Tumanning iqtisodiy salohiyatini oshirish yoʻlida

Mamlakat iqtisodiyotini yuksaltirish va aholi turmush farovonligini yanada yaxshilashda yangi ishlab chiqarish quvvatlari tashkil qilishning ahamiyati nihoyatda katta. Amudaryo tumanida ham bu borada salmoqli ishlar amalga oshirilmoqda.

“NUKUS DILISHA” MChJ tomonidan amalga oshirilayotgan un ishlab chiqarish zavodi loyihasi Qoraqalpogʻiston Respublikasidagi muhim sanoat tashabbuslaridan biri boʻlib, uning natijasida mahalliy un mahsulotlariga boʻlgan talabni qondirish, yangi ish oʻrinlari yaratish va aholi farovonligini oshirish maqsad qilingan. Korxona uchun Prezident farmoni asosida qishloq xoʻjaligiga moʻljallanmagan 1,5 gektar va qishloq xoʻjaligiga moʻljallangan 40,6 gektar yer maydonlari toʻgʻridan-toʻgʻri ajratilgan. Loyihaning umumiy qiymati 11 milliard soʻmni tashkil etadi, shundan 7,9 milliard soʻmi bank kreditidir.

Loyiha toʻliq amalga oshirilgach, zavodning ishlab chiqarish quvvati yiliga 2 ming tonna unni tashkil etishi rejalashtirilgan boʻlib, bu hajm mahalliy ehtiyojlarni qondirish uchun toʻliq yetarli darajada. Shuningdek, zavodda 30 nafar yangi ish oʻrinlari yaratilishi kutilmoqda. Bu esa aholi bandligiga ijobiy taʼsir koʻrsatadi.

Ayni paytda zavod qurilish ishlarining 80 foizi bajarilgan. Gʻalla qabul qilish punktlari toʻliq qurilib, ishlab chiqarish tsexini tayyorlash ishlari olib borilmoqda. Zarur asbob-uskunalar uchun kredit mablagʻlari ajratilgan boʻlib, ularni olib kelish boʻyicha tegishli choralar koʻrilmoqda. Loyihani muvaffaqiyatli amalga oshirish uchun Turkiyadan tajribali mutaxassislar jalb qilingan va 2024-yil 20-dekabr sanasigacha zavodni toʻliq ishga tushirish rejalashtirilmoqda.

Tumanning iqtisodiy salohiyatini yanada oshirish maqsadida amalga oshirilayotgan yirik loyihalardan yana biri “AMUDARYOTEX” MChJga qarashli oʻsimlik yogʻini ishlab chiqarish loyihasidir. Ushbu loyiha mahalliy bozorda oʻsimlik yogʻiga boʻlgan talabni qondirishga hissa qoʻshish bilan birga, tuman aholisi uchun qoʻshimcha ish oʻrinlarini yaratishga ham xizmat qiladi.

Loyihaning umumiy qiymati 102 milliard soʻmni tashkil qiladi, bundan 3,5 million dollar miqdoridagi mablagʻ xorijiy investitsiya sifatida kiritilgan. Korxona toʻla quvvatda yiliga 10 ming tonna oʻsimlik yogʻini ishlab chiqarishga moʻljallangan. Korxona ishga tushsa, 85 nafar yurtdoshlarimiz doimiy ish oʻrni va barqaror daromadga ega boʻladilar.

Korxonaga uskunalar asosan Xitoy Xalq Respublikasidan keltirilgan boʻlib, ishlab chiqarish jarayonlarini samarali tashkil etish maqsadida korxonaga “Agro bank” tomonidan moliyaviy xizmatlar koʻrsatib kelinmoqda.

Loyihaning qurilishi 2020-yil mart oyida boshlangan boʻlib, 2024-yil dekabr oyida toʻliq foydalanishga topshirilishi rejalashtirilgan. Mazkur korxona 2,5 gektar maydonda joylashgan va uning 10,3 ming kvadrat metrini yopiq inshootlar tashkil etadi. Bu yerdagi ishlab chiqarish jarayoni nafaqat ichki bozor talabini qondirish, balki eksport salohiyatini oshirishga ham xizmat qiladi.

Korxona tomonidan yiliga 12 milliard soʻm miqdorida soliq toʻlanishi hisob-kitob qilingan. Shu sababli ham loyihaning ishga tushishi natijasida tumanning iqtisodiy va ijtimoiy rivojlanishi yanada tezlashadi.

Mazkur loyihalar tuman uchun muhim iqtisodiy ahamiyatga ega boʻlib, ular mahalliy ishlab chiqaruvchilarni qoʻllab-quvvatlash hamda yangi ish oʻrinlari yaratish orqali aholi turmush farovonligini oshirishga xizmat qiladi.