“UCh AVLOD UChRAShUVI” TADBIRI YoShLAR QALBIDA KEKSA AVLOD VAKILLARI HAYoTIGA HURMAT TUYGʻUSINI UYGʻOTDI

Asrlar davomida shakllanib, oʻzining goʻzal takomiliga yetgan, xalqimizga xos ibratli fazilatlar talaygina: oʻzaro mehr-u oqibat, millatlararo totuvlik, kattalarga hurmat, kichiklarga izzat kabi xislatlar oʻsib kelayotgan yosh avlod vakillari uchun hamisha yuksak maʼnaviy tarbiya maktabi vazifasini oʻtab kelgan.

Ayniqsa, “Hamma narsa inson qadri uchun” degan ezgu gʻoya bilan sugʻorilgan samimiy munosabatlar zamirida yosh avlodni milliy oʻzlik asosida tarbiyalash, keksa avlod vakillarining boy hayotiy tajribalariga tayangan holda millat va xalq farovonligi, ona Vatan obodligi hamda tinchligi yoʻlida fidoyi xizmat qilishga daʼvat etishdek ezgu niyatlar mujassam.

Chunki bugungi zamonaviy dunyoda turli mafkuraviy xurujlar tobora avj olib borayotgan davrda ana shunday ezgu niyatlarni oʻzida mujassam etgan daʼvatkor ruhdagi maʼrifiy suhbatlar, katta hayot tajribasiga ega nuroniylar bilan uchrashuvlardan yoshlar maʼnaviy kuch, oziq oladilar. Ota-bobolari, ajdodlarining matonat va jasoratga toʻla hayot yoʻllaridan faxrlanib yashashga odatlanadilar.

Amudaryo tuman Maktabgacha va maktab taʼlimi boʻlimi tasarrufidagi 82-sonli umumtaʼlim maktabida boʻlib oʻtgan “Uch avlod uchrashuvi” mavzusidagi maʼnaviy-maʼrifiy tadbir ham mazkur maktab pedagogika jamoasi va oʻquvchi-yoshlar qalbida nuroniy otaxon va onaxonlarning ona Vatan obodligi va farovonligi yoʻlida qilgan uzoq yillik halol va fidoyi mehnatlarini qadrlash, mislsiz matonat va jasoratga toʻla sermazmun umr yoʻllariga nisbatan hurmat hissini uygʻotib, tadbir ishtirokchilariga koʻtarinki kayfiyat bagʻishladi.

Tadbirda “Nuroniy” jamgʻarmasi Amudaryo tuman boʻlimi raisi Bekman Allaberganov, Jumurtov shaharcha fuqarolar yigʻinida istiqomat qiluvchi 95 yoshli Bibi momo Yembergenova, 1925-yilda tavallud topgan, 100 yoshli Tursunoy momo Boltaboyeva, Xalq deputatlari Amudaryo tuman Kengashi deputati, tuman “Barkamol avlod” bolalar maktabi direktori Xonimjon Rajabova, 82-sonli umumtaʼlim maktabi pedagogika jamoasi va oʻquvchi-yoshlar ishtirok etdilar.

Oʻtgan asrning eng ogʻir va tahlikali yillari – qatagʻon siyosati qurbonlari boʻlgan jabrdiydalar hayotiga, shuningdek, ikkinchi jahon urushi azob-uqubatlariga, urushdan keyingi tiklanish yillaridagi xalqimizning mashaqqatli mehnatlariga nafaqat jonli guvoh, balki ana shu mashaqqatli mehnat onlarining ishtirokchilari boʻlgan nuroniy momolar yoshlarga bugungiday farovon va toʻkin-sochin zamon oʻz-oʻzidan boʻlmagani, bu farovon hayot zamirida ota-bobolarimizning mislsiz jasorati va matonati borligini, ularning fidoyiliklari evaziga bunyod boʻlgan baxtli, tinch, osoyishta davrning, mustaqillikning qadriga yetish zarurligini taʼkidladilar. Shu bilan birga ular oʻzlarining uzoq va sermazmun hayot yoʻllari haqida yoshlarga ibratli hikoyalar soʻzlab berdilar.

“Uch avlod uchrashuvi” tadbiri davomida Tursunoy momo Boltaboyeva hamda Bibi momo Yembergenovalar bilan oʻquvchi-yoshlar dildan, samimiy suhbat qurishib, onaxonlarga tashrifi uchun minnatdorchilik bildirishdi.

Uchrashuv yakunida nuroniy momolarga tadbir tashkilotchilari tomonidan sovgʻalar va Amudaryo tuman hokimining Tashakkurnomasi topshirildi.

Robiya YOʻLDOShEVA.