BILIMLAR KUNI EZGU TAShABBUSLAR BILAN BOShLANDI

2-sentyabr — “Bilimlar kuni” Amudaryo tumanida yuqori kayfiyatda, koʻtarinki ruhda oʻtkazildi. Yangi oʻquv yilining ilk kunida nafaqat maktab hovlilarida bolalarning shoʻx kulgusi, qoʻllarida kitob va daftarlar bilan saboq dargohiga oshiqayotgan quvnoq qadamlari, balki mehr va gʻamxoʻrlik ramzi boʻlgan ezgu tashabbuslar ham namoyon boʻldi.

Ayniqsa, tuman hokimi tashabbusi bilan tashkil etilgan xayrli ish — ehtiyojmand oilalarning 200 nafar farzandiga maktab formasi tuhfa etilishi, bu kunni bolajonlar uchun yanada unutilmas qildi. Kichkintoylarning yuzida porlagan tabassum, ota-onalarning koʻzidagi minnatdorlik yoshlar taʼlimiga qaratilayotgan gʻamxoʻrlikning yorqin ifodasi boʻldi.

Tadbirda tuman hokimining oʻrinbosari, Oila va xotin-qizlar boʻlimi boshligʻi Goʻzal Saburova hamda tuman hokimining yoshlar siyosati, ijtimoiy rivojlantirish va maʼnaviy-maʼrifiy ishlar boʻyicha oʻrinbosari Nodirbek Kamolov, shuningdek, tuman Maktabgacha va maktab taʼlimi boʻlimi boshligʻi Yalgʻash Shomuratovlar ishtirok etib, oʻquvchilarga maktab formasini tantanali ravishda topshirdilar.

Soʻzga chiqqan masʼullar yangi oʻquv yilini boshlayotgan aziz bolajonlarni samimiy tabriklab, ularning bilim olishi, ilm-fan sirlarini puxta egallashi, yuksak marralarni zabt etishi va katta orzular sari dadil intilishlarida omad va zafarlar tiladilar.

Bu ezgu tashabbus yoshlarda bilim olishga boʻlgan mehrni yanada oshirish, ularni qoʻllab-quvvatlash, orzulari sari intilishlariga koʻmak berish yoʻlidagi muhim qadamlardan biridir. Zero, har bir bola maktab formasini kiyar ekan, oʻzini kelajak sari dadil qadam tashlayotgan, jamiyat eʼtiborida boʻlgan inson sifatida his qiladi.

Bayramlar arafasida mehr-muhabbat ulashish, insonlarning qalbini quvonchga toʻldirish — eng savobli va eng ezgu amallardan biridir. Ayniqsa, ehtiyojmand insonlarni shod etish, ularning ertangi kuniga ishonch bagʻishlash — bu nafaqat moddiy yordam, balki mehr, gʻamxoʻrlik va yuksak insoniy qadriyatlarning yorqin ifodasidir.

Shubhasiz, bugun oʻziga yarasha kichik koʻrinadigan, ammo kelajak uchun ulkan maʼnaviy ahamiyat kasb etadigan bu tashabbus — ertangi kunimiz egalari boʻlgan yoshlarning qalbida ishonch, orzu va intilishlar uchqunini uygʻotadi. Ilmli, tarbiyali va komil insonlarni voyaga yetkazish esa nafaqat oila, balki butun jamiyatning sharafli va masʼuliyatli burchidir.

“Bilimlar kuni” bayrami mana shunday ezgu tashabbuslar, samimiy tabriklar, ota-onalarning shukronasi va farzandlarning begʻubor kulgulari bilan boshlandi. Ishonamizki, tumanimizdagi barcha maktab oʻquvchilari yangi oʻquv yilida yurtimiz taraqqiyotiga munosib hissa qoʻshadigan, ilm-fan choʻqqilarini zabt etadigan maʼrifatli avlod vakillari sifatida ulgʻayadilar.

Charos Arslonova, tuman hokimligining Axborot xizmati rahbari.