DXX ChEGARA QOʻShINLARIDA KORRUPTsIYaGA QARShI TARGʻIBOT TADBIRI OʻTKAZILDI

Joriy yilning 5-mart sanasida Oʻzbekiston Respublikasi Prezidentining Korruptsiyaga qarshi kurashish Milliy Kengashi yigʻilishida bergan topshiriqlari asosida ishlab chiqilgan “Yoʻl xaritasi” barcha sohalarda korruptsiyaga qarshi kurashish faoliyatining asosiy mezonlarini belgilab berdi.

Mazkur “Yoʻl xaritasi”da belgilangan vazifalar mazmun-mohiyatidan kelib chiqib, prokuratura organlari tomonidan sohaga oid faoliyat muvofiqlashtirilib, muntazam ravishda nazorat tadbirlari, keng aholi qatlamlari oʻrtasida targʻibot-tashviqot ishlari olib borilmoqda.

Bu borada Amudaryo tuman prokuraturasi tomonidan tizimli ishlar yoʻlga qoʻyilgan. Ayniqsa, tuman prokurori B. Masharipov rahbarligida idora va tashkilotlar rahbarlari, ishchi-xodimlari ishtirokidagi korruptsiya va taʼmagirlikning ayanchli oqibatlari, unga nisbatan jazoning muqarrarligi boʻyicha oʻtkazilayotgan targʻibot-tashviqot tadbirlari, tuman hududida amalga oshirilayotgan qurilish-taʼmirlash va rekonstruktsiya ishlarining sifatli bajarilishi yuzasidan joyiga chiqqan holda amalga oshirilayotgan keng koʻlamli nazorat ishlari aholi ongida korruptsiyaga qarshi murosasizlik kayfiyatini uygʻotishda muhim ahamiyat kasb etmoqda.

Oʻtkazilayotgan tadbirlarda prokuratura xodimlari tomonidan korruptsiyaviy holatlarning davlat va jamiyat taraqqiyotiga jiddiy tahdid, kishilar ongini zaharlovchi illat ekanligi toʻgʻrisidagi targʻibot va tashviqot varaqalari ham tarqatilayotgani aholining huquqiy immunitetini mustahkamlash imkonini bermoqda.

Ana shunday targʻibot tadbirlaridan biri Davlat Xavfsizlik xizmati Chegara qoʻshinlarining Amudaryo tumani hududidagi harbiy qismda ham oʻtkazilib, unda harbiy zobitlar, ayni paytda muddatli harbiy xizmat burchlarini oʻtayotgan askarlar ishtirok etdilar.

Targʻibot tadbirida Amudaryo tuman prokurorining katta yordamchisi Sharʼyar Joldasov mamlakatimizda tobora keng miqyos kasb etayotgan korruptsiyaga qarshi kurashish borasida amalga oshirilayotgan ishlar, bu boradagi qonuniy asoslar hamda Prezidentimizning Korruptsiyaga qarshi kurashish Milliy Kengashi yigʻilishida bergan topshiriqlari asosida ishlab chiqilgan “Yoʻl xaritasi”da belgilangan vazifalar xususida batafsil maʼlumotlar berdi.

Shu bilan birga, korruptsiyaning eng koʻp tarqalgan koʻrinishlaridan biri – manfaatlar toʻqnashuvi oqibatida yuzaga kelayotgan qonun buzilish va huquq buzarlik holatlari Amudaryo tumanida ham kuzatilayotgani, bunga jazoning muqarrarligi haqida soʻz yuritib, korruptsiyaga qarshi kurashish faqat huquqni muhofaza qilish organlari xodimlarining emas, balki jamiyatning barcha aʼzolarining burchi ekanligini taʼkidladi.

Tadbir davomida korruptsiyaning salbiy oqibatlari va unga nisbatan jazoning muqarrarligi haqidagi videorolik namoyish etildi. Videorolik namoyishidan soʻng tadbir ishtirokchilari korruptsiyaga qarshi kurashish boʻyicha oʻzaro fikr almashdilar hamda barchani davlat va jamiyat taraqqiyoti uchun jiddiy tahdid, maʼnaviyatimizni ichdan yemiruvchi illat – korruptsiyaga qarshi kurashishda birlashishga daʼvat etdilar.

Korruptsiyaga qarshi murosasizlik ruhida oʻtgan tadbir davlat organlari va tashkilotlarida ochiqlik va shaffoflikni taʼminlash, har bir xodimda xizmat intizomi va masʼuliyatni kuchaytirish, jamoatchilik bilan doimiy hamkorlikda profilaktik ishlar olib borish, har qanday korruptsiyaviy holatning oldini olish boʻyicha ishtirokchilarning huquqiy savodxonligi oshishini taʼminlashda muhim ahamiyat kasb etdi.

ROBIYa YOʻLDOShEVA.