кўрсатиш, бошқаларни ҳам китоб ўқишга даъват қилиш мақсадида 36-сонли мактабнинг китобхон ёшлари билан давра суҳбати ўтказилди.
Мактаб кутубхонасида ўтказилган мазкур тадбирда она тили ва адабиёт фани ўқитувчиси Умида Жуманиёзова, кутубхона мудираси Назокат Саъдуллаева ҳамда китобхон ёшлар қатнашишди.

Суҳбат давомида она тили ва адабиёт фани ўқитувчиси Умида Жуманиёзова ёшларга дунёда китобдан қимматбаҳо нарса йўқлигини, у асосий тарбияловчи восита эканини айтиб ўтди. Китоблар илму-маърифат, зиё тарқатувчи воситалигини, ҳар куни китоб ўқиган инсонлар унинг зиёсидан баҳра олиб яшашини, маънавий озуқага эга бўлишини таъкидлади.

Дарҳақиқат, инсон ёшликдан китобларни ўқиш асносида тарбия олади, ҳаёт таълимини эгаллайди, ўзига керакли бўлган касбга меҳр қўйиб, ўрганишга ҳаракат қилади ва йўлини топади. Эзгуликни ёмонликдан, яхшиликни ёвузликдан ажратишни билиб олади. Кичиклигидан эртаклар тинглаб, кейинчалик уларни ва бошқа китобларни ўқишга одатланган бола ёмонликни яхшилик билан енгиш мумкинлигини, ҳар доим ақлу-заковат билан иш тутиш кераклигини тушуниб етади.

36-сонли мактаб кутубхонасидаги китобларнинг 12000 тасини дарсликлар, 700 тага яқини турли хилдаги бадиий адабиётлар, 66 тасини сиёсий китоблар ташкил қилади. Ундан ташқари, 10 турли даврий газета ва журналлар тахламлари ҳам мавжуд. Кутубхонага ўқитувчилардан ташқари 796 нафар ўқувчи аъзоликка қабул қилинган. Уларнинг кутубхонада мутолаа қилишлари учун ҳам шароитлар яратилган. Шу сабабли ёшлар дарслардан бўш пайтларида кутубхонага ташриф тез-тез ташриф буюриб, ўзбек ва чет эл адибларининг асарларини қизиқиш билан мутолаа қилишади ва бўш вақтларини мазмунли ўтказишади.

Давра суҳбати давомида ёш китобхонлар ўзлари ўқиган асарлар, улардаги қаҳрамонлар ва воқеалар баёни ҳақида сўзлашишди. Китоб жавонининг тўридан жой олган севимли китоблари ва бошқа асарлар тўғрисида бир-бирлари билан фикр алмашишди, ўз мулоҳазаларини билдиришди. Бирининг ўқиган китобига бошқасининг қизиқиши ошиб, ўқишни мақсад қилиб қўйган китобларининг сонини янада кўпайтиришди. Улар порлоқ келажак илм билан яратилишини, китоблар ёрқин ҳаётга бошлаб боришини, ишончли ҳамроҳ ва яқин дўст эканлигини эътироф этишди. Китобхонлар билан дилдан ўтказилган ушбу суҳбат эсда қоларли, жуда мароқли бўлди.

Ёшлар ўртасида китобхонлик маданиятини оммалаштириш, уларнинг бадиий саводхонлигини янада ошириш ва мутолаа муҳитини шакллантиришда бундай тадбирларнинг аҳамияти жуда катта. Китоб қалб чироғи, тафаккур қаноти, инсоннинг энг яқин дўсти, маслаҳатчисидир. Юксак тафаккур манбаи бўлгани учун ҳам халқимиз орасида китоблар жуда қадрли саналади.

О.Худойберганова.