Xalq jamoalarining hisobot kontserti boʻlib oʻtdi

Sanʼat — bu inson qalbi va xalq ruhiyatining teran ifodasidir. U nafaqat badiiy zavq bagʻishlaydi, balki jamiyat maʼnaviyatini yuksaltirish, avlodlar oʻrtasida ruhiy-maʼnaviy bogʻliqlikni taʼminlashda ham beqiyos ahamiyat kasb etadi. Xususan, xalq sanʼati oʻzining soddaligi, samimiyligi va chuqur maʼno-mazmuniga ega boʻlgan ifodalari orqali millatning tarixi, urf-odatlari, anʼanalari va hayot tarzini oʻzida jamlagan. Kuy va qoʻshiq, raqs, sahna koʻrinishlari, ogʻzaki ijod namunalari orqali bu bebaho meros asrlar davomida avloddan avlodga oʻtib kelmoqda.

Bugungi kunda ham xalq sanʼati hayotimizda muhim oʻrin tutadi. Uning har tomonlama rivojlanishi, yosh isteʼdodlar orqali yanada boyishi va keng jamoatchilikka targʻib etilishi milliy oʻzligimizni asrab kelmoqda. Ayniqsa, hududlarda faoliyat yuritayotgan xalq jamoalari bu borada munosib hissa qoʻshib, madaniy merosimizni avloddan avlodga yetkazishda muhim rol oʻynamoqda.

24-iyun kuni Amudaryo tumani Madaniyat boʻlimi hovlisida xalq jamoalarining dastlabki 6 oylik faoliyatiga bagʻishlangan hisobot kontserti boʻlib oʻtdi. Tadbir “Uchqun” ashula va raqs xalq ansambli, “Ofarin” folklor-etnografik xalq jamoasi hamda “Jayhun moʻʼjizasi” anʼanaviy sahna tsirk xalq jamoalarining ijodiy chiqishlari bilan ishtirokchilarga xush kayfiyat ulashdi.

Xalq jamoalari tomonidan taqdim etilgan rang-barang kuy va qoʻshiqlar, nafis raqslar, xalq ijodi namunalari va sahna tomoshalari ishtirokchilarda unutilmas taassurot qoldirdi. Tadbirda oʻzbek va qoraqalpoq xalq kuylari, Xorazm xalq musiqalari hamda Komiljon Otaniyozov, Otajon Xudayshukurov va boshqa ustoz sanʼatkorlar ijodiga mansub kuy-qoʻshiqlar ijro etildi.

Shu bilan birga, kontsertda milliy va zamonaviy estrada kuy-qoʻshiqlari ham ijro qilindi. Bu, ayniqsa, yoshlar tomonidan katta qiziqish bilan qarshi olindi.

Tadbir davomida xalqimizning madaniy merosini asrab-avaylash, yosh isteʼdodlarni qoʻllab-quvvatlash, ijodiy faoliyatini muntazam yoʻnaltirish va keng ommaga tanitish, shuningdek, yosh avlodni sanʼatga qiziqtirish, ona Vatanga muhabbat ruhida tarbiyalash va boʻsh vaqtlarini mazmunli tashkil etishdagi samarali faoliyati uchun xalq jamoalari tuman hokimligi tomonidan “Tashakkurnoma” bilan taqdirlandi. Bu kabi eʼtirof ijodkorlar uchun katta kuch, yangi ilhom va masʼuliyat manbai boʻlib xizmat qiladi.

Kontsert dasturidan joy olgan xalq qoʻshiqlari, milliy qadriyatlarimiz aks etgan sahna koʻrinishlari barchaga birdek manzur boʻldi. Ayniqsa, yosh avlodning sanʼatga boʻlgan qiziqishini oshirish, ularni xalq ijodiga hurmat ruhida tarbiyalash, boʻsh vaqtlarini mazmunli tashkil etish borasida xalq jamoalarining oʻrni alohida eʼtirof etildi.

Tadbir yakunida tuman Madaniyat boʻlimi mudiri Murod Ibragimov soʻzga chiqib, xalq sanʼati va xalq jamoalarining milliy madaniyatimizdagi oʻrniga toʻxtaldi. Xalq ijodi millat maʼnaviyatining tayanchi ekani, bunday jamoalarning madaniy hayotimizdagi ahamiyati alohida taʼkidlandi. Shuningdek, barcha ishtirokchilarga, faol sanʼatkor va tadbir tashkilotchilarga samimiy minnatdorlik bildirdi.

Xalq sanʼati — bu xalqning oʻtmishini, buguni va kelajagini bogʻlovchi maʼnaviy koʻprikdir. U orqali millat oʻz oʻziga, oʻz tarixi va qadriyatlariga yangicha nigoh bilan qaraydi. Ushbu kontsert dasturi nafaqat hisobot, balki xalq sanʼatiga boʻlgan muhabbat va ehtirom namunasi, milliy qadriyatlarimizni asrab-avaylashga qaratilgan muhim maʼnaviy tadbir boʻldi.

Shubhasiz, bunday maʼnaviy-maʼrifiy tadbirlar yosh avlodni sanʼat orqali Vatanga muhabbat, milliy gʻurur va fidoyilik ruhida tarbiyalashda, xalqimizning yuksak madaniyati va anʼanalarini yanada keng targʻib etishda muhim ahamiyat kasb etadi.

Shohzod Qurbonboyev.