Tumanda chiqindi tashuvchi texnikalar soni yana 3 taga koʻpaydi
Mamlakatimizda aholining salomatligiga, ekologik muhitga salbiy taʼsir koʻrsatadigan noxush vaziyatlar sodir boʻlishining oldini olish maqsadida iqtisodiyot sohalarida va aholi punktlarida hosil boʻladigan maishiy chiqindilar bilan bogʻliq ishlarni boshqarish tizimini takomillashtirishga qaratilgan saʼy-harakatlar izchillik bilan amalga oshirilmoqda. Natijada hududlarning sanitariya-gigiyenik holati tobora yaxshilanib bormoqda.
Bu borada Oʻzbekiston Respublikasi Prezidentining 2020-yil 29-sentyabrdagi “Qattiq maishiy chiqindilarni toʻplash va olib chiqish tizimini tubdan takomillashtirish chora-tadbirlari toʻgʻrisida”gi qarori va ushbu qarorga muvofiq ishlab chiqilgan “Yoʻl xaritasi”da belgilangan vazifalar ijrosini taʼminlash yuzasidan amalga oshirilayotgan keng koʻlamli ishlar oʻzining ijobiy samarasini bermoqda.
Unga koʻra, Ekologiya va atrof-muhitni muhofaza qilish davlat qoʻmitasi, Davlat-xususiy sheriklikni rivojlantirish agentligi va Davlat aktivlarini boshqarish agentligining hududlarda maishiy chiqindilar bilan bogʻliq ishlarni amalga oshirishda davlat-xususiy sherikligi modeli amaliyotga joriy etildi. Ushbu islohotlarning amaliy samarasi sifatida davlat sherigi – Qoraqalpogʻiston Respublikasi Vazirlar Kengashi hamda Davlat ekologiya qoʻmitasining hududiy organi bilan xususiy sherik, yaʼni “GLOBAL POSITION SYSTEM” MChJ oʻrtasida 2023-yil 20-yanvarda bitim imzolangan edi.
Ushbu bitimga binoan “GLOBAL POSITION SYSTEM” MChJ Amudaryo, Taxtakoʻpir, Qoraoʻzak tumanlarining qattiq maishiy chiqindilarini olib chiqish boʻyicha xizmatlar koʻrsatish va 18 milliard soʻmlik investitsiya kiritish majburiyatini olgan. Bugungi kungacha korxona tomonidan 7 milliard 657 million soʻmlik investitsiya mablagʻlari kiritildi va mazkur tumanlar hududlarining sanitariya-gigiyenik holati yaxshilanib, qattiq va maishiy chiqindilar toʻplanib qolishiga barham berilmoqda.
Yaqinda Chiqindilarni boshqarish va tsirkulyar iqtisodiyotni rivojlantirish agentligi tomonidan lizing asosida mazkur jamiyatga umumiy qiymati 2 milliard 607 million soʻm boʻlgan 3 ta ISUZU rusumli maxsus chiqindi tashuvchi avtotransport vositalari yetkazib berildi. Natijada hududlarda yashovchi aholining qattiq maishiy chiqindilarni toʻplash va olib chiqib ketish boʻyicha xizmatlar bilan qamrab olinish darajasi yanada kengaydi.
Investitsiya asosida, lizingga xarid qilingan maxsus texnikalar Amudaryo tumaniga olib kelindi va tuman hokimi ishtirokida filialga tantanali ravishda topshirildi. Bu texnikalar qattiq maishiy chiqindilarni olib chiqib ketish boʻyicha koʻrsatilayotgan xizmatlar sifatini yanada oshirish imkonini beradi. Bundan tashqari, ushbu maxsus texnikalar olib kelinishi bilan tumanda yana 9 ta yangi ish oʻrni yaratildi.
Mazkur texnikalarning keltirilishi korxonaning texnika parkini yanada boyitish bilan birga, tumandagi barcha ovul va mahallalar, sanoat ishlab chiqarish korxonalari, taʼlim-tarbiya muassasalarining hududlarida qattiq maishiy chiqindilar toʻplanib qolishining oldini olish, atrof-muhit, ekologik vaziyatning yaxshilanishi, aholi maskanlarining yanada obod va fayzli goʻshaga aylanishini taʼminlash yoʻnalishidagi ishlarni yanada jadallashtirishga xizmat qiladi.
ROBIYa YOʻLDOShEVA.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
