Umumtaʼlim maktablarida “Birinchi qoʻngʻiroq” sadolari yangrab, yangi oʻquv yili boshlandi

4-sentyabr kuni kuni mamlakatimizning barcha hududlaridagi umumtaʼlim maktablarida “Birinchi qoʻngʻiroq” sadolari yangrab, yangi oʻquv yili boshlandi.

Amudaryo tumani Maktabgacha va maktab taʼlimi boʻlimiga qarashli 86ta umumtaʼlim maktablarida ham yangi 2024-2025 oʻquv yilining birinchi kuni tantanali tarzda nishonlandi. Ilk marta maktab ostonasiga qadam bosgan 3600 nafar 1-sinf oʻquvchilariga 12 turdagi oʻquv qurollari, maktab sumkasi, darsliklar majmuasidan iborat Prezident sovgʻalari topshirildi. Bolalar uchun bu tantana nafaqat maktab atalmish maʼrifat maskaniga qadam qoʻyish, balki hayotidagi yangi davrga yoʻl ochuvchi hayajonli, orziqib kutilgan va unitilmas sana sifatida xotiralarida muxrlandi.

Har bir umumtaʼlim maktabida oʻtkazilgan tadbirda tasdiqlangan jadvalga muvofiq tuman hokimi, sektorlar rahbarlari, deputatlar, muassasa va tashkilotlar rahbarlari, Maktabgacha va maktab taʼlimi boʻlimi masʼullari, keng jamoatchilik vakillari, mahalla faollari va ota-onalar qatnashdi.

Tadbirlar avvalida Oʻzbekiston va Qoraqalpogʻiston Respublikalarining davlat madhiyalari yangrab, oʻquvchilar – navqiron avlod vakillari qoʻllarini koʻksiga qoʻyib, yurt madhini joʻr boʻlib kuylashdi.

33-sonli umumtaʼlim maktabida boʻlib oʻtgan shunday tadbirda tuman hokimi Sobir Xoʻjametov ishtirok etib, yigʻilganlarni Mustaqillik bayrami va yangi oʻquv yilining boshlanishi bilan tabrikladi.

Tuman hokimi oʻz nutqida barchani yangi oʻquv yili bilan qizgʻin muborakbod etib, ilmga chanqoq oʻquvchilar va jonkuyar oʻqituvchi-murabbiylarga omad hamda muvaffaqiyatlar tiladi. Ayniqsa, maktabga ilk bor qadam qoʻygan 1-sinf oʻquvchilarini, ularning ota-onalarini farzandlarining hayotida yangi davr boshlanayotgani bilan tabriklab, maʼrifat maskanida yetuk insonlar boʻlib kamol topishlariga tilakdoshlik bildirdi.

Taʼkidlanganidek, bugun mamlakatimizda “Yangi Oʻzbekiston – maktab ostonasidan boshlanadi”, degan ezgu gʻoya asosida amalga oshirilgan keng koʻlamli maʼmuriy islohotlar taʼlim sohasi rivojiga xizmat qilyapti. Keyingi yillarda mamlakatimizda yuzlab zamonaviy maktablar barpo etilib, Prezident va ijod maktablari yoshlarimizning bilimlarini keng dunyoga namoyish etish imkonini yaratdi. Ixtisoslashtirilgan maktablar tarmogʻida esa oʻquvchilar oʻzlari qiziqqan fanlardan chuqurlashtirilgan tarzda ham nazariy, ham amaliy bilimlarni oʻrganishmoqda.

Maʼlumot oʻrnida, yakunlangan oʻquv yilida Amudaryo tumanidagi umumtaʼlim maktablarining 11-sinfini 2963 nafar oʻquvchi bitirdi. Shundan 2597 nafari oliy taʼlim muassasalariga qabul qilish imtixonlarida ishtirok etishdi. Oʻquvchilardan 757 nafari imtihonlardan muvaffaqaiyatli oʻtishdi, xususan, 164 nafar grant, 593 nafari toʻlov shartnoma asosida oliy taʼlim muassasalariga qabul qilindi. Eʼtirof etish joizki, 40-sonli umumtaʼlim maktabining 11-«D» va 36-sonli umumtaʼlim maktabining 11-«G» variativ sinfi oʻquvchilari 100 foiz oliy taʼlim muassasalariga qabul qilindi.

Maktabning bayromana bezatilgan hovlisida tantana davom etdi. Musiqa sadosi ostida oʻquvchilar bilimga chorlovchi sheʼr va qoʻshiqlar ijro etishdi. Birinchi sinfga qadam qoʻygan oʻquvchilar tantanali tarzda Prezident sovgʻalarini tuman hokimi Sobir Xoʻjametov qoʻlidan qabul qilib olishdi. Ular maktabda aʼlo baholarga oʻqishga, bilimlarni qunt bilan egallashga vaʼda berishdi.

Bunday tantanalar tumanimizning boshqa maktablarida ham koʻtarinki saviyada tashkil etildi. “Birinchi qoʻngʻiroq” chalinganidan soʻng oʻquvchilar barcha qulayliklarga ega, zamonaviy jihozlangan, shinam sinfxonalar sari hayajon va ishtiyoq bilan yoʻl oldi.

Tumandagi 22-sonli maktabda ham “Bir boʻlsak – yagona xalqmiz, birlashsak –Vatanmiz” shiori ostida “Mustaqillik darsi” oʻtildi. Ushbu darslarda istiqlol yillarida erishilgan yutuqlar, yoshlarimiz qoʻlga kiritayotgan marralar hamda milliy tariximizning yorqin lavhalari haqida oʻquvchilarga soʻzlab berildi. Zotan “Mustaqillik darsi”dan koʻzlangan maqsad yangi oʻquv yilini oʻquvchilar tafakurini milliy va umuminsoniy qadriyatlar, Vatanga muhabbat va sadoqat, insonparvarlik tuygʻulari bilan uygʻun holda boshlashdan iborat.

“Birinchi qoʻngʻiroq” va “Mustaqillik darsi” tadbirlari oʻquvchilar, ota-onalar, pedagoglar uchun shukuhli tarzda oʻtdi.    

Rayhon Yakubova, tuman Maktabgacha va maktab taʼlimi boʻlimining Maktablar faoliyatini muvofiqlashtirish shoʻʼbasi metodisti