YoSh KITOBXONLAR IShTIROKIDAGI DAVRA SUHBATI MAROQLI VA QIZIQARLI OʻTDI

Bugun yurtimizda yoshlarni kitobxonlikka jalb etish, mutolaa madaniyatini yuksaltirish, kitoblar nashr qilish davlat siyosati darajasida eʼtirof etilmoqda. Yaxshi kitoblarni nashr qildirayotgan ijodkorlar ham, koʻp kitob oʻqiyotgan kitobxonlar ham taqdirlanmoqda. Prezidentimizning bu boradagi tegishli Qaror va Farmonlari sohadagi amaliy ishlarga  muhim asos boʻlib, kitobxonlar safi ortishiga xizmat qilmoqda.

Amudaryo televideniyesining Oliy majlis huzuridagi Nodavlat notijorat tashkilotlarni va fuqarolik jamiyatining boshqa institutlarini qoʻllab-quvvatlash Jamoat fondi tomonidan moliyalashtirilgan “Yuksak maʼnaviyatli va axloqli yoshlar – kelajak poydevori” nomli grant loyihasi doirasida ham yoshlar oʻrtasida kitobxonlikni keng targʻib qilish maqsadidagi tadbirlar tashkil etilib borilmoqda.

Loyiha doirasida yoshlar maʼnaviyatini yuksaltirish, kitobxon yoshlarni tengdoshlariga oʻrnak qilib koʻrsatish, boshqalarni ham kitob oʻqishga daʼvat qilish maqsadida 36-sonli maktabning kitobxon yoshlari bilan davra suhbati oʻtkazildi.
Maktab kutubxonasida oʻtkazilgan mazkur tadbirda ona tili va adabiyot fani oʻqituvchisi Umida Jumaniyozova, kutubxona mudirasi Nazokat Saʼdullayeva hamda kitobxon yoshlar qatnashishdi.

Suhbat davomida ona tili va adabiyot fani oʻqituvchisi Umida Jumaniyozova yoshlarga dunyoda kitobdan qimmatbaho narsa yoʻqligini, u asosiy tarbiyalovchi vosita ekanini aytib oʻtdi. Kitoblar ilmu-maʼrifat, ziyo tarqatuvchi vositaligini, har kuni kitob oʻqigan insonlar uning ziyosidan bahra olib yashashini, maʼnaviy ozuqaga ega boʻlishini taʼkidladi.

Darhaqiqat, inson yoshlikdan kitoblarni oʻqish asnosida tarbiya oladi, hayot taʼlimini egallaydi, oʻziga kerakli boʻlgan kasbga mehr qoʻyib, oʻrganishga harakat qiladi va yoʻlini topadi. Ezgulikni yomonlikdan, yaxshilikni yovuzlikdan ajratishni bilib oladi. Kichikligidan ertaklar tinglab, keyinchalik ularni va boshqa kitoblarni oʻqishga odatlangan bola yomonlikni yaxshilik bilan yengish mumkinligini, har doim aqlu-zakovat bilan ish tutish kerakligini tushunib yetadi.

36-sonli maktab kutubxonasidagi kitoblarning 12000 tasini darsliklar, 700 taga yaqini turli xildagi badiiy adabiyotlar, 66 tasini siyosiy kitoblar tashkil qiladi. Undan tashqari, 10 turli davriy gazeta va jurnallar taxlamlari ham mavjud. Kutubxonaga oʻqituvchilardan tashqari 796 nafar oʻquvchi aʼzolikka qabul qilingan. Ularning kutubxonada mutolaa qilishlari uchun ham sharoitlar yaratilgan. Shu sababli yoshlar darslardan boʻsh paytlarida kutubxonaga tashrif tez-tez tashrif buyurib, oʻzbek va chet el adiblarining asarlarini qiziqish bilan mutolaa qilishadi va boʻsh vaqtlarini mazmunli oʻtkazishadi.

Davra suhbati davomida yosh kitobxonlar oʻzlari oʻqigan asarlar, ulardagi qahramonlar va voqealar bayoni haqida soʻzlashishdi. Kitob javonining toʻridan joy olgan sevimli kitoblari va boshqa asarlar toʻgʻrisida bir-birlari bilan fikr almashishdi, oʻz mulohazalarini bildirishdi. Birining oʻqigan kitobiga boshqasining qiziqishi oshib, oʻqishni maqsad qilib qoʻygan kitoblarining sonini yanada koʻpaytirishdi. Ular porloq kelajak ilm bilan yaratilishini, kitoblar yorqin hayotga boshlab borishini, ishonchli hamroh va yaqin doʻst ekanligini eʼtirof etishdi. Kitobxonlar bilan dildan oʻtkazilgan ushbu suhbat esda qolarli, juda maroqli boʻldi.

Yoshlar oʻrtasida kitobxonlik madaniyatini ommalashtirish, ularning badiiy savodxonligini yanada oshirish va mutolaa muhitini shakllantirishda bunday tadbirlarning ahamiyati juda katta. Kitob qalb chirogʻi, tafakkur qanoti, insonning eng yaqin doʻsti, maslahatchisidir. Yuksak tafakkur manbai boʻlgani uchun ham xalqimiz orasida kitoblar juda qadrli sanaladi.

O.Xudoyberganova.