STATISTIKA TIZIMIDA ZAMONAVIY TEXNOLOGIYaLAR

Tuman Statistika boʻlimi Oʻzbekiston Respublikasi Prezidenti va hukumati tomonidan tadbirkorlikni rivojlantirish, tadbirkorlar huquq va manfaatlarini himoya qilishni kuchaytirish boʻyicha qabul qilingan farmon va qarorlarning ijrosini taʼminlash yuzasidan Davlat statistika qoʻmitasining kompleks chora-tadbirlar rejasiga asosan bir qancha ishlarni amalga oshirib kelmoqda.

Oʻzbekiston Respublikasi Prezidentining 2012-yil 16-iyuldagi "Statistik, soliq, moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari toʻgʻrisida”gi va 2012-yil 18-iyuldagi "Ishbilarmonlik muhitini yanada tubdan yaxshilash va tadbirkorlikka yanada keng erkinlik berish chora-tadbirlari toʻgʻrisida”gi farmonlarining qabul qilinishi tadbirkorlikning yuqori darajada rivojlanishini taʼminlab, oʻz navbatida mamlakatimiz iqtisodiy qudratini yanada oshirishga asos yaratib berdi.

Yuqoridagi farmonlar bilan 65 turdagi davlat statistika hisoboti shakllari umuman qisqartirildi va 23 turdagi davlat statistika hisoboti shakllarining taqdim etish muddatlari tubdan oʻzgartirildi.

Tadbirkorlar huquqlarini himoya qilishni kuchaytirish, byurokratik toʻsiqlarni tugatib borish evaziga yaratilgan ishbilarmonlik muhitini yaxshilash maqsadida yangidan tashkil etilayotgan tadbirkorlik subʼektlarini davlat roʻyxatiga olishda qulayliklar yaratilmoqda. Masalan, ilgarilari tadbirkorlikni boshlamoqchi boʻlgan shaxslar firma nomini olish uchun statistika organiga borib ariza berishlari, javobini 2 ish kunida, 2011-yildan boshlab esa 8 ish soati ichida olishlari mumkin edi. Prezidentimiz farmonining ijrosini taʼminlash yuzasidan Davlat statistika qoʻmitasi tomonidan 2012-yilning 1-avgustidan boshlab firma nomlari boʻyicha internet orqali kechayu-kunduz kelib tushgan arizalarni 4 ish soati davomida koʻrib chiqish amaliyotga joriy etildi.

Fuqarolarning yozma va ogʻzaki murojaatlari bilan ishlashning amaldagi meʼyoriy-huquqiy hujjatlar talablari asosida tashkil etilishini taʼminlash va bu borada nazoratni yanada kuchaytirish, Oʻzbekiston Respublikasining "Jismoniy va yuridik shaxslarning murojaatlari toʻgʻrisida”gi Qonuni ijrosini soʻzsiz taʼminlash, fuqarolar murojaatlarini koʻrib chiqishning natijadorligini yanada oshirish yuzasidan statistika boʻlimi tomonidan chora-tadbirlar dasturi tasdiqlangan. Tuman statistika boʻlimi rahbarlari tomonidan fuqarolarni qabul qilish belgilangan jadval asosida amalga oshirilmoqda.

Zamonaviy axborot texnologiyalari va aloqa vositalarining toʻliq va sifatli ishlashini taʼminlash maqsadida statistika tizimi xodimlarining malakalarini doimiy ravishda oshirib borish ishlari tizimli yoʻlga qoʻyildi.

Kelgusida tizimimizdagi axborot kommunikatsiya texnologiyalarini yangilab, xodimlarimiz malakalarini oshirib boramiz va 2015-yildan boshlab bosqichma-bosqich davlat statistika xisobot shakllarining internet orqali toʻliq qamrab olinishini taʼminlaymiz.

Hamza HAYTIMBETOV, tuman Statistika boʻlimi boshligʻi.

(Foto http://www.olx.uz)