“Dolzarb 90 kun” loyihasi doirasidagi tadbirlar 46-sonli maktabda iqtidorli yoshlarni kashf etish imkonini bermoqda

Insonning shaxs sifatida shakllanish jarayoni uning bolalik va oʻsmirlik davrida olgan bilim va koʻnikmalariga bogʻliq, deyishadi. “Yoshlikda olgan bilim – toshga oʻyilgan naqsh” iborasi esa insonga ilm-u hunar egallash borasidagi eng maqbul davri – yoshlikning har bir daqiqasidan unumli foydalanishga daʼvat etayotgan kabi jaranglaydi.

Shu nuqtai nazardan olib qaraydigan boʻlsak, joriy yilning 15-may sanasida Prezidentimiz rahbarligida boʻlib oʻtgan, taʼlim tizimida amalga oshirilayotgan islohotlarga bagʻishlangan videoselektor yigʻilishida shaxsan davlatimiz rahbari tashabbusi bilan ilgari surilgan “Dolzarb 90 kun” loyihasi doirasida butun mamlakatimiz boʻylab keng quloch yoygan maʼnaviy-maʼrifiy tadbirlar ham mohiyatan yoshlarning iqtidor va salohiyatlarini rivojlantirish, ularni yangi marralar sari ruhlantirish, umrning oʻtayotgan har bir kuni, har bir daqiqasidan unumli foydalanishga daʼvat qilayotgani bilan muhim ahamiyat kasb etmoqda.

Bu borada Amudaryo tumani hokimligi, tuman Maktabgacha va maktab taʼlimi boʻlimi hamda boshqada hamkor tashkilotlar masʼullari ishtirokida ishlab chiqilgan reja asosida tashkillashtirilayotgan dildan muloqot tarzidagi davra suhbatlari, “Uch avlod uchrashuvi”, sheʼriyat va kitobxonlik kechalari, turli sport musobaqalarida 7 yoshdan 17 yoshgacha boʻlgan bolalar, oʻsmir-yoshlar ishtirok etishmoqda.

Ana shunday koʻngilochar tadbirlardan biri tumanning Xizr eli mahallasi hududidagi 46-sonli umumtaʼlim maktabida ham boʻlib oʻtdi. Mazkur taʼlim muassasasida oʻquvchilar taʼtilga chiqqan kundan eʼtiboran “Dolzarb 90 kun” loyihasi doirasida amalga oshiriladigan ishlar boʻyicha aniq vazifalar belgilab olindi va shu asosda oʻquvchi-yoshlarning taʼtil davrini mazmunli oʻtkazishlari, oʻzlarining qiziqish va iqtidorlarini amalda namoyon etishlari uchun bir necha yoʻnalishlarda toʻgaraklar faoliyati yoʻlga qoʻyilib, zarur shart-sharoitlar yaratildi.

Ayniqsa, oʻquvchi-yoshlarning boʻsh vaqtlarini mazmunli oʻtkazishga qaratilgan sport-sogʻlomlashtirish musobaqalari, badiiy havaskorlik toʻgaraklari aʼzolari ishtirokidagi maʼnaviy-maʼrifiy koʻngilochar tadbirlar oʻsib kelayotgan yosh avlod qalbida milliy-maʼnaviy qadriyatlarga hurmat tuygʻusini mustahkamlab,, vatanparvar, oʻzaro mehr-oqibatli insonlar sifatida voyaga yetishlarida muhim omil boʻlmoqda.

“Biz vatanparvar yoshlarmiz!” shiori ostida tashkillashtirilgan uch avlod uchrashuvi tarzidagi tadbirda Amudaryo tuman Oila va xotin-qizlar boʻlimi rahbari Goʻzal Saburova, Ekologiya partiyasi Amudaryo tuman Kengashi raisi Saʼdulla Sodiqov, Amudaryo muhandislik texnikumi direktori Shuhrat Yuldashevlar va maktab pedagogika jamoasi hamda oʻquvchi-yoshlar ishtirok etdilar.

Tadbir avvalida mehmonlar maktab direktori Odilbek Jumaboyev taklifiga koʻra, “Dolzarb 90 kun” loyihasi doirasida tashkil etilgan toʻgaraklar faoliyati bilan yaqindan tanishdilar. “Ekologiya”, “Yosh kitobxon”, “Yosh musavvir” toʻgaraklari aʼzolari tomonidan tashkil etilgan jonli tabiat, kitoblar va rasmlar, qoʻl mehnati va toʻqimachilik mahsulotlari koʻrgazmalari, shuningdek, yoshlarni sogʻlom turmush tarziga rioya qilishga undovchi toʻgʻri ovqatlanish va vaqtida dam olish boʻyicha yoʻnaltirishga qaratilgan sanitariya-gigiyena talablari boʻyicha tashkil etilgan koʻrgazmalar tadbir mehmonlarida katta taassurotlar qoldirdi.

Ayniqsa, matematika va mantiq toʻgaragi aʼzolari tomonidan tashkillashtirilgan savol-javoblar tarzidagi, ingliz tili toʻgaragi aʼzolarining jonli muloqot koʻrinishidagi koʻrgazmali taqdimotlari Xizr eli mahallasi hududidagi 46-sonli maktabda haqiqiy bilimdon va yuksak salohiyatli yoshlar taʼlim-tarbiya olib, yozgi taʼtil davrini ham oʻzlari uchun foydali mashgʻulotlar bilan shugʻullanish orqali ijodkorlik bilan mazmunli oʻtkazayotganliklarni tadbir mehmonlari alohida eʼtirof etdilar.

Tadbir davomida ishtirokchilar maktabda tashkil etilgan boks, shaxmat-shashka, voleybol va futbol toʻgaraklari faoliyati bilan ham yaqindan tanishib, mazkur toʻgaraklar aʼzolari bilan muloqotda boʻldilar.

Shu kuni “Dolzarb 90 kun” doirasida 2-sinf oʻquvchilari uchun yoʻl harakati qoidalari boʻyicha dars-mashgʻulotlari, 5-sinflarda “Zakovat” intellektual oʻyini, kitobxonlik darsi hamda 2-sinflarda “Ertaklar olamiga sayohat” tadbirlari ham tashkil qilinib, bu tadbirlarda oʻquvchilar oʻzlarining yozgi taʼtil paytida egallagan bilim va koʻnikmalarini amalda namoyon etdilar.

Maktab badiiy havaskorlik toʻgaragi aʼzolari tomonidan ijro etilgan kuy va qoʻshiqlar tadbirga yanada joziba, koʻngillarga koʻtarinki kayfiyat bagʻishladi.

Tadbir yakunida Amudaryo tuman Oila va xotin-qizlar boʻlimi rahbari Goʻzal Saburova, 2024-2025 oʻquv yilida alohida yutuqlarga erishgan bir guruh oʻqituvchilarga tuman hokimining tashakkurnomalarini taqdim etdi va yoshlarning iqtidor va qobiliyatlarini rivojlantirish, yozgi taʼtil davrida ularning boʻsh vaqtlarini mazmunli oʻtkazish borasida fidoyilik bilan mehnat qilayotgan maktab pedagogika jamoasiga minnatdorchilik bildirdi.

ROBIYa YOʻLDOShEVA.