“OChIQ EShIKLAR KUNI” OʻTKAZILDI

Oʻsib kelayotgan yosh avlodni ona Vatanga sadoqat, istiqlol gʻoyalariga hurmat-ehtirom, vatanparvarlik va xalqparvarlik ruhida tarbiyalash, ayniqsa, ular ongiga koʻp millatli xalqimizga xos boʻlgan milliy-maʼnaviy qadriyatlarni singdirish yangilanayotgan Oʻzbekistonning yoshlarga oid eng ustuvor siyosati hisoblanadi va bu taʼlim-tarbiya sohasida faoliyat olib boruvchi har bir xodimning zimmasidagi masʼuliyatli burchidir.

Aslini olganda, koʻp millatli Oʻzbekiston xalqini milliy-maʼnaviy qadriyatlar birlashtirib turadi va bu birdamlik muhiti xalqimiz hayotiga goʻzallik, ziynat bagʻishlaydi. Shu bois, xalqimiz birdamlik, millatlararo totuvlik, oʻzaro mehr- oqibat tuygʻulariga yoʻgʻrilgan bayramona tadbirlarni quvonch va tantana bilan nishonlab, bu kabi tadbirlardan olam-olam zavq olishadi.

Joriy yilning 15-sentyabr sanasida Amudaryo tuman Maktabgacha va maktab taʼlimi boʻlimiga qarashli “Barkamol avlod” bolalar maktabida boʻlib oʻtgan “Bir boʻlsak – yagona xalqmiz, birlashsak – Vatanmiz!” shiori ostida boʻlib oʻtgan “Ochiq eshiklar kuni” bayram tadbiri ham xalqlar doʻstligi, millatlararo totuvlik, vatanparvarlik tuygʻulari ulugʻlangani bilan har bir qalbga quvonch va shodlik bagʻishladi.

Chunki mazkur ilm dargohi toʻgaraklari mashgʻulotlarida shugʻullanayotgan iqtidorli bolalar Amudaryo tumanida istiqomat qilayotgan 10 dan ortiq millat vakillarining farzandlari va nabiralari boʻlib, ular bir ota-onaning farzandlari kabi ahil va inoqlikda, yagona ezgu maqsad – Yangi Oʻzbekistonga munosib farzand sifatida kamol topish orzusi bilan ustozlaridan taʼlim-tarbiya oladilar.

Tadbir doirasida maktabning turli toʻgaraklar mashgʻulotlarida shugʻullanuvchi oʻquvchi-yoshlar tomonidan qoʻl mehnati koʻrgazmasi namoyish etildi. Koʻrgazmadan joy olgan tikuvchilik namunalari, rang-barang gullar, turli modellar, qoʻlda toʻqilgan bolalar va oʻsmirlar uchun moʻljallangan bejirim va zamonaviy kiyim-kechaklar, yumshoq va qattiq oʻyinchoqlar, shuningdek, yogʻoch oʻymakorligi buyumlari, kulolchilik mahsulotlari tadbirda ishtirok etayotgan ota-onalarda oʻz farzandlaridan faxrlanish tuygʻularini uygʻotdi.

“Barkamol avlod” bolalar maktabida faoliyat olib boruvchi toʻgaraklar rahbarlari tadbir ishtirokchilariga 2024-2025 oʻquv yilida tashkil etilayotgan toʻgaraklar haqida keng tushunchalar berishib, bu toʻgaraklar faoliyati xususida batafsil maʼlumotlar va rangli bukletlar taqdim etdilar. Shuningdek, ota-onalar maktabning badiiy havaskorlik toʻgaragi toʻgʻrisida yanada yaqinroq tanishishlari uchun maktabda tashkil etilgan “Shoʻx bolalar” badiiy jamoasi tomonidan tayyorlangan kontsert dasturi ham namoyish etildi.

Shuni alohida taʼkidlash joizki, mazkur jamoa maktab oʻquvchilari oʻrtasida anʼanaviy tarzda oʻtkazilib kelinayotgan turli koʻrik-tanlovlarning doimiy ishtirokchisi va sovrindori sanaladi. Vatanparvarlik, doʻstlik va millatlararo totuvlik, birdamlik tuygʻulari ulugʻlangan, “Bir boʻlsak – yagona xalqmiz, birlashsak – Vatanmiz!” shiori ostida, 2024-2025 oʻquv yili boshlanishi munosabati bilan oʻtkazilgan “Ochiq eshiklar kuni” tantanali bayram tadbirida “Shoʻx bolalar” badiiy jamoasi tomonidan ijro etilgan oʻzbek, qoraqalpoq, qozoq va boshqa qardosh xalqlarning kuy va qoʻshiqlari, shoʻx-shodon raqslari barchaga xush kayfiyat bagʻishladi.

Shu kunning oʻzida koʻp millatli Amu elining ilmga chanqoq farzandlarini bagʻriga olgan bilim maskani toʻgaraklarida ilk mashgʻulotlar boshlandi.

Shuningdek, “Barkamol avlod” bolalar maktabi masʼullari tomonidan Amudaryo tumanining chekka hududidagi 29- va 45-sonli umumtaʼlim maktablarida ham “Ochiq eshiklar kuni” tadbirlari oʻtkazilib, bu tadbirlarga mazkur taʼlim-tarbiya muassasalari hududidagi oʻquvchilarning ota onalari ham qamrab olindi. Tadbirlarda ishtirok etgan ota-onalar oʻz farzandlarining zamon talablari darajasida taʼlim-tarbiya olishlari uchun davlatimiz tomonidan yaratib berilgan keng imkoniyat va shart-sharoitlardan mamnun ekanliklarini bildirdilar.

Robiya Yoʻldosheva.