Nuroniy onaxonlar – elning fayzi va duogoʻyi

Insoniyat tarixida ayol har doim ezgulik, vafo va mehr-muhabbat timsoli boʻlib kelgan. Ayniqsa, xalqimiz uchun ona siymosi har narsadan ustun, uning duosi esa eng buyuk kuch sanaladi. Shu bois yurtimizda xotin-qizlarga, xususan, hayotini el-yurt xizmatiga bagʻishlagan nuroniy onaxonlarga eʼtibor va hurmat ustuvor ahamiyat kasb etadi.

8-mart – Xalqaro xotin-qizlar kuni arafasida oʻtkazilayotgan ezgu tashabbuslar bunga yorqin dalildir. Bayram munosabati bilan tuman hokimi oʻrinbosari, Oila va xotin-qizlar boʻlimi boshligʻi Goʻzal Saburova boshchiligidagi masʼullar nuroniy onaxonlarning xonadonlariga tashrif buyurib, ularni samimiy qutlashdi.

Chordara mahallasida istiqomat qiluvchi 80 yoshli nuroniy onaxon Svetlana Plotshina umrining 37-yilini yosh avlodga bilim berishga bagʻishlagan. U maktabda rus tili oʻqituvchisi sifatida minglab shogirdlarga taʼlim-tarbiya bergan. Bayram munosabati bilan tashrif buyurgan masʼullar uni samimiy muborakbod etib, sovgʻa-salomlar tuhfa qilishdi.

Shuningdek, masʼullar Xizr eli mahallasida yashovchi 110 yoshli nuroniy onaxon Pardagul Bekniyozova xonadoniga ham tashrif buyurishdi. 110 bahorni qarshilagan ushbu tabarruk onaxon uzoq yillar el-yurt xizmatida boʻlib, bugun farzand, nabira va chevaralarining duogoʻyi sifatida umr kechirmoqda.

Shu kuni Kuyuk koʻpir ovulida yashovchi 102 yoshli Sharifa Babaniyozova xonadoniga ham tashrif buyurildi. Ona mehrining cheksizligi, inson hayotidagi beqiyos oʻrni haqida soʻz ketganda, mana shunday nuroniy onaxonlar timsolida bu haqiqat yanada yaqqol namoyon boʻladi. Ular yoshligida hayot qiyinchiliklari bilan kurashib, mashaqqatli mehnat qilgan, bugungi farovon kunlarning asosini yaratgan fidoyi avlod vakillaridir.

Mamlakatimizda xotin-qizlarning jamiyat hayotidagi ishtirokini kengaytirish, ularning mehnat sharoitlarini yaxshilash, ijtimoiy muhofazasini taʼminlash borasida izchil islohotlar olib borilmoqda. Ayollar nafaqat oilada, balki davlat boshqaruvi, iqtisodiyot, fan-taʼlim, tibbiyot, sanʼat va madaniyat sohalarida ham yetakchi kuchga aylangan.

Bugun jamiyatda nuroniy onaxonlarimizning duosi, hayotiy tajribasi bebaho xazinaga aylanmoqda. Davlatimiz rahbari tomonidan xotin-qizlarning ijtimoiy faolligini oshirish, ularga munosib sharoit yaratish masalalariga alohida eʼtibor qaratilyapti. Shu bois, 8-mart arafasida bunday hurmat-eʼtiborning namoyon boʻlishi yuragida ona siymosiga nisbatan cheksiz muhabbat bilan yashaydigan xalqimizga xos ezgu qadriyatlarning ifodasidir.

Nuroniy onaxonlar – oʻtgan asrning barcha sinovlarini oʻz koʻzi bilan koʻrgan, el-yurtga fidoyi xizmat qilgan insonlar. Ular tinch va farovon yurtda farzandlari, nabiralari davrasida umr kechirayotganidan shukronalar aytib, duolar qilmoqda. Ularning xonadoniga tashrif buyurish, koʻngliga quvonch ulashish eʼtibor bilan birga insoniy burch hamdir.

Bugun mamlakatimizda xotin-qizlar, ayniqsa, hayotini fidokorona mehnatga bagʻishlagan nuroniy onaxonlar doimiy eʼtibor va eʼzozda. Zero, ayol – jamiyat tayanchi, oila bekasi, farzand tarbiyachisi. Ularga boʻlgan hurmat esa faqat bayram arafasida emas, balki doimo yuksak boʻlishi kerak.

S. Olloyorova, Amudaryo tumani hokimligi mutaxassisi.