Madaniyat sohasi vakillari va nodavlat notijorat tashkilotlari uchun seminar-trening tashkil etildi

6-fevral kuni Oʻzbekiston madaniyat va sanʼat instituti Nukus filialida “Sohaga investitsiyalarni jalb qilish va chet el grantlari bilan ishlash” mavzusida Qoraqalpogʻiston Respublikasidagi madaniyat sohasi vakillari va nodavlat notijorat tashkilotlari uchun seminar-trening boʻlib oʻtdi.

Mazkur tadbir Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi, Qoraqalpogʻiston Respublikasi Vazirlar Kengashining Tashqi begʻaraz koʻmak mablagʻlarini jalb qilish va donorlar bilan ishlash boʻlimi va Qoraqalpogʻiston Respublikasi Madaniyat vazirligi bilan hamkorlikda tashkil etildi. Tadbirda Qoraqalpogʻiston Respublikasida faoliyat yuritayotgan madaniyat muassasalari, ijodiy uyushmalar hamda nodavlat notijorat tashkilotlari vakillari ishtirok etdi.

Tadbir Qoraqalpogʻiston Respublikasi Vazirlar Kengashining Tashqi begʻaraz koʻmak mablagʻlarini jalb qilish va donorlar bilan ishlash boʻlimi boshligʻi Kamalatdin Idirisov hamda Oʻzbekiston nodavlat notijorat tashkilotlari milliy assotsiatsiyasi Qoraqalpogʻiston Respublikasi hududiy boʻlinmasi boshligʻi Quoʻat Karimxodjayevlar tomonidan kirish soʻzi bilan ochib berildi hamda madaniyat sohasi va nodavlat notijorat tashkilotlari vakillari uchun xalqaro moliyaviy imkoniyatlarning ahamiyati alohida taʼkidlandi.

Seminar-trening ishtirokchilarga xalqaro grantlar va investitsiyalarni jalb qilish jarayonini tushuntirish, grant loyihalarini ishlab chiqishda yoʻl qoʻyilayotgan xatolarni bartaraf etish va moliyaviy imkoniyatlardan samarali foydalanish boʻyicha koʻnikmalarni shakllantirishga xizmat qilgani bilan ahamiyatli boʻldi. Shuningdek, ishtirokchilarga xalqaro tashkilotlar bilan hamkorlik qilish, grant olish uchun zarur hujjatlar toʻplami, loyiha gʻoyasini toʻgʻri shakllantirish va moliyaviy hisobotlarni yuritish boʻyicha amaliy tushunchalar berildi.

Tadbir davomida mutaxassislar tomonidan “Grant oʻzi nima?”, “Grant mavzulari boʻyicha saytlar roʻyxati”, “Grant loyihalarini tayyorlashda muammolarni aniqlash va ularning yechimlarini toʻgʻri koʻrsatish” kabi mavzularda fikr-mulohazalar bildirilib, grant mablagʻlari va ularning turli shakllari hamda xalqaro tashkilotlar va agentliklar tomonidan eʼlon qilinadigan grant tanlovlariga qanday murojaat qilish mumkinligi batafsil tushuntirildi. Ishtirokchilar amaliy mashgʻulotlar orqali grant loyihalarini yozishda yoʻl qoʻyiladigan xatolar va ularni tuzatish yoʻllari bilan tanishtirildi. Shuningdek, grant ajratuvchi tashkilotlarning moliyaviy shaffoflik boʻyicha talablarini bajarish, hisobdorlik va hisobot yuritish jarayonlari haqida aniq tavsiyalar berildi.

Seminar-treningning amaliy mashgʻulotlar qismida grant loyihalarini tayyorlash shartlari, hisobdorlik masalalari, loyihalarning moliyaviy tarkibi va samaradorligini oshirish boʻyicha qimmatli maslahatlar berildi. Shuningdek, ishtirokchilar bilan jonli muloqot qilinib, grant tanlovlarida muvaffaqiyatga erishish uchun qanday strategiyalar ishlab chiqish lozimligi borasida yoʻl-yoʻriqlar koʻrsatildi.

Tadbir davomida ishtirokchilar oʻzlarini qiziqtirgan barcha savollarga mutaxassislar tomonidan batafsil javob va tavsiyalar olishdi.

Shohzod Qurbonboyev