Tarbiya va taʼlim bogʻchadan boshlanadi

Maktabgacha taʼlim tashkiloti hayotini bolalarga taʼlim-tarbiya berish bilan bir qatorda bayramlarsiz, maʼnaviy-maʼrifiy tadbirlarsiz tasavvur etish qiyin. Milliy va umumbashariy bayramlarni tashkil etish orqali bolajonlar ongida milliy-anʼanaviy qadriyatlarimizni shakllantirish maqsad qilingan.

Darhaqiqat, bayram — ijtimoiy, madaniy va maʼnaviy yutuqlarni namoyish etuvchi, shu yutuqlar asosida tarbiyalovchi muhim vosita hisoblanadi. Shu boisdan bayramlar tarbiyalanuvchilar tarbiyasiga ijobiy taʼsir qiluvchi oʻziga xos sehrli kuchga egadir.

Shu maqsadda maktabgacha taʼlim tashkilotlarida tashkil etilayotgan «Salom, bogʻcha!» tadbirlari bolajonlar bilan oʻyin-kulgi tarzida, ertak kitoblarni oʻqish, qiziqarli suhbatlar, qoʻgʻirchoq teatri tomoshalari shaklida oʻtkazilyapti. Amudaryo tumanidagi 2-sonli davlat maktabgacha taʼlim tashkilotida istiqlolimizning 33 yilligi hamda mamlakatimizda 2024-2025-oʻquv yili boshlanishi munosabati bilan «Bir boʻlsak – yagona xalqmiz, birlashsak – Vatanmiz!» shiori ostida tashkil etilgan «Salom, bogʻcha!» nomli tadbir ham bolajonlarga olam-olam quvonch baxsh etdi.

Tadbir davomida bolajonlar bogʻchada olgan bilimlarini namoyish etishdi. Xususan, Ona-Vatan, bogʻcha hamda bolalikni madh etuvchi sheʼrlarni ifodali oʻqishdi. Bayramona kuy-qoʻshiqlarga guruh boʻlib raqs ijro etishdi va tengdoshlari bilan birgalikda oʻynab-kulishdi.

Shu oʻrinda aytish joizki, muassasamizda tarbiyalanayotgan bolajonlar musiqa toʻgaragi rahbari Otabek Xudoyberganov boshchiligida tumanimizda oʻtkazilayotgan bayramlarda oʻzlarining yod olgan sheru qoʻshiqlari hamda tayyorlagan raqslari bilan faol ishtirok etib kelishadi.

Ochiq darslar vaqtida bolajonlarga istiqlol gʻoyalari, vatanparvarlik va yurtga sadoqat tuygʻulari, umuminsoniy va milliy qadriyatlarimiz ularning yoshiga mos tarzda har xil oʻyinlar, qoʻgʻirchoq teatri tomoshalari, ertak qahramonlari timsoli orqali tushuntirildi.

Maʼlumot oʻrnida, Amudaryo tumani Qipchoq ShFY hududida joylashgan 2-sonli davlat maktabgacha taʼlim tashkilotida bugungi kunda 13ta guruh tashkil etilgan boʻlib, ushbu guruhlarda 325 nafar oʻgʻil-qiz tarbiya qilinmoqda. Bolajonlarga 47 nafar xodim bilim va tarbiya berib kelishmoqda. Shundan 15 nafarini oliy maʼlumotli xodimlar tashkil etadi.

11-sonli umumtaʼlim maktabida tashkil etilgan maktabgacha tayyorlov guruhida 2023-2024 oʻquv yilida 25 nafar oʻgʻil-qiz tarbiyalanib, umumtaʼlim maktablarining 1-sinfiga kuzatildi. Bu yil ham ushbu guruhga 25 nafar bolajonlar qabul qilindi. Maktabgacha taʼlim uzluksiz taʼlimning boshlangʻich qismi boʻlib, bogʻcha tarbiyasi bolaning sogʻlom va rivojlangan shaxs sifatida shakllanishida muhim ahamiyatga ega hisoblanadi.

Bogʻcha yoshidagi bolalarda maʼlumotlarni qabul qilish, til oʻrganish koʻnikmalari kuchli hisoblanadi. Muassasamizda bolajonlar rus va ingliz tili toʻgaraklarida xorijiy tillardan boshlangʻich bilimlarni olishmoqda.

Bundan tashqari «Yilning eng yaxshi tarbiyachisi-2024» kasbiy koʻrik tanlovida muassasa metodisti Salomat Turayeva tuman bosqichida 1-oʻrinni olib, Qoraqalpogʻiston Respublikasi bosqichida munosib ishtirok etdi.

Shu oʻrinda taʼkidlash joizki, kishilik jamiyati paydo boʻlganidan buyon tarbiya tushunchasi mavjud. Zero, inson yer yuzidagi eng mukammal zot boʻlishi uchun, avvalo, tarbiyalanishi lozim. Shunday ekan hayotimizda maktabgacha taʼlimning oʻrni va ahamiyati hamisha muhim boʻlib qolaveradi.

Muhabbat Xudoyberganova, 2-sonli DMTT direktori