МАЪНАВИЯТ ТАРҚАТУВЧИ КУТУБХОНАЧИ

Амударё туманининг Назархон овулидаги 3-сонли умумтаълим мактабининг кутубхоначиси Тозахон Қидирниязовани барча юртдошлари маънавият – зиё тарқатувчи инсон сифатида жуда яхши билишади. У 5 йилдан буён ушбу мактабнинг кутубхона мудираси сифатида  фаолият кўрсатиб келмоқда. Тозахон раҳбарлик қилаётган кутубхона бугунги кунда нафақат мактаб ўқувчиларининг балки, бутун қишлоқ аҳлининг севимли, мароқли мутолаа қиладиган масканига айланди. Ҳозирги кунда кутубхонада 800 дан зиёд турли жанрлардаги адабиётлар сақланмоқда. Кутубхонанинг бугунги кунда 400 нафардан зиёд аъзоси бор.

Кутубхона фақат китоб ўқиш учун эмас, мактабда, овулда ўтказиладиган байрамлар, муҳим саналар муносабати билан ўтказиладиган маънавий-маданий тадбирларда ҳам хизмат қилиб келмоқда.

Мактаб ўқувчилари орасидан сўнгги йилларда жуда кўп иқтидорли, ижодкор ўқувчилар етишиб чиқмоқда. Ушбу мактаб ўқувчиси, “Ҳақ нийетлер” китобининг муаллифи Муҳаббат Ўринбосарова бугунги кунда Нукус шаҳридаги Иброим Юсупов номли адабиёт мактабида ўқишини давом эттирмоқда. Мактабнинг еттинчи синф ўқувчиси,  республика миқёсида ўтказилган “Ижодкор болалар” танловининг совриндори Навбаҳор Сарсенбоеванинг илк китоби нашрдан чиқиш арафасида.

Қорақалпоғистон Республикаси миқёсида ўтказилган “Фидоий китобхонлар” онлайн танловида овулда фермерлик фаолияти билан шуғулланаётган Ниятбой Отамуродовнинг келини Лиза Бойниязова фахрли учинчи ўринни эгаллади.

Мактаб ўқувчиларининг, овул фуқароларининг маданият, адабиёт, китобхонлик соҳаларида эришаётган ютуқларида биз сўз юритаётган кутубхонанинг роли катта бўлмоқда.

Кутубхонада Тозахон Қидирниёзованинг ташаббуси билан жуда кўп адабий кечалар, мушоиралар, меҳнат фахрийлари билан учрашувлар, таниқли ижодкорлар билан мулоқотлар ўтказиб турилади. Бу эзгу амалларнинг барчаси ижодкор ва китобсеварлар ҳаётида катта ютуқларга асос бўлмоқда.

Сўзимиз бошида Тозахон Қидирниёзовани бежизга “Маънавият тарқатувчи инсон” деб айтиб ўтмадик. Чунки у китобхонлик борасида бошқаларга ўрнак бўларли даражада катта ютуқларни қўлга киритиб келмоқда. Тозахон ўтган йили Республикада ўтказилган китобхонлик фестивалида совриндор бўлиб қайтди. Бу йил март ойида ўтказилган китобхонлик фестивали Тозахон учун жуда омадли келди. У Қорақалпоғистон Республикаси миқёсида ўтказилган китобхонлик фестивалида ғолиб деб топилди ҳамда биринчи даражали диплом ва фестивалнинг махсус кубоги билан тақдирланди.

Мазкур фестивалда ҳар бир иштирокчининг иш фаолияти, китобхонларни жалб эта олиш қобилияти, иш фаолиятидаги ютуқлари ҳакамлар томонидан синчиклаб ўрганилиб Тозахон Қидирниёзова энг юқори ўринга муносиб деб топилди.

Ҳикоямиз қаҳрамони нафақат маънавият тарқатувчи, балки бошқалар ҳавас қилса арзигулик уй бекаси ҳамдир. У турмуш ўртоғи Хидирбой билан биргаликда 3 нафар қиз ва 1 нафар ўғил фарзандни тарбиялаб вояга етказмоқда. Тўнғич қизи Нилуфар ҳозирги кунда театр ва санъат институти Нукус филиалининг 3-босқич талабаси. Демак бу оилада яна бир ҳақиқий маданият соҳаси ходими етишиб чиқмоқда.

Ҳозирги кунда мамлакатимизда китобхонликка, маданий-маънавий турмушимизни ривожлантиришга жуда катта эътибор қаратилмоқда.

Элимизда Тозахон Қидирниёзовадек ўз касбининг фидойилари бор экан маънавият-маданият соҳасида янада улкан ютуқларни қўлга киритаверишимизга асло шубҳа йўқ.

Ўрозали Рейимов, “Жайхун илҳомлари” ННТ раиси.