Korruptsiyaga qarshi kurash barchamizning burchimiz

Korruptsiya — bu adolatsizlikning yuzaga chiqishi, bilim va mehnatning inkor etilishi, insof va vijdonning chetga surilishi demakdir. Ikkala odamning bitta qoʻl siqib kelishishi, oqibatda yillab mehnat qilib, oʻqib-izlanib kelayotgan insonning orzu-umidlari poymol boʻlishi — ana shu holatni korruptsiya deb atash mumkin. Yoki oʻz bilimsizligini yashirish maqsadida ilm yoʻlida sham misoli yonib, oliy taʼlim muassasasiga kirishni orzu qilgan yoshning kelajagini nohaq tarzda tortib olish — bu ham korruptsiyaning yomon oqibatidir.

Tarixiy manbalarga koʻra, korruptsiyaga qarshi kurashish borasida ilk harakatni boshlagan davlat — Shumer davlati hisoblanadi. Keyinchalik boshqa davlatlar ham bu borada tadqiqotlar olib borib, samarali chora-tadbirlarni amalga oshirishga kirishdilar.

Yurtimizda ham bu yoʻnalishda salmoqli ishlar qilinmoqda. Xususan, 2017-yil 3-yanvar kuni “Korruptsiyaga qarshi kurash toʻgʻrisida”gi Qonunning qabul qilinishi mamlakat hayotida muhim voqea boʻldi. Qonunning mazmuni — davlat va jamiyatning barcha sohalarida korruptsiyaga chek qoʻyish, unga nisbatan toqatsizlikni kuchaytirish, ushbu illatni oʻz vaqtida aniqlab, unga yoʻl qoʻygan shaxslarni jazoga tortish kabi ustuvor vazifalarni qamrab oladi. Bu borada keng koʻlamli tadqiqotlar, profilaktik choralar va aniq ish uslublari joriy etilgan.

Biroq harakat qilinsa-yu, amaliy natija koʻrinmasa, buning oqibati ayanchli boʻlishi mumkin. Avvalo, mamlakatimiz boshqa davlatlar qatorida taraqqiyot yoʻlidan borish, iqtisod, taʼlim va maʼrifat sohalarida yuksalishni maqsad qilgan ekan, bunda korruptsiyaga barham berish zarur. Korruptsiya ustiga qurilgan jamiyat maʼnaviy jihatdan zaiflashgan, rivojdan qolgan jamiyatdir. Maʼnaviyatsiz va maʼrifatsiz jamiyat esa, oʻz-oʻzidan inqiroz sari yuz tutadi.

XXI asr — bilim olish, rivojlanish va taraqqiy etish uchun keng imkoniyatlar yaratilayotgan davrdir. Shu bois, yoshlarimiz korruptsiyaga nisbatan mustahkam fikr va yetuk tushunchaga ega boʻlishi lozim. Chunki bu illat faqatgina iqtisodiy yoki ijtimoiy emas, balki maʼnaviy inqirozga ham sabab boʻladi.

Har birimizning hayotimizda “Kelajak yoshlar qoʻlida” degan ibora bor. Bu ibora shunchaki gap emas, balki yurt ravnaqiga xizmat qiluvchi ulkan masʼuliyatdir. Davlat tizimi va yoshlar oʻrtasidagi aloqalar faqat shaffof va adolatli asosda qurilsa, kelajak mustahkam boʻladi.

Hindistonning sobiq prezidenti Pratibha Patil shunday degan edi: “Korruptsiya — taraqqiyot va yaxshi boshqaruvning dushmanidir. Undan qutulish kerak. Bu maqsadni amalga oshirish uchun hukumat ham, butun xalq ham birlashishi kerak”. Darhaqiqat, agar kelajak bizning qoʻlimizda boʻlib, biz esa korruptsion tizim qoʻlida boʻlsak, bu paradoks — yaʼni aqlga sigʻmaydigan holatdir.

Mamlakatimizda amalga oshirilayotgan islohotlar oʻz samarasini bermoqda. Jamiyatda korruptsiyaga nisbatan munosabat sezilarli darajada oʻzgarib bormoqda. Ayniqsa taʼlim sohasida, oliy taʼlim muassasalarida talabalarning korruptsiya holatlari toʻgʻrisida xabar berishlari uchun tegishli mexanizmlar joriy etilgan. Bu bilan nafaqat jinoyat aniqlanadi, balki uning oldini olishga xizmat qiluvchi muhim qadam tashlanadi.

Oliy oʻquv yurtlarida “Korruptsiyaga qarshi kurashamiz”, “Eng yomon illat — korruptsiya”, “Korruptsiya — bu zulm!” kabi bannerlar orqali tushuntirish ishlari olib borilmoqda. Yoshlar oʻrtasida munozaralar tashkil qilinib, ularning huquqiy ongi va faol fuqarolik pozitsiyasi mustahkamlanmoqda.

Haqiqiy vatanparvar, bilimli va adolatparvar yoshlar korruptsiyaga duch kelmasligi, unda ishtirok etmasligi kerak. Ana shundagina biz har bir sohada yuqori choʻqqilarni zabt etishimiz, yurtimiz bayrogʻini yuksaklarga koʻtarishimiz mumkin.

Biz — yoshlar, korruptsiyaga qarshimiz!

Mashhura Xayitboyeva, Oʻzbekiston davlat jahon tillari universiteti talabasi.