MAʼNAVIYaT TARQATUVChI KUTUBXONAChI

Amudaryo tumanining Nazarxon ovulidagi 3-sonli umumtaʼlim maktabining kutubxonachisi Tozaxon Qidirniyazovani barcha yurtdoshlari maʼnaviyat – ziyo tarqatuvchi inson sifatida juda yaxshi bilishadi. U 5-yildan buyon ushbu maktabning kutubxona mudirasi sifatida  faoliyat koʻrsatib kelmoqda. Tozaxon rahbarlik qilayotgan kutubxona bugungi kunda nafaqat maktab oʻquvchilarining balki, butun qishloq ahlining sevimli, maroqli mutolaa qiladigan maskaniga aylandi. Hozirgi kunda kutubxonada 800 dan ziyod turli janrlardagi adabiyotlar saqlanmoqda. Kutubxonaning bugungi kunda 400 nafardan ziyod aʼzosi bor.

Kutubxona faqat kitob oʻqish uchun emas, maktabda, ovulda oʻtkaziladigan bayramlar, muhim sanalar munosabati bilan oʻtkaziladigan maʼnaviy-madaniy tadbirlarda ham xizmat qilib kelmoqda.

Maktab oʻquvchilari orasidan soʻnggi yillarda juda koʻp iqtidorli, ijodkor oʻquvchilar yetishib chiqmoqda. Ushbu maktab oʻquvchisi, “Haq niyetler” kitobining muallifi Muhabbat Oʻrinbosarova bugungi kunda Nukus shahridagi Ibroim Yusupov nomli adabiyot maktabida oʻqishini davom ettirmoqda. Maktabning yettinchi sinf oʻquvchisi,  respublika miqyosida oʻtkazilgan “Ijodkor bolalar” tanlovining sovrindori Navbahor Sarsenboyevaning ilk kitobi nashrdan chiqish arafasida.

Qoraqalpogʻiston Respublikasi miqyosida oʻtkazilgan “Fidoiy kitobxonlar” onlayn tanlovida ovulda fermerlik faoliyati bilan shugʻullanayotgan Niyatboy Otamurodovning kelini Liza Boyniyazova faxrli uchinchi oʻrinni egalladi.

Maktab oʻquvchilarining, ovul fuqarolarining madaniyat, adabiyot, kitobxonlik sohalarida erishayotgan yutuqlarida biz soʻz yuritayotgan kutubxonaning roli katta boʻlmoqda.

Kutubxonada Tozaxon Qidirniyozovaning tashabbusi bilan juda koʻp adabiy kechalar, mushoiralar, mehnat faxriylari bilan uchrashuvlar, taniqli ijodkorlar bilan muloqotlar oʻtkazib turiladi. Bu ezgu amallarning barchasi ijodkor va kitobsevarlar hayotida katta yutuqlarga asos boʻlmoqda.

Soʻzimiz boshida Tozaxon Qidirniyozovani bejizga “Maʼnaviyat tarqatuvchi inson” deb aytib oʻtmadik. Chunki u kitobxonlik borasida boshqalarga oʻrnak boʻlarli darajada katta yutuqlarni qoʻlga kiritib kelmoqda. Tozaxon oʻtgan yili Respublikada oʻtkazilgan kitobxonlik festivalida sovrindor boʻlib qaytdi. Bu yil mart oyida oʻtkazilgan kitobxonlik festivali Tozaxon uchun juda omadli keldi. U Qoraqalpogʻiston Respublikasi miqyosida oʻtkazilgan kitobxonlik festivalida gʻolib deb topildi hamda birinchi darajali diplom va festivalning maxsus kubogi bilan taqdirlandi.

Mazkur festivalda har bir ishtirokchining ish faoliyati, kitobxonlarni jalb eta olish qobiliyati, ish faoliyatidagi yutuqlari hakamlar tomonidan sinchiklab oʻrganilib Tozaxon Qidirniyozova eng yuqori oʻringa munosib deb topildi.

Hikoyamiz qahramoni nafaqat maʼnaviyat tarqatuvchi, balki boshqalar havas qilsa arzigulik uy bekasi hamdir. U turmush oʻrtogʻi Xidirboy bilan birgalikda 3 nafar qiz va 1 nafar oʻgʻil farzandni tarbiyalab voyaga yetkazmoqda. Toʻngʻich qizi Nilufar hozirgi kunda teatr va sanʼat instituti Nukus filialining 3-bosqich talabasi. Demak bu oilada yana bir haqiqiy madaniyat sohasi xodimi yetishib chiqmoqda.

Hozirgi kunda mamlakatimizda kitobxonlikka, madaniy-maʼnaviy turmushimizni rivojlantirishga juda katta eʼtibor qaratilmoqda.

Elimizda Tozaxon Qidirniyozovadek oʻz kasbining fidoyilari bor ekan maʼnaviyat-madaniyat sohasida yanada ulkan yutuqlarni qoʻlga kiritaverishimizga aslo shubha yoʻq.

Oʻrozali Reyimov, “Jayxun ilhomlari” NNT raisi.