Tinchlik va osoyishtalik posbonlariga ehtirom

Yurtimizda tinchlik va osoyishtalikni taʼminlash, fuqarolarning huquq va manfaatlarini himoya qilish, jamiyatda barqarorlik muhitini saqlash — bu masʼuliyatli va sharafli vazifadir.

Har yili 25-oktyabr mana shunday fidoyi kasb egalari – Ichki ishlar organlari xodimlarining kasb bayrami hamda Oʻzbekiston Respublikasi ichki ishlar vazirligi tashkil etilgan muhim sana sifatida mamlakatimiz boʻylab keng nishonlanadi. Bu yil ushbu sanaga 34-yil toʻldi. Xalq osoyishtaligi, tinchligi va xavfsizligi yoʻlida fidokorona xizmat qilayotgan soha xodimlariga boʻlgan yuksak ehtirom ifodasi sifatida ushbu sana bu yil ham keng nishonlandi.

Sana munosabati bilan Amudaryo tumani hokimligi tomonidan ichki ishlar organlari xodimlari uchun bayram tadbiri tashkil etildi. Tumanimizdagi “Diamond” restoranida bayram dasturxoni yozildi. Tadbirda tuman hokimi Sobir Xoʻjametov ishtirok etib, barcha ichki ishlar xodimlarini samimiy tabrikladi, ularning mashaqqatli, masʼuliyatli hamda sharafli mehnatlarini eʼtirof etdi.

“Sizlar — xalqimiz tinchligi, osoyishtaligi va farovon hayotining kafolatlarisiz. Sizlarning sadoqatingiz, matonatingiz va vatanparvarligingiz bilan yurtimizda barqarorlik mustahkamlanmoqda. Buning uchun barchangizga chuqur minnatdorlik bildiraman”, — dedi tuman hokim oʻz tabrigida.

Tadbirda tuman prokurori Bahram Masharipov ham soʻzga chiqib, ichki ishlar xodimlarini bayram bilan tabrikladi. U oʻz nutqida yurtboshimiz tomonidan sohada olib borilayotgan keng qamrovli islohotlarga toʻxtalib, tizimni raqamlashtirish, xodimlar mehnatini yengillashtirish, zamonaviy texnik vositalar bilan taʼminlash hamda ularning oila aʼzolari ijtimoiy himoyasini kuchaytirish boʻyicha amalga oshirilayotgan ishlar xususida alohida toʻxtaldi. Shuningdek, soha xodimlarining Vatan ravnaqi yoʻlidagi xizmatlarini, qonun ustuvorligini taʼminlashdagi fidoyiligini alohida eʼtirof etdi.

Taʼkidlanganidek, soha fidoyilarining saʼy-harakatlari natijasida jamiyatda tinchlik, tartib va qonuniylik qaror topmoqda. Ichki ishlar organi xodimlarining xizmatlari davlat va xalq oʻrtasidagi ishonch koʻprigidir. Ularning burchiga sadoqati va oʻz kasbiga masʼuliyatli yondashuvi Vatanimiz taraqqiyoti, xalqimiz farovonligi va jamiyatimiz ravnaqida muhim omil boʻlmoqda.

Tadbir davomida xizmatda oʻz burchini sidqidildan ado etayotgan, yuqori natijalarga erishgan bir guruh tuman Ichki ishlar boʻlimi xodimlariga tashakkurnomalar hamda esdalik sovgʻalari topshirildi.

Bayram tadbiri tuman Madaniyat boʻlimi xonandalari tomonidan tayyorlangan kontsert dasturi bilan davom etdi. Kuy-qoʻshiqlar, samimiy tabriklar va quvonchli lahzalar kechaga yanada koʻtarinki ruh bagʻishladi.

Ushbu bayram tadbiri Amudaryo tumanida huquqni muhofaza qiluvchi organlar xodimlariga boʻlgan hurmat va ehtiromning yana bir yorqin ifodasi boʻldi. Zero, ular — xalq osoyishtaligining haqiqiy posbonlari, Vatan tinchligi yoʻlida har kuni fidokorona xizmat qilayotgan mard oʻgʻlonlardir.

Charos Arslonova, tuman hokimligining Axborot xizmati rahbari.