Tumanda tibbiyot sohasini oʻrganish yakunlari boʻyicha yigʻilish oʻtkazildi

Bugun Yangi Oʻzbekistonda barcha sohalarda olib borilayotgan islohotlar, qabul qilinayotgan qonun hujjatlari va sohalarga joriy etilayotgan yangicha yondashuvlardan asosiy maqsad xalqni rozi qilish, insonlarning oʻz hayotidan mamnun holda yashashlariga zamin yaratishdir. Bu borada olib borilayotgan islohotlarning amaldagi natijasi, qabul qilinayotgan qonun hujjatlarining ijrosi ustidan esa doimiy nazorat oʻrnatilgan.

Yaqinda Amudaryo tumani Prokuraturasi tomonidan Oʻzbekiston Respublikasining “Fuqarolar sogʻligʻini saqlash toʻgʻrisida”gi Qonuni hamda sohaga doir boshqa qonun hujjatlari ijrosi boʻyicha tuman Tibbiyot birlashmasida oʻrganish ishlari olib borilgan edi. Tekshiruvlar natijalari tuman Tibbiyot birlashmasi faoliyati talab darajasida yoʻlga qoʻyilmaganligini va baʼzi hollarda aholi salomatligini taʼminlash tadbirlari oʻz holiga tashlab qoʻyilganligini koʻrsatdi.

Xususan, aholining umumiy kasallanish darajasi oʻrganilganda, 2023-yilda turli xil kasalliklar yuzasidan amalga oshirilgan murojaatlar 47 ming 426 tani tashkil qilgan boʻlsa, oʻtgan 2024-yilda bu koʻrsatkich 50 ming 279 tani tashkil qilib, 8 foizga oshgan.

Aholining reproduktiv salomatligini saqlashdagi nuqsonlar, onalar va bolalar tibbiy koʻrigi va davolash tadbirlari oʻz vaqtida sifatli va tizimli tashkil etilmaganligi oqibatida 2024-yilda 74 nafar chaqaloqlar oʻlimi sodir boʻlib, bu koʻrsatkich ham oʻtgan 2023-yilga nisbatan 7 foizga koʻpaygan.

24-mart kuni tuman Madaniyat boʻlimi binosida tuman Prokuraturasi tomonidan Oʻzbekiston Respublikasining “Fuqarolar sogʻligʻini saqlash toʻgʻrisida”gi Qonuni, sohaga doir boshqa qonun hujjatlari ijrosini taʼminlash borasida amalga oshirilayotgan ishlar holati hamda yuqorida qayd etilgan kamchiliklarni bartaraf etish masalalariga bagʻishlangan yigʻilish boʻlib oʻtdi.

Yigʻilishda tuman prokurori Bahrom Masharipov, tuman Tibbiyot birlashmasi bosh shifokori Faxriddin Abdullayev, birlashmaning boʻlim boshliqlari, oilaviy poliklinikalar shifokorlari hamda xodimlari, OAV vakillari ishtirok etdi.

Yigʻilishda tuman Tibbiyot birlashmasi faoliyatidagi muammo va kamchiliklar, ularni keltirib chiqaruvchi omillar, bartaraf qilish yoʻllari, xalqimizni sifatli tibbiy xizmatlar bilan taʼminlash masalalari xususida soʻz bordi.

Shuningdek, tibbiyot sohasida korruptsiyaga qarshi kurashish masalasiga alohida toʻxtalib oʻtildi. Taʼkidlanganidek, korruptsiya tibbiy xizmatlar sifatiga putur yetkazib, aholining sogʻliqni saqlash tashkilotlariga va davlatga boʻlgan ishonchini kamaytiradi.

Korruptsiyaga qarshi kurashish uchun qonunchilikni kuchaytirish, tibbiy xodimlarning maoshi va ijtimoiy taʼminotini yaxshilash borasida amaliy ishlar qilinayotgani qayd qilindi. Bu borada jamoatchilik nazorati va fuqarolarning faol ishtiroki ham muhim ahamiyatga ega ekani alohida qayd qilindi.

Yigʻilishda soʻzga chiqqan masʼullar ushbu koʻrsatmalarga amal qilgan holda, muammolarni bartaraf qilish yuzasidan taʼsirchan chora-tadbirlar ishlab chiqib, aniqlangan kamchiliklarni bartaraf etish zimmalaridagi masʼuliyat ekanini taʼkidladilar.

B.Masharipov, Amudaryo tuman prokurori