Korruptsiya — davlat va jamiyat taraqqiyotiga tahdid

Korruptsiya — bugungi kunda dunyo miqyosida hal etilishi lozim boʻlgan global muammolardan biri hisoblanadi. Ushbu illat har qanday davlat va jamiyatning siyosiy-iqtisodiy, ijtimoiy-madaniy rivojlanishiga jiddiy putur yetkazib, inson huquq va erkinliklarining poymol boʻlishiga olib keladi. Shu bois, unga qarshi kurashish xalqaro ahamiyat kasb etib, jahondagi deyarli barcha mamlakatlar siyosatining eng muhim va dolzarb masalalari qatoridan joy olgan. Korruptsiyaga qarshi kurashish masalasi mamlakatimizda ham kechiktirib boʻlmaydigan eng dolzarb, muammoli masalaga aylangan.

Ushbu yoʻnalishdagi ishlarning muhim boʻgʻini sifatida keng koʻlamli targʻibot-tashviqot ishlarini yoʻlga qoʻyish orqali aholi ongida korruptsiyaga nisbatan murosasizlik tuygʻusini shakllantirishga alohida eʼtibor qaratilmoqda. Bu borada OAVlari tomonidan amalga oshirilayotgan chora-tadbirlar oʻzining ijobiy samarasini bermoqda. Ayniqsa, davlat va jamoat tashkilotlarida, keng aholi qatlami orasida jurnalistlar tomonidan tashkillashtirilayotgan uchrashuv va davra suhbatlarida korruptsiyaning maʼnaviy ustunlarni yemirishi, iqtisodiy-siyosiy, ijtimoiy-madaniy hayot uchun ulkan xavf tugʻdirishi toʻgʻrisida tushunchalar berilayotgani fuqarolarning bu boradagi huquqiy savodxonligini oshirishga xizmat qilmoqda.

Amudaryo televideniyesi tahririyatining Oʻzbekiston Respublikasi Oliy Majlisi huzuridagi Fuqarolik jamiyati institutlarini qoʻllab-quvvatlash jamoat fondi Qoraqalpogʻiston boʻlinmasi tomonidan moliyalashtirilgan “Korruptsiya — davlat va jamiyat taraqqiyotiga tahdid” nomli grant loyihasi doirasida ham vakolatli davlat organlari bilan hamkorlikda ehtimoliy korruptsiya va taʼmagirlik holatlarining oldini olishga munosib hissa qoʻshish maqsadida targʻibot-tashviqot tadbirlari amalga oshirilmoqda.

Xususan, loyiha koordinatorlari vakolatli davlat organlari xodimlari bilan hamkorlikda Amudaryo tuman Tibbiyot birlashmasi va unga qarashli boʻlimlarda faoliyat olib boruvchi shifokorlar bilan uchrashib, ularning xizmat xonalariga “Sizga xizmat qilish — mening vazifam, iltimos, pora taklif qilmang!”, “Men oilamni pora evaziga boqmayman!” “Men korruptsiyaga qarshiman!” yozuvlari tushirilgan maxsus lavhalarni joylashtirdi.

Shifokorlar bilan muloqot jarayonida tibbiyot sohasini korruptsiyadan xoli tizimga aylantirish har bir xodimning zimmasidagi masʼuliyatli vazifasi ekanligiga alohida urgʻu berildi.

Shuningdek, grant loyihasi koordinatorlari Amudaryo tumani hokimligida faoliyat yurituvchi davlat xizmatchilarining ham xizmat xonalariga har bir fuqaro ongida korruptsiyaga nisbatan murosasizlik tuygʻusini shakllantirishga xizmat qiluvchi maxsus yozuvli lavhalarni joylashtirib, xodimlar bilan korruptsiya illatiga qarshi kurash samaradorligini oshirish yuzasidan samimiy muloqotda boʻldilar. Lavhalarga davlat xizmatchilarini halollikka chorlovchi yozuvlar tushirilgan. Qolaversa, davlat xizmatlaridan foydalanuvchilar agar zarurat tugʻilsa maxsus QR kodni skanerlab, korruptsiyaga qarshi kurashuvchi vakolatli davlat organlari bilan bogʻlanishlari mumkin.

Amudaryo televideniyesi tahririyati tomonidan amalga oshirilayotgan “Korruptsiya — davlat va jamiyat taraqqiyotiga tahdid” nomli grant loyihasi doirasidagi bu kabi targʻibot-tashviqot tadbirlari davlat organlari masʼul xodimlari bilan bogʻliq ehtimoliy korruptsiya va taʼmagirlik holatlarining oldini olishga munosib hissa qoʻshishga qaratilgani bilan muhim ahamiyatga ega.

ROBIYa YOʻLDOShEVA.