Qishloq xoʻjaligi rivoji – barqaror kelajak garovi

Qishloq xoʻjaligi mamlakatimiz iqtisodiyotining tayanch tarmoqlaridan biri hisoblanadi. Bugungi kunda agrar sohada samaradorlikni oshirish, ilgʻor tajribalarni keng joriy etish, hosildorlikni koʻpaytirish va eng asosiysi, xalqimiz dasturxonini toʻkin qilish yoʻlida qilinayotgan ishlarning ahamiyati beqiyos. Shu maqsadda joylarda muntazam ravishda oʻtkazilayotgan seminar va amaliy uchrashuvlar fermerlar, mutaxassislar va masʼullar uchun katta maktab boʻlib xizmat qilmoqda.

Bu boradagi ishlarni yanada jadallashtirish, ilgʻor tajribalarni yanada ommalashtirish maqsadida 24-avgust kuni Amudaryo tumanida ham qator seminarlar tashkil etildi. Seminarlarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev, tuman hokimi Sobir Xoʻjametov, hokim oʻrinbosarlari, sohaga masʼul tashkilotlar rahbarlari, mutaxassislar va fermer xoʻjaliklari egalari faol ishtirok etdilar.

Dastlabki seminar Qangli ovuli hududidagi “Mangitova Aziza” fermer xoʻjaligida oʻtkazildi. Tadbirda 2026-yil hosili uchun gʻalla ekish masalalari atroflicha muhokama qilindi.

Seminarda Qoraqalpogʻiston Respublikasi Vazirlar Kengashi Raisining qishloq va suv xoʻjaligi masalalari boʻyicha oʻrinbosari Shuhrat Teshayev soʻzga chiqib, gʻalla ekish jarayonida qoʻllanilishi lozim boʻlgan ilgʻor tajribalar, samarali agrotexnik tadbirlar hamda fermerlar oldida turgan ustuvor vazifalar yuzasidan batafsil toʻxtalib oʻtdi.

Shuningdek, fermerlar oʻz tajribalari bilan oʻrtoqlashib, yangi ekin uslublari, hosildorlikni oshirish va yer unumdorligini yaxshilash yoʻllari yuzasidan fikr-mulohaza yuritdilar.

Keyingi seminar Qipchoq paxta qabul qilish maskanida davom etdi. Unda yaqinlashib kelayotgan paxta yigʻim-terimi mavsumiga tayyorgarlik holati oʻrganildi. Yigʻilganlar barcha texnikalarning mavsumga toʻliq shayligi, kombayn va agregatlarning ishchi holatga keltirilgani bilan yaqindan tanishdilar. Bu yilgi paxta yigʻim-terimini oʻz vaqtida va sifatli yakunlash uchun barcha zarur sharoitlar yaratilganini seminar ishtirokchilari amalda koʻrdilar.

Tadbirda soʻzga chiqqanlar taʼkidlaganidek, paxta yigʻim-terimi qishloq xoʻjaligi sohasidagi yilning eng masʼuliyatli davri biri sanaladi. Hosilni oʻz vaqtida, sifatli va betalafot yigʻib olishda tayyorgarlik jarayonlari, ayniqsa, texnikalarni toʻliq ishchi holatga keltirish nihoyatda muhim ahamiyat kasb etadi. Chunki paxta yigʻim-terimida har bir daqiqa, har bir texnika unumli ishlashi hosilning taqdirini belgilaydi.

Shularni inobatga olgan holda tumanda mavsumga jiddiy tayyorgarlik koʻrilib, barcha mavjud kombaynlar, traktorlar va boshqa yordamchi agregatlar toʻliq koʻzdan kechirildi, zarur ehtiyot qismlar almashtirildi hamda mexanik jihatdan shay holatga keltirildi. Bu esa kelgusi mavsumni betalofat oʻtkazish, hosilni qisqa fursatda yigʻishtirib olish imkonini beradi.

Shuni taʼkidlash joizki, texnika vositalarining shayligi nafaqat hosilni yoʻqotishsiz yigʻib olishga, balki mehnat unumdorligini oshirish, xarajatlarni kamaytirish va yakunda paxta sifatini yuqori darajada saqlab qolishga xizmat qiladi. Ayniqsa, mexanizatsiya darajasi yuqori boʻlgan hududlarda terim jarayonlari ancha yengil, samarali va tejamkor kechadi.

Seminarlarning keyingi manzili Choykoʻl ovuli hududidagi “Jayxun Choykoʻl” fermer xoʻjaligi boʻldi. Bu yerda 2025-yil hosili uchun ekilgan paxta maydonlarida defoliatsiya qilish ishlariga alohida eʼtibor qaratildi. Paxta bargini toʻkish orqali hosilni tez pishirish va sifatli yigʻib olish, terim jarayonida mehnat samaradorligini oshirishda defoliatsiyaning ahamiyati alohida qayd etildi.

Oʻtkazilgan uchrashuvlar jarayonida fermerlar va mutaxassislar oʻzaro tajriba almashdilar, yangicha yondashuvlar boʻyicha maslahatlar berdilar. Eng muhimi, bunday seminarlar sohaga oid muammolarni joyida oʻrganish va tezkor hal qilish imkonini beradi. Bu esa, albatta, qishloq xoʻjaligi rivojida samaradorlikni oshirishga xizmat qiladi.

Bugun yurtimizda qishloq xoʻjaligi sohasi oldiga qoʻyilgan maqsadlar ulkan. Hosildorlikni oshirish, zamonaviy agrotexnologiyalarni joriy etish, ekologik toza mahsulot yetishtirish, eksport salohiyatini kuchaytirish – bularning barchasi xalqimiz farovon hayot kechirishi uchun mustahkam zamin yaratadi. Oʻtkazilgan seminarlar esa bu maqsadlarga erishishda muhim vosita boʻlib xizmat qilishi shubhasiz.

Charos Arslonova, tuman hokimligining Axborot xizmati rahbari.