OAV VAKILLARINING SAYYoR QABULI BOʻLIB OʻTDI

Amudaryo tumani Oq oltin ovulida ommaviy axborot vositalari vakillarining sayyor qabuli boʻlib oʻtdi. Unda “Qoraqalpogʻiston” telekanali muharrirlari, boʻlim boshliqlari hamda aholi vakillari ishtirok etdilar. Mazkur tadbir aholining dolzarb muammolarini joyida oʻrganish, fuqarolarni qiynayotgan masalalarni ijtimoiy muhokamaga olib chiqish va ularning yechimiga koʻmaklashish, “Qoraqalpogʻiston” teleradiokanalini yanada rivojlantirishda xalqning fikrini va takliflarini tinglash maqsadida tashkil etildi.

Sayyor qabulda “Qoraqalpogʻiston” telekanali katta muharriri Altingul Oteniyazova, telekanalning Arxiv boʻlimi boshligʻi Paraxat Toʻreyev, telekanal muharrirlari Xurliman Masharipova hamda Islam Dauletnazarovlar aholi bilan ochiq muloqot qildi.

Taʼkidlash kerakki, Qoraqalpogʻiston Respublikasi teleradiokanali mintaqaning ijtimoiy, madaniy va siyosiy hayotini yorituvchi muhim axborot manbalaridan biridir. Soʻnggi yillarda ushbu media tizimini modernizatsiya qilish, texnik bazasini mustahkamlash va professional kadrlar salohiyatini oshirish boʻyicha qator ishlar amalga oshirilmoqda.

Davlatimiz rahbarining axborot siyosatini takomillashtirish borasidagi tashabbuslari doirasida Qoraqalpogʻiston teleradiokompaniyasining faoliyatini zamon talablari asosida tashkil etish, kontent sifatini oshirish hamda raqamli texnologiyalarni joriy qilish boʻyicha keng koʻlamli ishlar boshlab yuborildi.

Avvalo, telekanalning texnik imkoniyatlari tubdan yangilanmoqda. Yangi zamonaviy kameralar, montaj uskunalari, ovoz va video uzatish texnologiyalari joriy etilishi orqali efir sifati sezilarli darajada oshdi. Bu esa nafaqat tomoshabinlar uchun qulaylik yaratmoqda, balki jurnalistlar va rejissyorlar uchun ham ijodiy imkoniyatlarni kengaytirmoqda.

Sayyor qabul davomida jurnalistlar telekanalni yanada rivojlantirish yuzasidan aholi takliflarini tingladilar hamda rahbariyatga yetkazish uchun qayd etib bordilar. Shuningdek, jarayon mobaynida turli sohalarga oid murojaatlarni tinglab, ularni yoritish va mutasaddi tashkilotlar bilan hamkorlikda hal etish boʻyicha ish olib bordilar. Qabulda asosan ijtimoiy infratuzilma, uy-joy masalalari, kommunal xizmatlar, bandlik, tibbiyot va taʼlim sohalariga oid murojaatlar kelib tushdi.

Tadbirda qatnashgan OAV vakillari aholining fikrini eshitibgina qolmay, joylardagi muammolarni jurnalistik surishtiruv orqali yoritish, ularni keng jamoatchilikka havola etish va muammolarga mutasaddilar eʼtiborini qaratish borasida aniq rejalarni belgilab oldilar.

Shuningdek, qabul doirasida fuqarolarga ommaviy axborot vositalariga murojaat qilish tartibi, axborot olish huquqlari va matbuot erkinligi borasida tushuntirishlar berildi.

Bu kabi sayyor qabullar, bir tomondan, xalq bilan ochiq muloqotni kuchaytirsa, boshqa tomondan, jurnalistlarning masʼuliyatini oshirib, jamiyatdagi muammolarni tezkor yoritish va hal etishga xizmat qiladi.

Tadbir yakunida OAV vakillari kelib tushgan murojaatlar boʻyicha tahliliy materiallar tayyorlab, ularni tegishli rasmiy idoralarga yuborish boʻyicha chora-tadbirlar belgilab olindi.

Charos Arslonova, tuman hokimligining Axborot xizmati rahbari.