SIL - DAVOSIZ DARD EMAS
Sil kasalligi surunkali infektsion kasallik boʻlib, organizm turli sistemalarining zararlanishi turli - tuman klinik belgilar bilan kechadi. Sil koʻp tarqalgan infektsion kasallikdir.
Silga xos belgilar: umumiy holsizlik, ishtaha kamligi, taʼsirchanlik, ish qobiliyatining pasayishi, ozib ketish, tana haroratining yuqorilashi, koʻkrak qafasida ogʻriqlar, nafas siqishi, qon tuflash.
Yuqorida qayd etilgan belgilar paydo boʻlsa, ftiziatr shifokorga murojaat qilish zarur.
Yigirma birinchi asrga kelib ham sil kasalligining tobora koʻp tarqalishi sogʻlikni saqlash tizimida jiddiy muammo boʻlib qolmoqda.
Silga qarshi kurash xizmati bugungi kunda yuksak darajaga koʻtarildi va davlat siyosati darajasida eʼtirof etildi. Tumanimizda silga qarshi kurashish xizmati Koʻp tarmoqli markaziy poliklinika Ftiziatriya boʻlinmasi, markaziy shifoxona ftiziatriya boʻlimi va Qishloq vrachlik punktlari tomonidan amalga oshirilmoqda . 2014-yil avgust oyida "Silni kompleks davolash hamma uchun” dasturi boʻyicha Qoraqalpogʻiston Respublikasi Sogʻliqni Saqlash Vazirligi va "Chegarasiz shifokorlar” tashkiloti tomonidan umumiy amaliyot shifokorlari, ftiziatrlar va oʻrta tibbiy xodimlarga oʻquv trening mashgʻulotlari oʻtkazildi. 2014-yil oktyabr oyidan doriga turgʻun sil formalari aniqlanib, davolash konsiliumi qarori asosida davolash ishlari olib borilmoqda.
Sil kasalligiga chalingan bemorlarni davolash 6-8 oy, doriga turgʻun formalariga chalingan bemorlarni davolash 20-24 oy muddatni talab etadi. Bu muddat davomida shifokorlar tomonidan tavsiya qilingan dorilarni qabul qilishda tanaffusga mutlaqo yoʻl qoʻyilmasligi kerak.
Esingizda tuting: davolanish davomida sil kasalligining yuqumliligi kamayib boradi. Sil kasalligini aniqlash va davolash xizmatlari bepul koʻrsatiladi. Nukus shahridagi Respublika silga qarshi kurashish dispanseri Referens laboratoriyasiga bemorlarning balgʻam namunalari yuborilib, tekshirish orqali sil jarayoni aniqlanadi. Shuningdek, koʻkrak qafasi flyurografiyasi va rentgenografiyasi sil jarayonini aniqlashda katta ahamiyatga ega.
Aholi orasida silga qarshi kurashish, silni barvaqt aniqlash maqsadida chuqurlashtirilgan tibbiy koʻriklarda faol qatnashish maqsadga muvofiqdir. Shu bilan birga silning oldini olishda har yili kamida ikki marta koʻrikdan oʻtish, sogʻlom turmush tarziga, shaxsiy gigiyena qoidalariga amal qilish ahamiyatlidir.
Qisqa qilib aytganda, sil davosiz dard emas. U qancha erta aniqlansa, davolash ham shunchalik oson boʻladi.
Gulora ABDULLAYeVA, tuman Tibbiyot birlashmasi ftiziatriya boʻlimi mudirasi.
Feruza Toʻrayeva,
ftiziatr.
(Foto - http://fsh.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
